ଅନୁଗୋଳ ଅଫିସ୍, ୨୫ା୩- କରୋନା ସଂକ୍ରମଣକୁ ରୋକିବା ପାଇଁ ପୂରା ଦେଶକୁ ଲକ୍ଡାଉନ ଘୋଷଣା କରାଯାଇଥିଲେ ହେଁ ଅନୁଗୋଳ ଜିଲାର ବିଭିନ୍ନ ବ୍ଲକ ଅଞ୍ଚଳରେ ଏହି କଟକଣା ଉଲ୍ଲଂଘନ କରାଯାଉଥିବା ଦେଖାଯାଉଛି। ଜରୁରୀ କାମ ନ ଥିଲେ ବି ଅନେକ ଲୋକ ବାଇକ୍, ସାଇକେଲ୍ ଧରି ରାସ୍ତାକୁ ଆସି ବୁଲାବୁଲି କରୁଥିବାରୁ ପୋଲିସ କଠୋର ପଦକ୍ଷେପ ନେବା ଆରମ୍ଭ କରିଛି। ଏପରି ଆଇନ ଉଲ୍ଲଂଘନକାରୀ ୨୫ ଜଣଙ୍କ ନାମରେ ମାମଲା ରୁଜୁ କରାଯାଇଥିବା ପୋଲିସ ପକ୍ଷରୁ କୁହାଯାଇଛି। ଜରପଡ଼ା ଥାନାରେ ୨, ପାଲଲହଡା ଥାନାରେ ୨, ବଅଁରପାଳ ଥାନାରେ ୫, କଣିହଁା ଥାନାରେ ୧ ଏବଂ ଅନୁଗୋଳ ଥାନାରେ ୧୫ ଜଣଙ୍କ ନାମରେ ମାମଲା ରୁଜୁ କରାଯାଇଛି। ସେମାନଙ୍କ ନିକଟରୁ ୧୧ଟି ବାଇକ୍ ମଧ୍ୟ ଜବତ କରାଯାଇଛି। ସେହିପରି ପାଲଲହଡା ସହରରେ ମଧ୍ୟ ବିନା କାମରେ ଲୋକେ ରାସ୍ତାରେ ବୁଲାବୁଲି କରୁଥିବାରୁ ଉପଜିଲାପାଳ ଅଜିତ କୁମାର ପ୍ରଧାନ, ଉପଖଣ୍ଡ ପୋଲିସ ଅଧିକାରୀ ଯଶୋବନ୍ତ ସାମଲ ଓ ପାଲଲହଡ଼ା ଥାନା ଅଧିକାରୀ କିଶୋର କୁମାର ସାମଲ ସହରରେ ବୁଲି ଡାକବାଜି ଯନ୍ତ୍ର ସାହାଯ୍ୟରେ ଏପରି ନ କରିବାକୁ ସଚେତନ ସହ ସତର୍କ କରାଇ ଦେଇଛନ୍ତି। କଣିହଁା ବ୍ଳକ ଅଞ୍ଚଳରେ ମଧ୍ୟ କେତେଜଣ ଏହି କଟକଣା ଉଲ୍ଲଂଘନ କରୁଥିବା ଆଇଆଇସି ପ୍ରଭାତ କୁମାର ତ୍ରିପାଠୀ ପ୍ରକାଶ କରିଛନ୍ତି।