ଅନୁଗୋଳ ଅଫିସ୍, ୨୧।୩
କରୋନାକୁ ନେଇ କଟକଣା ବଢ଼ୁଥିବା ବେଳେ ସହରଠାରୁ ଗଁା ଯାଏ ସବୁଠି ଏବେ ଲୋକେ ଆଶଙ୍କା ମଧ୍ୟରେ ଅଛନ୍ତି। ଏପରି କି ସଂକ୍ରମଣର କୌଣସି ଲକ୍ଷଣ ନ ଥିଲେ ମଧ୍ୟ ଜଣେ ଅନ୍ୟ ଜଣଙ୍କୁ ସନ୍ଦିଗ୍ଧ ବୋଲି ମନେ କରୁଛି। ଏପରି ସ୍ଥିତିରେ ଦେଶ ଓ ରାଜ୍ୟ ବାହାରୁ ଗଁାକୁ ଫେରୁଥିବା ଲୋକଙ୍କୁ ନେଇ ଅନେକ ଅଞ୍ଚଳରେ ଅଡ଼ୁଆ ପରିସ୍ଥିତି ସୃଷ୍ଟି ହେଉଥିବା ନଜରକୁ ଆସୁଛି। ତେବେ ପ୍ରଶାସନ ପକ୍ଷରୁ ଲୋକଙ୍କୁ ସଚେତନ କରାଯିବା ପ୍ରକ୍ରିୟା ସବୁଠି ଆରମ୍ଭ ହୋଇଛି। ଓ୍ବାର୍ଡସ୍ତରରୁ ଆରମ୍ଭ କରି ପଞ୍ଚାୟତ ସମିତି ଓ ଜିଲା ପରିଷଦର ବୈଠକ ବସୁଥିବା ବେଳେ ଏଥିରେ ଲୋକଙ୍କୁ ସତର୍କ ଓ ସଚେତନ କରାଯାଉଛି। ଏପରି କି ପଞ୍ଚାୟତରେ କ୍ବାରାଣ୍ଟାଇନ୍ ହୋମ୍ ଖୋଲାଯାଉଛି। କିନ୍ତୁ ସଚେତନତା ଉପରେ ଭୟ ଭାରି ପଡ଼ୁଥିବାରୁ ଦେଶ ଓ ରାଜ୍ୟ ବାହାର ଫେରନ୍ତାଙ୍କୁ ନେଇ ଅନେକ ସ୍ଥାନରେ ବିରୋଧାଭାସ ଦେଖିବାକୁ ମିଳୁଛି। ତେବେ କେହି ଏପରି କାର୍ଯ୍ୟ କଲେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲା ପ୍ରଶାସନ ପକ୍ଷରୁ କୁହାଯାଇଛି।
ଦେଶ ଓ ରାଜ୍ୟ ବାହାରୁ ଫେରୁଥିବା ଲୋକଙ୍କୁ ବିରୋଧ କରାଯିବାର ଉଦାହରଣ ଅନୁଗୋଳ ଜିଲାରେ ଅଭାବ ନାହିଁ। ଗତ ୧୬ ତାରିଖରେ ହେମସୁରପଡ଼ାରେ ଭଡ଼ାରେ ରହୁଥିବା ମା’ ବାପାଙ୍କ ନିକଟକୁ ତାଙ୍କ ବିବାହିତା ଝିଅ ଦିଲ୍ଲୀରୁ ଆସିଥିଲେ। ସେ ଗର୍ଭବତୀ ଥିଲେ। କିନ୍ତୁ କାୟା ମେଲାଉଥିବା କରୋନା ଯୋଗୁ ତାଙ୍କୁ ଘର ମାଲିକଙ୍କ ବିରୋଧାଭାସର ଶିକାର ହେବାକୁ ପଡ଼ିଥିଲା। ଝିଅକୁ ବାପଘରେ ଆଶ୍ରୟ ମିଳିବ ନାହିଁ ବୋଲି ଭଡ଼ା ଦେଇଥିବା ଘର ମାଲିକ ରୋକ୍ଠୋକ୍ ଶୁଣାଇ ଦେଇଥିଲେ। ଏପରି କି ଝିଅଙ୍କୁ ମେଡିକାଲରେ ଦେଖାଇ ଡାକ୍ତରୀ ପ୍ରମାଣପତ୍ର ଆଣି ଘର ମାଲିକଙ୍କୁ ଦେଖାଇବା ପରେ ବି କୌଣସି ସୁଫଳ ମିଳି ନ ଥିଲା। କିଛି ଉପାୟ ନ ମିଳିବାରୁ ଦିଲ୍ଲୀରୁ ଫେରିଥିବା ଝିଅ ଗତ ୧୮ ତାରିଖରେ ପୁଣି ଦିଲ୍ଲୀ ପଳାଇବାକୁ ବାଧ୍ୟ ହୋଇଥିଲେ। ସେହିପରି ଚେନ୍ନାଇରୁ ଫେରିଥିବା ଜଣେ ଯୁବକଙ୍କୁ ନେଇ କେତେଜଣ ହୋହାଲ୍ଲା କରିବାରୁ ସେ ଘରୁ ଅନ୍ୟତ୍ର ଚାଲିଯାଇଥିବା ସୂଚନା ମିଳିଛି। କେବଳ ଅନୁଗୋଳ ଉପକଣ୍ଠ ନୁହେଁ, ଗତ ଗୁରୁବାର ଆଠମଲ୍ଲିକ ଅଞ୍ଚଳର ଜଣେ ଯୁବକ ମୁମ୍ବାଇରୁ ଫେରିଥିଲେ ମଧ୍ୟ ତାଙ୍କୁ ଗାଁରେ ପୂରାଇ ଦିଆଯାଇ ନ ଥିଲା। ସେ ମେଡିକାଲ ଆସି ଡାକ୍ତରଙ୍କ ପରାମର୍ଶ ନେବା ପରେ ଗାଁରେ ବୈଠକ ବସିଥିଲା। ଏହାପରେ ତାଙ୍କୁ ଗଁାରେ ରହିବାକୁ ଅନୁମତି ଦିଆଯାଇଥିଲା। ଏପରି ଘଟଣା ସମ୍ପର୍କରେ ଜିଲାପାଳ ମନୋଜ କୁମାର ମହାନ୍ତି କହିଛନ୍ତି, କାହାକୁ ଘରୁ ବାହାର ନ କରିବାକୁ ସରକାରୀ ନିୟମ ରହିଛି। ଯେଉଁ ବ୍ୟକ୍ତିମାନେ ଘରୁ ବାହାରିବା ପାଇଁ ଲୋକଙ୍କୁ ବାଧ୍ୟ କରିବେ ସେମାନଙ୍କୁ ପୋଲିସ ଗିରଫ କରିପାରିବ। ଯେଉଁମାନେ ବାହାର ରାଜ୍ୟ ଓ ଦେଶରୁ ଆସୁଛନ୍ତି ସେମାନଙ୍କୁ ହୋମ୍ କ୍ୱାରାଣ୍ଟାଇନ୍ରେ ରହିବାକୁ କୁହାଯାଇଛି। ଏ ନେଇ ଲୋକେ ସତର୍କ ଓ ସଚେତନ ହେଲେ ଭଲ ହେବ ବୋଲି ଜିଲାପାଳ ପ୍ରକାଶ କରିଛନ୍ତି।