ଛତ୍ରପୁର,୨୬ା୪(ଡି.ଏନ୍.ଏ.) : ଗଞ୍ଜାମ ଜିଲାର ୩ ଲକ୍ଷରୁ ଅଧିକ ଲୋକ ବିଭିନ୍ନ ବାହାର ରାଜ୍ୟରେ ଥିବା ସମ୍ପର୍କରେ ପ୍ରାକ୍ ଆକଳନରୁ ଜଣାପଡ଼ିଛି। ଏଥିରୁ ଅଧିକାଂଶ ଲୋକ ଲକ୍ଡାଉନ୍ ଉଠିବା ପରେ ଗଞ୍ଜାମ ଜିଲାକୁ ଫେରିବାର ସମ୍ଭାବନା ରହିଛି। ଅଙ୍ଗନଓ୍ବାଡ଼ି କର୍ମୀମାନଙ୍କ ପକ୍ଷରୁ ଏହି ପ୍ରାକ୍ ଆକଳନ ହୋଇଛି। ତେବେ ଲକ୍ଡାଉନ୍ ଉଠିବା ପରେ ଜିଲାକୁ ଫେରିବାକୁ ଚାହୁଁଥିବା ଲୋକ ଓ ଶ୍ରମିକ ପଞ୍ଜୀକରଣ କରିବା ବାଧ୍ୟତାମୂଳକ ରହିଛି ।୨୪ତାରିଖରୁ ଏହି ଅନ୍ଲାଇନ ପଞ୍ଜୀକରଣ ଆରମ୍ଭ ହୋଇଛି। ୨ ଦିନ ମଧ୍ୟରେ ବାହାର ରାଜ୍ୟରେ ଥିବା ୧୯୨୫ଜଣ ଜିଲାକୁ ଫେରିବା ନେଇ ଅନ୍ଲାଇନ୍ରେ ପଞ୍ଜୀକରଣ କରିଥିବା ସୂଚନା ଦିଆଯାଇଛି। ଅପରପକ୍ଷରେ ପୂର୍ବ ପ୍ରାକ୍ ଆକଳନ ରିପୋର୍ଟକୁ ଆଧାର କରି ଅଙ୍ଗନବାଡ଼ି କର୍ମୀମାନେ ମଧ୍ୟ ବାହାର ରାଜ୍ୟରେ ଥିବା ଲୋକ ଓ ଶ୍ରମିକଙ୍କ ଘରକୁ ଯାଇ ପରିବାର ଲୋକଙ୍କୁ ପଚାରି ଅଫ୍ଲାଇନରେ ପଞ୍ଜୀକରଣ ମଧ୍ୟ ଚାଲିଛି। ଲକ୍ଡାଉନ୍ ସମୟରେ ଅନ୍ଲାଇନ୍ରେ ପଞ୍ଜୀକରଣରେ ଅସୁବିଧା ହୋଇପାରେ। ଏଣୁ ଅଫ୍ଲାଇନରେ ମଧ୍ୟ ଗଞ୍ଜାମ ଜିଲା ପ୍ରଶାସନ ପକ୍ଷରୁ ବ୍ୟବସ୍ଥା କରାଯାଇଛି