ଭୁବନେଶ୍ୱର,୨୭ା୩(ବ୍ୟୁରୋ): ଲକ୍ଡାଉନ୍ ପାଇଁ ଭୁବନେଶ୍ୱରରେ ଅନ୍ୟ ଜିଲାର ଶହ ଶହ ଠିକା ଶ୍ରମିକ ଫସି ରହି ଭୋକ ଉପାସରେ ରାସ୍ତା କଡ଼ରେ ପଡି ରହିଛନ୍ତି। ଗୁରୁବାର ରାମ ମନ୍ଦିର ଓ ଏହାର ଆଖପାଖରେ ବହୁ ଶ୍ରମିକ ଏପରି ଦୟନୀୟ ଅବସ୍ଥାରେ ଥିବା ଦେଖିବାକୁ ମିଳିଥିଲା। ବାଲେଶ୍ୱର ଅଞ୍ଚଳର ଜଣେ ଶ୍ରମିକ ଅଜିତ ନାୟକ କହିଛନ୍ତି, ମାଷ୍ଟରକ୍ୟାଣ୍ଟିନ ଅଞ୍ଚଳରେ ଜଣେ ଇଲେକ୍ଟ୍ରିକାଲ ଠିକାଦାରଙ୍କ ନିକଟରେ ତାଙ୍କ ସହ ବିଭିନ୍ନ ଜିଲାର ୧୦୦ରୁ ଊର୍ଦ୍ଧ୍ୱ ଶ୍ରମିକ କାମ କରୁଥିଲେ। ଲକ୍ଡାଉନ ପୂର୍ବଦିନ କଣ୍ଟ୍ରାକ୍ଟର ପ୍ରତ୍ୟେକଙ୍କୁ ୫୦୦ଟଙ୍କା ଧରାଇ ଚାଲିଗଲେ। ବସ୍ ଚଳାଚଳ ବନ୍ଦ ହୋଇଯିବାରୁ ଆମେ ଘରକୁ ଯାଇପାରିଲୁନି। ପ୍ରାୟ ୪୦ଜଣ ଚାଲିଚାଲି ଘର ଅଭିମୁଖେ ବାହାରିଥିବାବେଳେ ୫୦ରୁ ଉର୍ଦ୍ଧ୍ୱ ଶ୍ରମିକ ରାଜଧାନୀ ରାସ୍ତାକଡରେ ଦିନ ବିତାଉଛନ୍ତି। କେତେଜଣଙ୍କ ପାଖରେ ଟଙ୍କା ରହିଥିଲେ ମଧ୍ୟ ହୋଟେଲ ବନ୍ଦ ଥିବାରୁ ଦୁଇବେଳା ଖାଇବା କଷ୍ଟକର ହୋଇପଡୁଛି। ସରକାର ଆମକୁ ଘରକୁ ଫେରାଇବାର ବ୍ୟବସ୍ଥା କରିବାକୁ ତାଙ୍କ ସହ ଅନ୍ୟ ଶ୍ରମିକମାନେ ନିବେଦନ କରିଛନ୍ତି। ଅନ୍ୟପକ୍ଷରେ ବିଏଡ୍ ପରୀକ୍ଷା ଦେବାକୁ ଆନ୍ଧ୍ରପ୍ରଦେଶ, ମହାରାଷ୍ଟ୍ର ଓ ଅନ୍ୟ ରାଜ୍ୟକୁ ଯାଇଥିବା ଶତାଧିକ ଛାତ୍ରୀଛାତ୍ର ଫେରି ନ ପାରି ଫଶି ରହିଛନ୍ତି। ରାଷ୍ଟ୍ରୀୟ ସଂସ୍କୃତ ସଂସ୍ଥାନ ଅଧିନ ସୋମେୟା ସଂସ୍କୃତ ବିଦ୍ୟାପୀଠ ମୁମ୍ବାଇରେ ୭୯ଜଣ ଛାତ୍ରୀଛାତ୍ର ବିଇଡି କରୁଛନ୍ତି। ସେଠାରେ ସେମାନେ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ପାଣି ଓ ଗ୍ୟାସ୍ ନ ଥିବାରୁ ଭୋକରେ କାଳାତିପାତ କରୁଛନ୍ତି। ସେମାନଙ୍କୁ ଓଡ଼ିଶା ସରକାର ସହଯୋଗ ଯୋଗାଇ ଦେବାକୁ ପାଇଁ ସେମାନେ ନିବେଦନ କରିଛନ୍ତି।