ଛତ୍ରପୁର,୯ା୪(ଡି.ଏନ୍.ଏ.): ବାହାର ରାଜ୍ୟର ଶ୍ରମିକ ଓ ତାଙ୍କ ପରିବାର ସଦସ୍ୟଙ୍କୁ ଗଞ୍ଜାମ ଜିଲା ପ୍ରଶାସନ ପକ୍ଷରୁ ଅତିଥିଙ୍କ ମର୍ଯ୍ୟାଦା ଦିଆଯାଇଛି। ଏମାନଙ୍କ ରହିବା ପାଇଁ ଜିଲା ପ୍ରଶାସନ ପକ୍ଷରୁ ଅତିଥି ଟ୍ରାନ୍ଜିଟ୍ କ୍ୟାମ୍ପ ଖୋଲାଯାଇଛି। କରୋନା ଭୂତାଣୁ ସଂକ୍ରମଣରୁ ରକ୍ଷା ନିମନ୍ତେ ଜିଲାର ଛତ୍ରପୁର ବ୍ଲକ ଚମାଖଣ୍ଡି ଓଡ଼ିଶା ଆଦର୍ଶ ବିଦ୍ୟାଳୟରେ ଖୋଲାଯାଇଥିବା ଅତିଥି ଟ୍ରାନ୍ଜିଟ୍ କ୍ୟାମ୍ପରେ ତାମିଲନାଡୁ, ପଶ୍ଚିମବଙ୍ଗ, ଆନ୍ଧ୍ରପ୍ରଦେଶ ଆଦି ରାଜ୍ୟର ଶ୍ରମିକ ଓ ସେମାନଙ୍କ ପରିବାର ସଦସ୍ୟଙ୍କୁ ରଖାଯାଇଛି। ସେମାନଙ୍କ ଥଇଥାନ, ଖାଦ୍ୟପେୟର ବନ୍ଦୋବସ୍ତ, ଜରୁରୀ ଉପକରଣ ଯୋଗାଣ, ସ୍ବାସ୍ଥ୍ୟ ପରୀକ୍ଷା ଭଳି ସମସ୍ତ ବ୍ୟବସ୍ଥା ଜିଲା ପ୍ରଶାସନ ପକ୍ଷରୁ କରାଯାଇଛି। ଶିଶୁଙ୍କୁ ଖେଳ ଉପକରଣ ମଧ୍ୟ ଦିଆଯାଇଛି। ରନ୍ଧାଖାଦ୍ୟ, ପିଇବା ପାଣି, ସାବୁନ, ମାସ୍କ ଯୋଗାଇ ଦିଆଯାଇଛି। ଜିଲା ପ୍ରଶାସନ ହାତରେ ଧରାପଡ଼ିଥିବା ବାହାର ରାଜ୍ୟର ଶ୍ରମିକ ଆମର ଅତିଥି ବୋଲି ଗଞ୍ଜାମ ଜିଲାପାଳ ବିଜୟ ଅମୃତା କହିଛନ୍ତି।