ଅନୁଗୋଳ ଅଫିସ, ୨୬।୨ – ଆଉ କାଗଜକଲମରେ ଉପସ୍ଥାନ ଚଳିବ ନାହିଁ। ଅନୁଗୋଳ ପୌରପାଳିକା ଅଧୀନରେ କାର୍ଯ୍ୟ କରୁଥିବା ସଫେଇ କର୍ମଚାରୀମାନଙ୍କ ଉପସ୍ଥାନ ଏଣିକି ବାୟୋମେଟ୍ରିକ୍ ପଦ୍ଧତିରେ ନିଆଯିବ। ଆସନ୍ତା ମାର୍ଚ୍ଚ ୧ ତାରିଖରୁ ପୌର ପ୍ରଶାସନ ଏହି ନିୟମ ଲାଗୁ କରିବ ବୋଲି ପୌର କର୍ତ୍ତୃପକ୍ଷ ସୂଚନା ଦେଇଛନ୍ତି।
ମିଳିଥିବା ସୂଚନା ଅନୁଯାୟୀ, ଏହି ବ୍ୟବସ୍ଥା କାର୍ଯ୍ୟକାରୀ ହେଲେ ପୌରପାଳିକାର ସଫେଇ କର୍ମଚାରୀ ଆଉ ଉପସ୍ଥାନକୁ ନେଇ ଠକି ପାରିବେ ନାହିଁ। ଠିକ୍ ଭାବେ ଉପସ୍ଥାନ ରହିଲେ ସେହି ଅନୁଯାୟୀ ଦରମା ମିଳିବ। ଏ ନେଇ କାହା ନିକଟରେ ଅଭିଯୋଗ କଲେ ମଧ୍ୟ ଶୁଣାଯିବ ନାହିଁ। ପୂର୍ବରୁ ସଫେଇ କର୍ମଚାରୀମାନେ ପୌର କର୍ତ୍ତୃପକ୍ଷଙ୍କୁ ଭୁଆଁ ବୁଲାଇ ଏଣେ ତେଣେ ବୁଲୁଥିବା ଅଭିଯୋଗ ହେଉଥିଲା। ସକାଳୁ ଆସୁଥିଲେ ମଧ୍ୟ କିଏ କେଉଁ ଆଡ଼େ ଯାଉଥିଲା କାହା ପାଖରେ ସୂଚନା ରହୁ ନ ଥିଲା। କିନ୍ତୁ ଏବେ ବାୟୋମେଟ୍ରିକ୍ ଉପସ୍ଥାନ ଦ୍ୱାରା ସେମାନଙ୍କ ଉପରେ ନଜର ରଖାଯାଇ ପାରିବ।