ଭଣ୍ଡାରିପୋଖରୀ,୧୮।୧୨(ଡି.ଏନ.ଏ.): ଭଣ୍ଡାରିପୋଖରୀ ବ୍ଲକ ଜଗନ୍ନାଥପ୍ରସାଦ ନୋଡାଲ ଉଚ୍ଚ ବିଦ୍ୟାଳୟରେ ଜଣେ ଶିକ୍ଷକଙ୍କ ଡେପୁଟେଶନ ବାତିଲ ଦାବିରେ ଗତ ଶନିବାରଠାରୁ ୫ ଦିନ ଧରି ତାଲା ପଡ଼ି ରହିଥିଲା। ଅଭିଭାବକ, ସ୍କୁଲ କମିଟି ସଦସ୍ୟ ଓ ଛାତ୍ରୀଛାତ୍ର ଜିଦ୍ରେ ଅଟଳ ରହି ଧାରଣା ଜାରି ରଖିଥିଲେ। ଶିକ୍ଷା ବିଭାଗ ସେମାନଙ୍କ ଦାବିକୁ ମାନି ନେବାରୁ ପଞ୍ଚମ ଦିନରେ ବୁଧବାର ସମସ୍ୟାର ସମାଧାନ ହୋଇଛି। ବିଇଓଙ୍କ ହସ୍ତକ୍ଷେପ ପରେ ଧାରଣା ପ୍ରତ୍ୟାହୃତ ହୋଇଥିବାବେଳେ ଗୁରୁବାରଠାରୁ ସ୍କୁଲ ସ୍ବାଭାବିକ ହେବ ବୋଲି ସୂଚନା ମିଳିଛି।
ଏହି ବିଦ୍ୟାଳୟର ଶିକ୍ଷକ ପ୍ରତାପ କୁମାର ମହାଳିକଙ୍କୁ ଡେପୁଟେଶନରେ ନିକଟସ୍ଥ କୋରକରା ନୋଡାଲ ଉଚ୍ଚ ବିଦ୍ୟାଳୟକୁ ଗତ ୧୩ ତାରିଖରେ ପଠାଯାଇଥିବାରୁ ୧୪ ତାରିଖରୁ ଅଭିଭାବକମାନେ ଜାଣି ବିଦ୍ୟାଳୟରେ ତାଲା ପକାଇ ଧାରଣା ଦେଇଥିଲେ। ୫ ଦିନ ଧରି ବିଦ୍ୟାଳୟରେ ତାଲା ପଡ଼ି ବନ୍ଦ ରହିବାରୁ ଜନସାଧାରଣଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ଡେପୁଟେଶନରେ ନିଆଯାଇଥିବା ଶିକ୍ଷକଙ୍କୁ ପୁଣି ଏହି ବିଦ୍ୟାଳୟକୁ ଅଣାଯାଉ ବୋଲି ଧାରଣାକାରୀ ଦାବି କରିଥିଲେ। ବିଇଓ ଦୀପକ କୁମାର ପାଢୀ ଓ ସ୍ଥାନୀୟ ପରମାନନ୍ଦପୁର ଶିକ୍ଷା ସଂଯୋଜକ ଉମାକାନ୍ତ ସାହୁ ବୁଧବାର ଅପରାହ୍ନ ପ୍ରାୟ ଗୋଟାଏରେ ଉକ୍ତ ବିଦ୍ୟାଳୟରେ ପହଞ୍ଚି ଧାରଣାକାରୀଙ୍କ ସହ ଆଲୋଚନା କରିଥିଲେ। ଧାରଣାକାରୀ ଜିଦ୍ରେ ଅଟଳ ରହିବାରୁ ସେମାନେ ଛାତ୍ରୀଛାତ୍ରଙ୍କ ପାଠପଢ଼ାକୁ ଆଖି ଆଖରେ ରଖି ଦାବି ମାନି ନେଇଥିଲେ। ଗୁରୁବାର ଅନ୍ୟ ଜଣେ ଶିକ୍ଷକଙ୍କୁ ଡେପୁଟେଶନରେ କୋରକରା ବିଦ୍ୟାଳୟକୁ ପଠାଇବେ ଏବଂ ଶିକ୍ଷକ ପ୍ରତାପ ମହାଳିକ ଗୁରୁବାର ଏଠାରେ ଯୋଗଦେବେ ବୋଲି ବିଇଓ ପ୍ରତିଶ୍ରୁତି ଦେଇଥିଲେ।