ଭଦ୍ରକ ଅଫିସ, ୩।୧୦- ବିଏସ୍ଏନ୍ଏଲ୍ ଭଦ୍ରକ ଶାଖା ଅଧୀନରେ କାର୍ଯ୍ୟରତ ପ୍ରାୟ ୫୦ ଠିକା କର୍ମଚାରୀ ଗତ ୧ ତାରିଖଠାରୁ ଆରମ୍ଭ କରିଥିବା କାର୍ଯ୍ୟବନ୍ଦ ଆନ୍ଦୋଳନ ଜାରି ରହିଛି। ସେମାନେ ବନ୍ତ ଛକ ନିକଟସ୍ଥ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି। ସେମାନଙ୍କୁ ୯ ମାସର ବକେୟା ଦରମା ଠିକାଦାର ପ୍ରଦାନ କରି ନ ଥିବା ଓ ମାସରେ ୨୬ ଦିନ ବଦଳରେ ୧୬ ଦିନ କାମ କରିବାକୁ ନିର୍ଦ୍ଦେଶ ଦେଇଥିବାରୁ କର୍ମଚାରୀଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି। ମାସରେ ୧୬ ଦିନ କାର୍ଯ୍ୟ କରି ଅନ୍ୟ ଦିନଗୁଡ଼ିକରେ ସେମାନେ କାମ ନ ପାଇ ପାରିଶ୍ରମିକ ପାଇବେ ନାହିଁ ବୋଲି ଅଭିଯୋଗ କରିଛନ୍ତି। ଏହାର ପ୍ରତିବାଦରେ ସେମାନେ ଆନ୍ଦୋଳନ କରିଥିବା ପ୍ରକାଶ କରିଛନ୍ତି। କର୍ମଚାରୀ ଜୟନ୍ତ କୁମାର ସେଠୀ, ଶରତ କୁମାର ନାୟକ, ଅକ୍ଷୟ ନାୟକ, ପ୍ରଦୀପ ବାରିକ, ନିର୍ମଳ ପାଢୀ, ସୁଶାନ୍ତ ମିଶ୍ର, ରମାକାନ୍ତ ରାଉତ, ମହେନ୍ଦ୍ର ସୂତାର, ଅଭିମନ୍ୟୁ ବେହେରା ପ୍ରମୁଖ ଆନ୍ଦୋଳନରେ ସାମିଲ ହୋଇଛନ୍ତି। ସୂଚନା ଥାଉକ, ଭଦ୍ରକ ଜିଲାରେ ପ୍ରାୟ ୪ ହଜାର ଟେଲିଫୋନ ଗ୍ରାହକ ଥିବାବେଳେ ଏହି କର୍ମଚାରୀଙ୍କ ଆନ୍ଦୋଳନ କାରଣରୁ ଖରାପ ଥିବା ଟେଲିଫୋନ ଓ ବ୍ରଡବ୍ୟାଣ୍ଡ ହିତାଧିକାରୀ ନାନା ସମସ୍ୟା ଭୋଗୁଛନ୍ତି।