ଜୟପୁର,୧୪ା୮(ନି.ପ୍ର./ଡି.ଏନ୍.ଏ.): ବିଶାଖପାଟଣା-କିରଣ୍ଡୁଲ ଏକ୍ସପ୍ରେସ୍ରୁ ମଙ୍ଗଳବାର ଇନସାସ୍ ରାଇଫଲର ୬୦ ରାଉଣ୍ଡ ଗୁଳି (୩ଟି ମାଗାଜିନ) ଏବଂ ଗୋଟିଏ ୟୁନିଫର୍ମ ବେଲ୍ଟ ଉଦ୍ଧାର କରିଛି କୋରାପୁଟ ଜିଲା ଜୟପୁର ଆରପିଏଫ୍। ବିଏସ୍ଏଫ୍ର ଜଣେ ଏଏସ୍ଆଇ ଏହି ଟ୍ରେନ୍ରେ ଯିବାବେଳେ ନିଜ ସିଟ୍ରେ ଉପରୋକ୍ତ ସାମଗ୍ରୀ ଛାଡ଼ିଦେଇଥିବା ଜଣାପଡ଼ିଛି। ସୂଚନା ଅନୁଯାୟୀ, ମଙ୍ଗଳବାର ଭୋର ୫ଟା ସମୟରେ ବିଶାଖପାଟଣା-କିରଣ୍ଡୁଲ ଏକ୍ସପ୍ରେସ୍ରେ ବିଏସ୍ଏଫ୍ର କେତେ ଜଣ ଯବାନ କୋରାପୁଟ ଆସିଥିଲେ। ଭୋରବେଳେ ସେମାନେ କୋରାପୁଟରେ ଓହ୍ଲାଇଥିଲେ। ସେମାନଙ୍କ ମଧ୍ୟରୁ ଏଏସ୍ଆଇ ବଚନ ପାଣ୍ଡେ ଶୋଇଥିବା ବର୍ଥରେ ନିଜ ୟୁନିଫର୍ମ ବେଲ୍ଟ ଓ ଏହାର ମୁଣାରେ ଥିବା ଇନସାସ୍ ରାଇଫଲର ୩ଟି ମାଗାଜିନ୍ ଛାଡ଼ିଦେଇଥିଲେ। ସେଥିରେ ୬୦ ରାଉଣ୍ଡ ଜୀବନ୍ତ ଗୁଳି ରହିଥିଲା। ପାଣ୍ଡେ ଏହା ଜାଣିବା ପରେ ତୁରନ୍ତ କୋରାପୁଟ ଆରପିଏଫ୍ ଥାନାକୁ ଜଣାଇଥିଲେ। ସେଠାରୁ ଜୟପୁର ଥାନା ଓ ଟ୍ରେନରେ ସୁରକ୍ଷା ଦାୟିତ୍ୱରେ ଥିବା ଜଣେ ଆରପିଏଫ୍ କନଷ୍ଟେବଳ ପ୍ରଦୀପ କୁମାରଙ୍କୁ ଏନେଇ ସୂଚନା ଦିଆଯାଇଥିଲା। ଟ୍ରେନ୍ର ସୁରକ୍ଷାକର୍ମୀ ତୁରନ୍ତ ଉକ୍ତ ବଗିରେ ପହଞ୍ଚତ୍ ବର୍ଥରୁ ଯବାନ ଛାଡ଼ିଥିବା ସାମଗ୍ରୀ ଉଦ୍ଧାର କରିଥିଲେ।