ସମ୍ବଲପୁର,୧୭ା୪(ବ୍ୟୁରୋ)-ଜିଲା ସଦରଡାକ୍ତରଖାନାରେ କୋଭିଡ-୧୯ ମେଡିକାଲ ନିର୍ମାଣ କାମ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି । ରୋଗୀମାନଙ୍କୁ ବୁର୍ଲା ସ୍ଥାନାନ୍ତରିତ କରାଯାଇଛି । ଜିଲା ସଦର ଡାକ୍ତରଖାନା ଉପରେ ନିର୍ଭର କରୁଥିବା ରୋଗୀମାନଙ୍କ କୌଣସି ସମସ୍ୟା ହେବ ନାହିଁ । ବିକଳ୍ପ ସ୍ଥାନରେ ନିରନ୍ତର ସ୍ବାସ୍ଥ୍ୟସେବା ପୂର୍ବଭଳି ଯୋଗାଇ ଦିଆଯିବ ବୋଲି ଜିଲାପାଳ ସମ୍ମିଳନୀ କକ୍ଷରେ ଆୟୋଜିତ ଖବରଦାତା ସମ୍ମିଳନୀରେ ପ୍ରଶାସନିକ ଅଧିକାରୀମାନେ କହିଛନ୍ତି ।
ଏଡିଏମ୍ ସୂର୍ଯ୍ୟନାରାୟଣ ଦାସ, ପିଡି ସୁକାନ୍ତ ତ୍ରିପାଠୀ, ସିଡିଏମ୍ଓ ଶଶୀ ଭୂଷଣ ପଟେଲ, ଜିଲା ସୂଚନା ଓ ଲୋକ ସମ୍ପର୍କ ଭାରପ୍ରାପ୍ତ ଅଧିକାରୀ ନନ୍ଦିନୀ ମୁଣ୍ଡାରୀ ଏ ନେଇ ସୂଚନା ଦେବା ସହ କହିଛନ୍ତି, ଜିଲା ସଦର ଡାକ୍ତରଖାନା ବିକଳ୍ପ ଭାବେ ଅଇଁଠାପାଲି ଓ ଜନାର୍ଦ୍ଦନ ପୁଜାରୀ ମାତୃମଙ୍ଗଳ କେନ୍ଦ୍ରରେ ୨୪ ଘଣ୍ଟିଆ ସେବା ଯୋଗାଇ ଦିଆଯିବ । ଧନୁପାଲି, କ୍ଷେତରାଜପୁର, ଧନକଉଡା ସହରାଞ୍ଚଳ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ୧୨ଘଣ୍ଟା ଖୋଲା ରହିବ। ଗୁରୁତର ରୋଗୀମାନଙ୍କୁ ବୁର୍ଲା ଭୀମସାର ନେବାକୁ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ବୁର୍ଲାରେ ଏବେ ରୋଗୀ ସଂଖ୍ୟା ମଧ୍ୟ ହ୍ରାସ ପାଇଛି ା ତେଣୁ ସେଠାରେ କୌଣସି ସମସ୍ୟା ହେବ ନାହିଁ। ଜିଲାରେ ରୋଗୀ ସେବାରେ ସମସ୍ୟା ନ ହେବ ପାଇଁ ଗ୍ରାମଞ୍ଚଳ ଓ ସହରାଞ୍ଚଳରେ ବ୍ୟବସ୍ଥା କରାଯାଇଛି। କରୋନା ସଂକ୍ରମଣ ଭୟ ଥିବା ପର୍ଯ୍ୟନ୍ତ ସଦର ମେଡିକାଲରେ କୋଭିଡ-୧୯ ମେଡିକାଲ ରହିବ। ବୁର୍ଲା ଭୀମସାରର ଡାକ୍ତରୀ ଟିମ୍, ନର୍ସ ଓ ଅନ୍ୟକର୍ମଚାରୀ ଆବଶ୍ୟକ ସଂଖ୍ୟାରେ ରହିବେ ବୋଲି ବିଭାଗୀୟ ଅଧିକାରୀମାନେ ସ୍ପଷ୍ଟ କରିଛନ୍ତି । ସୂଚନାଯୋଗ୍ୟ, ଜିଲା ସଦର ଡାକ୍ତରଖାନାକୁ କୋଭିଡ-୧୯ ମେଡିକାଲ ନିର୍ମାଣ କାମ ଚାଲିଛି। ଏହାକୁ ନେଇ କେତେକ ମହଲରେ ବିରୋଧ କରାଯାଇଛି ।