କୋକସରା, ୧୩ା୧୨(ଡି.ଏନ୍.ଏ.)- ଝାର ଜଂଗଲ, ପାହାଡ଼ ପରବତ୍ ଘେରା କଳାହାଣ୍ଡି ଜିଲାରେ ଆଏଜ୍ ବି ଅନେକ ଗଁାଗଁଡ଼ାର ଲୋକ୍ ସାଧାରନ ମଉଲିକ ସୁବିଧାରୁ ବଁଚିତ୍ ହେଇ ରହିଛନ୍। ଦେଶ ସୁଆଧୀନ ହେବାର ସାତ୍ ଦଶକନୁ ଅଧ୍କା ବିତିଯାଇଥିଲେ ବି ଅନେକ ଗଁାବାସୀ ସରକାରକଁର ବିକାଶର ସୂର୍ଯ୍ୟ କିରନ୍ ଦେଖି ନାଇଁପାରି। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ କଳାହାଣ୍ଡି ଜିଲା କୋକସରା ବ୍ଲକ ଡୁଡୁକାଠେଙ୍ଗା ପଁଚେତ୍ ଅଧୀନ କଛାରପଡ଼ା ଗଁାରେ।
ସୂଚନା ଅନ୍ସାରେ କଛାରପଡ଼ା ଗଁାଟା ସାହାଜଖୋଲ ସଂରକ୍ଷିତ ଜଂଗଲ ଭିତରେ ପଁଚେତ୍ ସଦରନୁ ୪ କି.ମି. ଦୂରେ ରହିଛେ। ଇ ଗଁାରେ କୁଲ ୧୩ ପରିବାରର ୧୫୦ରୁ ଅଧ୍କା ଲୋକ ବାସ କରୁଛନ୍। ଇମାନକର ଜୀବନ୍ ଜୀବ୍କା କହେଲେ ଚାଷ୍ବାସ ଆର ଜଂଗଲ ଜାତ ଦରବ୍ ଉପରେ ନିରଭର କରୁଛନ୍। ହେଲେ ଗଁାବାସୀ ଆଏଜ୍ ବି ଫିଦିନିଅଁା ରାସ୍ତା, ଅଙ୍ଗନଓ୍ବାଡି କେନ୍ଦ୍ର, ପ୍ରାଥମିକ ସ୍କୁଲ, ବିଦ୍ୟୁତ୍ ସେବାରୁ ବଁଚିତ୍ ହେଇ ରହିଛନ୍। ମଉଲିକ ସୁବିଧା ସୁଯୋଗ ଲାଗି ଗଁାବାସୀ ଭିନେ ଭିନେ ସମିଆରେ ଥାନୀଅ ସରପଁଚ୍ନୁ ମୂଲ କରି ବିଧାୟକ, ପରଶାସନିକ ଅଧ୍କାରୀକୁଁ ଗୁହାରି କରି ନିରାଶ ହେଇଥିବାର ଅଭିଯୋଗ କରିଛନ୍। ଇ ଗଁାକେ ଖରା ଆର ଶୀତ ମାସେ କେହେନ୍ସିମିତି ଯିବାର ଆଏବାର ସମ୍ଭବ ହେଉଥିଲେ ବି ବରଷା ଦିନେ ଗଁାବାସୀ ଜଲ୍ବଁଦି ଜୀବନ୍ ବିତଉଛନ୍। ଗଁାରେ କାହାରି ଦିହିପା ଖରାପ ହେଲେ, ଗରଭ୍ବତୀ ମହିଲାକୁଁ ଡାକ୍ତରଖାନା ନେବାକେ ପଡ୍ଲେ ୨ କି.ମି. ଖଟେ ବୁହି କରି ନେଲେ ଯାଇ ଗାଡ଼ିମଟର ସୁବିଧା ମିଲୁଛେ। ଗଁାରେ ୨୦ରୁ ୨୫ ଝନ୍ ପାଠ୍ପଢ଼ା ଛୁଆ ଥିଲାବେଲେ ୪ କି.ମି. ଦୂରିଆ ଜଂଗଲି ରାସ୍ତାରେ ପଢ଼ିଯିବାକେ ପଡ଼ୁଛେ। ଯେନ୍ଥିରଲାଗି ମା’ବାପ୍ ଜଂଗଲି ଜୀବ୍ଜଁତୁ ଭଏରେ ପିଲାକୁ ସ୍କୁଲ ନାଇଁ ଛାଡ଼ବାର। ଇ ବାବ୍ଦେ ଡୁଡୁକାଠେଙ୍ଗା ସରପଁଚ୍ ସବିତା ବାଣୁଆକୁଁ ପଚରାଲାରୁ ଗଁାରେ ସମସିଆ ତ ଅନେକ ରହିଛେ। ଜଂଗଲ ବିଭାଗର ଅନୁମତି ନାଇଁ ମିଲବାର ଲାଗି ରାସ୍ତାଘାଟ ତିଆର କରି ନାଇଁ ହେବାର। ବିଦ୍ୟୁତ୍ ସେବାର ଲାଗି ବିଭାଗୀୟ ଅଧ୍କାରୀକୁଁ ଜନେଇଛୁଁ। ଗଁାରେ ପିଲା କମ୍ ଥିବାର ଲାଗି ଅଙ୍ଗନଓ୍ବାଡି କି ସ୍କୁଲ ଖୁଲବାର ସମ୍ଭବ ନାଇଁ ହେବାର ବଲି ସେ କହିଥିଲେ। ସେନ୍ତା ଇ ବାବ୍ଦେ କୋକସରା ବିଡିଓ ବସନ୍ତ କୁମାର ସେଠୀକୁଁ ପଚରାଲାରୁ ସମସିଆର ସମାଧାନ ଲାଗି ନିହାତି ପଦକ୍ଷେପ ନିଆଯିବା ବଲି ସେ କହିଥିଲେ। ହେଲେ ଜଂଗଲି ଜୀବନ୍ ବିତଉଥିବାର ଗଁାବାସୀ କେଭେ ମଉଲିକ ସୁବିଧା ସୁଯୋଗ ପାଉଛନ୍ ଆର ସମାଜର ମୁଖିଆ ଧାରରେ ସାମିଲ ହେଉଛନ୍ ଦେଖ୍ବାକେ ବାକି ରହିଲା।