ନୂଆଦିଲ୍ଲୀ,୬।୮: ଉନ୍ନାଓ ବଳାତ୍କାର ପୀଡିତା ଏବେ ଦିଲ୍ଲୀସ୍ଥିତ ଅଲ୍ ଇଣ୍ଡିଆ ଇନଷ୍ଟିଚ୍ୟୁଟ ଅଫ୍ ମେଡିକାଲ୍ ସାଇନସେସ୍(ଏମ୍ସ)ର ଟ୍ରମା ସେଣ୍ଟରରେ ଚିକିତ୍ସିତ ହେଉଥିବା ବେଳେ ତାଙ୍କ ଅବସ୍ଥା ବେଳକୁ ବେଳ ବିଗିଡି ଯାଉଥିବା ଜଣାପଡିଛି। ଏବେ ସେ ଲାଇଫ୍ ସପୋର୍ଟ ସିଷ୍ଟମରେ ରହିଥିବା ମଙ୍ଗଳବାର ଏମ୍ସର ଜଣେ ସିନିୟର ଡାକ୍ତର ସୂଚନା ଦେଇଛନ୍ତି। ସୂଚନାଯୋଗ୍ୟ, ପୀଡିତାଙ୍କୁ ସୋମବାର ଉତ୍ତର ପ୍ରଦେଶରୁ ଏୟାର ଆମ୍ବୁଲାନ୍ସରେ ଦିଲ୍ଲୀ ଇନ୍ଦିରା ଗାନ୍ଧୀ ଇଣ୍ଟରନ୍ୟାଶନାଲ ଏୟାରପୋର୍ଟ ଆଣିବା ପରେ ଟ୍ରାଫିକ୍ ପୋଲିସ ପାଖାପାଖି ୧୪ କିଲୋମିଟର ରାସ୍ତାକୁ ଗ୍ରୀନ୍ କରିଡର କରି ମାତ୍ର ୧୮ ମିନିଟ୍ ମଧ୍ୟରେ ଏମ୍ସକୁ ସ୍ଥାନାନ୍ତର କରିଥିଲେ। ବିଭିନ୍ନ ବିଭାଗର ଡାକ୍ତରଙ୍କୁ ନେଇ ଏକ ଟିମ୍ ପୀଡିତାଙ୍କର ଚିକିତ୍ସା କରୁଥିବା କହିଛନ୍ତି ଟ୍ରମା ସେଣ୍ଟର ମୁଖ୍ୟ ଡା.ରାଜେଶ ମାଲହୋତ୍ରା। ହେଲେ ଏବେ ସେ ଲାଇଫ୍ ସପୋର୍ଟ ସିଷ୍ଟମରେ ଥିବାରୁ ତାଙ୍କର ସ୍ବାସ୍ଥ୍ୟାବସ୍ଥା ନେଇ କିଛି କହିହେବ ନାହିଁ ବୋଲି ସେ କହିଛନ୍ତି। ସୂଚନାଯୋଗ୍ୟ, ଗତମାସ ଶେଷ ସପ୍ତାହରେ ଉନ୍ନାଓ ବଳାତ୍କାର ପୀଡିତା ଓ ତାଙ୍କ ଓକିଲ ଏକ ଦୁର୍ଘଟଣାର ଶିକାର ହୋଇ ଗୁରୁତର ଅବସ୍ଥାରେ ଏବେ ଏମ୍ସରେ ଚିକିତ୍ସିତ ହେଉଛନ୍ତି।