ଝାରସୁଗୁଡା ଅଫିସ,୫।୪- କରୋନା ଭୁତାଣୁ ସଂକ୍ରମଣକୁ ରୋକିବା ପାଇଁ ସମଗ୍ର ଦେଶରେ ଲକଡାଉନ କଟକଣା ପାଳନ କରାଯାଉଛି। ଏହାକୁ ପାଳନ କରିବା ପାଇଁ ପୋଲିସ ଓ ଜିଲା ପ୍ରଶାସନର ଅଧିକାରୀମାନେ ନିୟୋଜିତ ଅଛନ୍ତି। ତେବେ କିଛିଦିନ ହେବ ଝାରସୁଗୁଡା ସହରରେ ବିଚାରପତି ଓ ଏକଜିକ୍ୟୁଟିଭ ମାଜିଷ୍ଟ୍ରେଟ ଦାୟିତ୍ୱରେ ଥିବା ପ୍ରଶାସନିକ ଅଧିକାରୀ ଏବଂ ପୋଲିସ ଅଧିକାରୀମାନଙ୍କ ମଧ୍ୟରେ ଯୁକ୍ତିତର୍କ ହେଉଥିବା ଘଟଣା ନଜରକୁ ଆସିଛି। ଲକଡାଉନ ବେଳେ ରାସ୍ତାରେ ଯିବା ଆସିବା କରୁଥିବା ବିଚାରପତିମାନଙ୍କୁ ପୋଲିସ ପକ୍ଷରୁ ଛଡା ଯାଉ ନ ଥିବା ଅଭିଯୋଗ ହେଉଥିଲା। ଏଥିପାଇଁ ବିଭିନ୍ନ ସ୍ଥାନରେ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା। ଏହି ଶୀତଳ ଯୁଦ୍ଧ ରବିବାର ଉଗ୍ରରୂପ ନେଇଛି । ଲାକଡାଉନ ଡ୍ୟୁଟିରେ ଥିବା ପ୍ରଶାସନିକ ଅଧିକାରୀମାନେ ପୂର୍ବାହ୍ନ ୧୧ଟାରୁ ସମୂହ କାର୍ଯ୍ୟ ବନ୍ଦ କରି ଜିଲାପାଳ ସରୋଜ କୁମାର ସାମଲଙ୍କ ଦ୍ୱାରସ୍ଥ ହୋଇଛନ୍ତି।
ସୂଚନା ମୁତାବକ ରବିବାର ଝାରସୁଗୁଡା ଜିଲାରେ କାର୍ଯ୍ୟରତ ଜଣେ ବିଚାରପତିଙ୍କ ଅଫିସ କର୍ମଚାରୀ କୌଣସି କାର୍ଯ୍ୟରେ ବସଷ୍ଟାଣ୍ଡ ଅଞ୍ଚଳକୁ ଆସିଥିଲେ। ତାଙ୍କୁ ଜଣେ ପ୍ରଶାସନିକ ଅଧିକାରୀ ଅଟକାଇ ବାହାରେ ବୁଲିବାକୁ ବାରଣ କରିଥିଲେ। ଏହା ପରେ ବିଚାରପତି ଜଣକ ସମ୍ପୃକ୍ତ ଅଧିକାରୀଙ୍କୁ କୁଅାଡେ ଫୋନ ଯୋଗେ କାଟୁ ଭାଷା ପ୍ରୟୋଗ କରିଥିଲେ। ପରେ ଲକଡାଉନ ଡ୍ୟୁଟିରେ ଥିବା ସମସ୍ତ ପ୍ରଶାସନିକ ଅଧିକାରୀମାନେ କାର୍ଯ୍ୟବନ୍ଦ କରିଥିଲେ। ପରେ ସମସ୍ତେ ଝାରସୁଗୁଡା ଉପଜିଲାପାଳଙ୍କ କାର୍ଯ୍ୟାଳୟ ପରିସରରେ ବୈଠକ କରି ଜିଲାପାଳ ସାମଲଙ୍କୁ ସାକ୍ଷାତ କରି ଅଭିଯୋଗ କରିବାକୁ ଯାଇଥିଲେ। ଜିଲାପାଳ ଅନ୍ୟ କାର୍ଯ୍ୟରେ ବ୍ୟସ୍ତ ଥିବାରୁ ଅତିରିକ୍ତ ଜିଲାପାଳ ପ୍ରଦୀପ ସାହୁଙ୍କ ସହ ଆଲୋଚନା କରିଥିଲେ। ଆଲୋଚନା ପରେ ଲକଡାଉନ କଟକଣା ପାଳନ ଜରୁରୀ ଥିବାରୁ ସମସ୍ତ ଅଧିକାରୀମାନଙ୍କୁ ଡ୍ୟୁଟି କରିବାକୁ ପରାମର୍ଶ ଦେଇଥିଲେ। ଏହି ଘଟଣା ସମ୍ପର୍କରେ ସେ ଜିଲାପାଳଙ୍କ ସହ ଆଲୋଚନା କରିଥିଲେ। ଏହାପରେ ସମସ୍ତ ଅଧିକାରୀ ଦିନ ୧୨ଟା ୩୦ ବେଳେ ଡ୍ୟୁଟିକୁ ଫେରିଥିଲେ ।