ଦଶମନ୍ତପୁର,୧୧ା୧୦(ଡି.ଏନ୍.ଏ.): ଦିନେ ସେ ଘର ଚଳାଉଥିବା ଯୁଆନ ପୁଅ ଥିଲେ। କିନ୍ତୁ ଏବେ ସକାଳ ହେଲେ ପରିବାର ଲୋକେ ତାଙ୍କୁ ଘରୁ ଟେକି ଆଣି ବାରଣ୍ଡାରେ ବସାଇ ଦେଉଛନ୍ତି। ସନ୍ଧ୍ୟାରେ ପୁଣି ଟେକି ନେଇ ଘରେ ଶୁଆଇ ଦେଉଛନ୍ତି। ୨୬ ବର୍ଷର ଏହି ଯୁବକ ରୋଗରେ ପୀଡ଼ିତ ଥାଇ ଏକ ପ୍ରକାର ଭିନ୍ନକ୍ଷମ। ଏ ହେଉଛି କୋରାପୁଟ ଜିଲା ଦଶମନ୍ତପୁର ବ୍ଲକ ପିଣ୍ଡାପଦର ପଞ୍ଚାୟତ ବରଗଛ ଗ୍ରାମରେ ରହୁଥିବା ଦିଶାରୀ ପରିବାରର ଦୁଃଖକଥା।
ବରଗଛ ଗାଁର ମାଡି ଦିଶାରୀଙ୍କ ପୁଅ ଚକ୍ର ଦିଶାରୀ (୨୬)। ପରିବାରର ଏକମାତ୍ର ରୋଜଗାରିଆ ବ୍ୟକ୍ତି ଥିବା ଚକ୍ରଙ୍କ ହଠାତ୍ ହାତ, ଗୋଡ଼ ବ୍ୟଥା ବାହାରିଲା। ସେ ପ୍ରଥମେ ହେଳା କରି ରହିଯାଇଥିଲେ ହେଁ ପରେ ବାଧ୍ୟହୋଇ ତାଙ୍କୁ ଜିଲା ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହେବାକୁ ପଡ଼ିଥିଲା। କିନ୍ତୁ ଯନ୍ତ୍ରଣା ନ କମିବାରୁ ତାଙ୍କୁ ଘରକୁ ଫେରାଇ ଆଣିଲୁ ବୋଲି ତାଙ୍କ ମା’ ଓ ସ୍ତ୍ରୀ କହିଛନ୍ତି। ଏବେ ଚକ୍ର ଘରେ ଶଯ୍ୟାଶାୟୀ ଅବସ୍ଥାରେ ରହିଛନ୍ତି। ଚଲାବୁଲା ତ ଦୂରର କଥା, ଚକ୍ର ଯେଉଁଠି ସେଇଠି ଝାଡ଼ା ପରିସ୍ରା କରୁଛନ୍ତି। ସ୍ତ୍ରୀ ଓ ମା’ ତାଙ୍କର ସେବା କରୁଛନ୍ତି। ଧୀରେଧୀରେ ଚକ୍ରଙ୍କ ଖାଇବା ଆଉ ପିଇବା ମଧ୍ୟ କମିବାରେ ଲାଗୁଛି। ତାଙ୍କ ଦେହ ଦୁର୍ବଳ ହେଉଥିବା ଦେଖି ପରିବାର ଲୋକେ ଭାଙ୍ଗିପଡ଼ିଲେଣି। ଘର ଚଳାଉଥିବା ପୁଅର ଏଭଳି ଅବସ୍ଥା ଦେଖି ଆଉ ବଞ୍ଚତ୍ବାକୁ ଇଚ୍ଛା ଲାଗୁନାହିଁ ବୋଲି ଚକ୍ରଙ୍କ ମା’ ଅତି ଦୁଃଖର ସହ କହିଥିଲେ। ଅର୍ଥ ଅଭାବ ଯୋଗୁ ଘରଲୋକେ ଅଧିକ ଚିକିତ୍ସା ପାଇଁ ସାହସ କରିପାରୁ ନାହାନ୍ତି। ପ୍ରଶାସନ ଏ ଦିଗରେ ଚିକିତ୍ସା ବ୍ୟବସ୍ଥା ଓ ସହାୟତା ଦେବା ପାଇଁ ଚକ୍ରଙ୍କ ମା’ ଓ ସ୍ତ୍ରୀ ନିବେଦନ କରିଛନ୍ତି।