ଧର୍ମଶାଳା/ଜେନାପୁର,୧୨।୮(ଡି.ଏନ୍.ଏ.): ଯାଜପୁର ଜିଲା ଧର୍ମଶାଳା ତହସିଲ ଅଧୀନସ୍ଥ ବିଛାଖଣ୍ଡି ଜଙ୍ଗଲ ଜମିରେ ଥିବା ବେଆଇନ ପଥର ଖାଦାନ ଉପରେ ଧର୍ମଶାଳା ତହସିଲ ପକ୍ଷରୁ ମାରାଥନ ଚଢାଉ କରାଯାଇଛି। ଶନିବାର ଚଢାଉବେଳେ ଏକ ହିଟାଚି ମେଶିନ, ହାଇଓା୍ବ ଓ କ୍ରମ୍ପେସର ଜବତ କରାଯାଇଥିଲା। ଏହି ସମୟରେ ପଥର ମାଫିଆମାନେ ପହଞ୍ଚତ୍ ଅତିରିକ୍ତ ତହସିଲଦାରଙ୍କୁ ଗାଳିଗୁଲଜ କରିବା ସହ ମାଡ଼ ମାରି ଜବତ କମ୍ପ୍ରେସର ଛଡ଼ାଇ ନେଇଥିଲେ। ଏପରି କି ଅତିରିକ୍ତ ତହସିଲ୍ଦାରଙ୍କ ସହ ଯାଇଥିବା ଏପିଆର ଫୋର୍ସଙ୍କଠାରୁ ମାଫିଆମାନେ ବନ୍ଧୁକ ଛଡ଼ାଇ ନେବାକୁ ଚେଷ୍ଟା କରିଥିଲେ। ଏହି ଘଟଣାକୁ ନେଇ ଥାନାରେ କୌଣସି ମାମଲା ରୁଜୁ ହୋଇ ନ ଥିବାବେଳେ ରବିବାର ତହସିଲଦାର ସରୋଜ କୁମାର ପଣ୍ଡା ଆକଶନ ମୋଡ୍ରେ ବିଭିନ୍ନ ସ୍ଥାନରେ ଚଢାଉ କରିଛନ୍ତି। ଏହି ସମୟରେ ୩ କ୍ରଶରକୁ ସିଲ କରିଥିବାବେଳେ ୧୯ଟିକୁ ନୋଟିସ କରିଛନ୍ତି। ଏଥିସହ ମାଫିଆମାନେ ଛଡାଇ ନେଇଥିବା କମ୍ପ୍ରେସର ଓ ମହୁଲ ଖଣିଠାରେ ଏକ ଟ୍ରାକ୍ଟର ଜବତ କରି ଚଢେଇଧରା ଫାଣ୍ଡି ଜିମା ଦେଇଛନ୍ତି। ସମସ୍ତ କ୍ରଶର ମାଲିକମାନଙ୍କୁ ଓ୍ବାଇ ଫର୍ମ, ବିଦ୍ୟୁତ୍ ଯୋଗାଣ, ପରିବେଶ ମଞ୍ଜୁରୀ, କିସମ ପରିବର୍ତ୍ତନ ଆଦି ବିଭିନ୍ନ କାଗଜପତ୍ର ୭ ଦିନ ମଧ୍ୟରେ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଥିବା ଜହସିଲଦାର ସୂଚନା ଦେଇଛନ୍ତି। ମଙ୍ଗଳବାର ନୋଟିସ କରାଯାଇଥିବା କ୍ରଶରଗୁଡିକରେ ଜାଗା ମାପ କାମ କରାଯିବ। ତେବେ ଚଢାଉ ସମୟରେ କର୍ମଚାରୀ ଏବଂ ମାଲିକ ଗିରଫ ଭୟରେ ପଳାଇଥିଲେ। ଚଢାଉରେ ତହସିଲଦାରଙ୍କ ସହ ଅତିରିକ୍ତ ତହସିଲଦାର ଦେବି ପ୍ରସାଦ ମହାନ୍ତି, ଜେନାପୁର ଥାନା ଅଧିକାରୀ ସୁଶାନ୍ତ କୁମାର ଦାସ ଓ ପ୍ରଶାସନର ସମସ୍ତ କର୍ମଚାରୀ ସାମିଲ ହୋଇଥିଲେ। ସୂଚନା ଯୋଗ୍ୟ, ପୂର୍ବରୁ ଧରୀତ୍ରୀରେ ବିଛାଖଣ୍ଡି ପାହାଡ ଜଙ୍ଗଲ ଜମିରେ ବେଆଇନ କ୍ରଶର ସଂକ୍ରାନ୍ତୀୟ ସବିଶେଷ ତଥ୍ୟ ଭିତ୍ତିକ ଖବର ପ୍ରକାଶ ପାଇଥିଲ। ଏହାସହ ସାମାଜିକ କର୍ମୀ ସର୍ବେଶ୍ୱର ବେହୁରା ଧର୍ମଶାଳା ତହସିଲଦାର ଓ ଜିଲାପାଳଙ୍କୁ ବେଆଇନ କ୍ରଶର ସମ୍ପର୍କରେ ଅଭିଯୋଗ କରିଥିଲେ। ପ୍ରକାଶ ଯେ, ଏହି ତହସିଲ ଅନ୍ତର୍ଗତ ବଳରାମପୁର ସଂରକ୍ଷିତ ଜଙ୍ଗଲରେ ଏକାଧିକ ବେଆଇନ କ୍ରଶର ଓ ପଥର ଖାଦାନ ଚାଲିଛି। ଏ ସମ୍ପ୍ରକେନ୍ତରେ ଧର୍ମଶାଳା ତହସିଲଦାର ତାଙ୍କ ପତ୍ରସଂଖ୍ୟା ୯୮୯/୨୮ା୩ା୨୦୧୯ ଓ ୪୬୧/୭ା୨ା୨୦୧୯ରେ ଡିଏଫ୍ଓ(ଡିଭିଜନାଲ ଫରେଷ୍ଟ ଅଫିସର)ଙ୍କୁ ଲିଖିତ ଭାବେ ଦୃଷ୍ଟି ଆକର୍ଷଣ କରିଥିଲେ। ଏହାପରେ କଟକ ଡିଏଫ୍ଓ ପତ୍ର ସଂଖ୍ୟା ୫୧୪୬/୬ା୭ା୧୯ରେ ବଳରାମପୁର ସଂରକ୍ଷିତ ଜଙ୍ଗଲରେ ବେଆଇନ ଖାଦାନ ସମ୍ପର୍କରେ ଜିଲାପାଳଙ୍କ ହସ୍ତକ୍ଷେପ ଲୋଡିଛନ୍ତି। ହେଲେ ୩୪୬.୦୧ ହେକ୍ଟର ପରିମିତ ଏହି ଜଙ୍ଗଲରେ ଚାଲିଥିବା ବେଆଇନ ଖାଦାନ ଓ କ୍ରଶର ଉପରେ ପ୍ରଶାସନ ସ୍ତରରେ ବର୍ତ୍ତମାନ ପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ହୋଇ ପାରି ନାହଁି। ଏହି ସଂରକ୍ଷିତ ଜଙ୍ଗଲରେ ତୁରନ୍ତ ଚଢାଉ ପାଇଁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି।