ପାଲଲହଡା,୫।୬(ଡି.ଏନ.ଏ.)- ଅନୁଗୋଳ ଜିଲା ପାଲଲହଡା ବ୍ଲକ ଉପାଧ୍ୟକ୍ଷା ଲିଲି ପ୍ରଧାନ ମଙ୍ଗଳବାର ଭାଜପା ଛାଡ଼ି ବିଜେଡିରେ ସାମିଲ ହୋଇଛନ୍ତି। ପାଲଲହଡା ବିଧାୟକ ମୁକେଶ କୁମାର ପାଲଙ୍କ ଉପସ୍ଥିତିରେ ସ୍ଥାନୀୟ ମା’ କୁଣ୍ଢେଇବୀରାଙ୍କ ମନ୍ଦିର ପ୍ରାଙ୍ଗଣରେ ଏକ ମିଶ୍ରଣ ପର୍ବରେ ସେ ବିଜେଡିରେ ଯୋଗ ଦେଇଥିଲେ। ପରେ ଏକ ଶୋଭାଯାତ୍ରାରେ ବିଜେଡି କର୍ମୀଙ୍କ ସହ ସେ ବ୍ଲକ କାର୍ଯ୍ୟାଳୟରେ ପହଞ୍ଚିଥିଲେ। ସେଠାରେ ମୁକେଶ ତାଙ୍କ ନିକଟରେ ଥିବା ବ୍ଲକ ଅଧ୍ୟକ୍ଷ ଦାୟିତ୍ୱ ଉପାଧ୍ୟକ୍ଷାଙ୍କୁ ହସ୍ତାନ୍ତର କରିଥିଲେ। ସେ ବିଧାୟକ ହେବା ପରେ ବ୍ଲକ ଅଧ୍ୟକ୍ଷ ପଦବୀ ଖାଲି ପଡିଥିବାରୁ ପରବର୍ତ୍ତୀ ଅଧ୍ୟକ୍ଷ ନିର୍ବାଚନ ପର୍ଯ୍ୟନ୍ତ ଉପାଧ୍ୟକ୍ଷା ଉକ୍ତ ଦାୟିତ୍ୱ ତୁଲାଇବେ। ଉପାଧ୍ୟକ୍ଷା ପ୍ରଧାନ ଜଣେ ସୁସଙ୍ଗଠିକା ହୋଇଥିବାରୁ ସେ ଦଳରେ ମିଶିବା ପରେ ବିଜେଡି ଆହୁରି ମଜବୁତ୍ ହେବ ବୋଲି ବିଧାୟକ ପାଲ କହିଛନ୍ତି। ଏହି କାର୍ଯ୍ୟକ୍ରମରେ ବହୁ ସଂଖ୍ୟାରେ ସମିତିସଭ୍ୟଙ୍କ ସହ ବହୁ ବିଜେଡି ନେତା ଉପସ୍ଥିତ ଥିଲେ।