ବିଜେପୁର,୨୬।୪(ଡି.ଏନ୍.ଏ.): କରୋନା ମହାମାରୀକୁ ପ୍ରତିହତ କରିବା ପାଇଁ ବରଗଡ଼ ଜିଲା ପ୍ରଶାସନ ବିଜେପୁର ଏନ୍ଏସିର ହାଇସ୍କୁଲ ପଡିଆରେ ଅସ୍ଥାୟୀ ଭାବେ ବସୁଥିବା ପରିବା ମାର୍କେଟକୁ ସପ୍ତାହକୁ ତିନିଦିନ ବସାଇବାକୁ ନିର୍ଦ୍ଦେଶ ଜାରି କରିଥିଲା। ଏଣୁ ସପ୍ତାହର ବୁଧବାର, ଶୁକ୍ରବାର, ରବିବାର ପରିବା ମାର୍କେଟ ବସୁଥିଲା। ଫଳରେ ଅଞ୍ଚଳରେ ଉତ୍ପାଦିତ ପରିବାକୁ ଚାଷୀମାନେ ବିକ୍ରି କରିବାରେ ଅସୁବିଧାର ସମ୍ମୁଖୀନ ହେଉଥିଲେ। ତେଣୁ ଉକ୍ତ ପରିବା ମାର୍କେଟକୁ ସପ୍ତାହକୁ ତିନିଦିନ ପରିବର୍ତ୍ତେ ଅଧିକ ଦିନ କରିବାକୁ ଚାଷୀମାନେ ପ୍ରଶାସନ ନିକଟରେ ଦାବି କରି ଆସୁଥିଲେ। ଚାଷୀଙ୍କ ଦାବିକୁ ବିଚାର କରି ପ୍ରଶାସନ ରବିବାରରୁ ଏହି ପରିବା ମାର୍କେଟକୁ ସପ୍ତାହକୁ ତିନିଦିନ ପରିବର୍ତ୍ତେ ସୋମବାର ଓ ଗୁରୁବାର ବ୍ୟତୀତ ପାଞ୍ଚ ଦିନ ବସିବାକୁ ସ୍ଥିର କରିଛି। ଫଳରେ ଉତ୍ପାଦିତ ପରିବାକୁ ବିକ୍ରି କରିବାର ସୁଯୋଗ ପାଇଥିବାରୁ ଚାଷୀମାନଙ୍କ ମଧ୍ୟରେ ବେଶ ଉତ୍ସୁକତା ପରିଲକ୍ଷିତ ହେଉଛି।
