ବରଗଡ଼ ଅଫିସ, ୨୮।୯: ବରଗଡ଼ ଜିଲା ବିଜେପୁର ଉପନିର୍ବାଚନ ଅକ୍ଟୋବର ୨୧ ତାରିଖରେ ଅନୁଷ୍ଠିତ ହେବ। ଏଥିପାଇଁ ସବୁ ରାଜନୈତିକ ଦଳ ତତ୍ପର ହୋଇପଡିଥିବା ବେଳେ ପୋଲିସ, ପ୍ରଶାସନ ମଧ୍ୟ ପଛରେ ପଡ଼ିନାହାନ୍ତି। ନିର୍ବାଚନକୁ ଅବାଧ, ନିରପେକ୍ଷ ଓ ଶୃଙ୍ଖଳିତ କରିବା ପାଇଁ ଶନିବାର ବରଗଡ଼ ଜିଲା ପୋଲିସ ମୁଖ୍ୟାଳୟରେ ପୋଲିସ ପଦାଧିକାରୀଙ୍କ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି। ଏହି ଅବସରରେ ଉତ୍ତରାଞ୍ଚଳ ଡିଆଇଜି ହିମାଂଶୁ ଲାଲ, ୧୮୯ ସିଆର୍ପିଏଫ୍ କମାଡାଣ୍ଟ ଏସ. ମେରିଆ, ବରଗଡ଼ ଏସ୍ପି ପଦ୍ମିନୀ ସାହୁଙ୍କ ସମେତ ସୋନପୁର, ବଲାଙ୍ଗୀର, ସମ୍ବଲପୁର ଏସ୍ପି ପ୍ରମୁଖ ଯୋଗ ଦେଇଥିଲେ। ସେହିପରି ପଡୋଶୀ ଛତିଶଗଡ଼ ରାଜ୍ୟର ରାୟଗଡ଼ା ଏବଂ ମହାସମୁଦ ଏସ୍ପି ବୈଠକରେ ଯୋଗଦେଇଥିବା ଜଣାପଡ଼ିଛି। ଭୋଟରଙ୍କୁ ପ୍ରଭାବିତ କରିବା କିମ୍ବା କୌଣସି ହିଂସାକାଣ୍ଡ ଘଟାଇବା ପାଇଁ ବରଗଡ଼ ଜିଲାକୁ ଯେଭଳି ବାହ୍ୟ ଅଞ୍ଚଳରୁ ବେଆଇନ ଭାବେ ଟଙ୍କା, ମଦ, ବନ୍ଧୁକ ତଥା ଅପରାଧୀମାନେ ପଶି ପାରିବେ ନାହିଁ ସେ ଉପରେ ଆଲୋଚନା ହୋଇଥିଲା। ସେହିପରି ଉପନିର୍ବାଚନ ସମୟରେ କେଉଁ କେଉଁ ଜାଗାରେ ଯାଞ୍ଚ -ତନଖି କରାଯାଇ କେଉଁ ଅଞ୍ଚଳପ୍ରତି ନଜର ରଖାଯିବ ତା ଉପରେ ମଧ୍ୟ ଆଲୋଚନା ହୋଇଛି।
