ଭୁବନ, ୭।୨(ଡି.ଏନ.ଏ.) – ଢେଙ୍କାନାଳ ଜିଲା ଭୁବନ ଥାନା ମହୁଲପାଳ ଗ୍ରାମର ବହୁଚର୍ଚ୍ଚିତ ବିଜୟ ଓଝା (୪୩) ହତ୍ୟାକାଣ୍ଡ ମାମଲାର ପର୍ଦ୍ଦାଫାଶ ହୋଇଛି। ହତ୍ୟାକାଣ୍ଡରେ ସମ୍ପୃକ୍ତ ଅଭିଯୋଗରେ ଉକ୍ତ ଗ୍ରାମର ରଞ୍ଜନ ସାହୁ (୪୫)ଙ୍କୁ ପୋଲିସ ଗିରଫ କରିଛି। ବ୍ୟବସାୟିକ ଶତ୍ରୁତା କାରଣରୁ ବିଜୟଙ୍କ ତଣ୍ଟିଚିପି ହତ୍ୟା କରିଥିବା ରଞ୍ଜନ ସ୍ବୀକାର କରିଛନ୍ତି। ଏଥିସହ ହତ୍ୟାର ଡେମୋ ମଧ୍ୟ ଦେଖାଇଛନ୍ତି। ତାଙ୍କୁ ଗୁରୁବାର କୋର୍ଟ ଚାଲାଣ କରାଯାଇଥିବା ଥାନାଧିକାରୀ ନିର୍ମଳା ଗୋଚ୍ଛାୟତ ସୂଚନା ଦେଇଛନ୍ତି।
ବିଜୟ ଜାନୁୟାରୀ ୨୬ରେ ନିଖୋଜ ହୋଇଯାଇଥିଲେ। ଏ ନେଇ ପରିବାର ପକ୍ଷରୁ ଥାନାରେ ଅଭିଯୋଗ ହୋଇଥିଲା। ୩୦ ତାରିଖରେ ତାଙ୍କ ମୃତଦେହ କୁଣ୍ଡା ଗ୍ରାମ ନିକଟରୁ ଉଦ୍ଧାର କରାଯାଇଥିଲା। ଏ ନେଇ ନଂ. ୩୩/୨୦୨୦ରେ ମାମଲା ରୁଜୁ ହୋଇଥିଲା। ଥାନାଧିକାରୀଙ୍କ ନେତୃତ୍ୱରେ ଏକ ପୋଲିସ ଟିମ୍ ମାମଲାର ଛାନ୍ଭିନ୍ ଚଳାଇଥିଲେ। ହତ୍ୟାକାଣ୍ଡରେ ସମ୍ପୃକ୍ତ ଥିବା ସନ୍ଦେହରେ କେତେଜଣଙ୍କୁ ଉଠାଇ ଆଣି ପୋଲିସ ପଚରାଉଚୁରା କରିଥିଲା। ସେମାନଙ୍କ ମଧ୍ୟରୁ ରଞ୍ଜନ ଦେଇଥିବା ବୟାନକୁ ନେଇ ସନ୍ଦେହ ସୃଷ୍ଟି ହୋଇଥିଲା। ତାଙ୍କୁ ଜେରା କରିବା ପରେ ସେ ସବୁ ସତ ମାନିଯାଇଥିଲେ। ବିଜୟ, ରଞ୍ଜନ ମିଶି ଗୋରୁ ଏବଂ ପରିବା ବ୍ୟବସାୟ କରୁଥିଲେ।