ନର୍ଥ ସାଉଣ୍ଡ(ଆଣ୍ଟିଗୁଆ),୨୭।୭(ପି.ଟି.)- ବାମହାତୀ ସ୍ପିନର ଶାହାବାଜ ନଦିମ ଦ୍ୱିତୀୟ ଥର ୫ ଉଇକେଟ ହାତେଇବା ଯୋଗୁ ଓ୍ବେଷ୍ଟଇଣ୍ଡିଜ ଏ’ ବିପକ୍ଷ ଅନ୍ଅଫିସିଆଲ ଟେଷ୍ଟ ମ୍ୟାଚ୍ରେ ଭାରତ ଏ’ ଦଳ ବିଜୟ ଦ୍ୱାରଦେଶରେ ରହିଛି। ପ୍ରଥମ ଇନିଂସରେ ଓ୍ବେଷ୍ଟଇଣ୍ଡିଜ ୨୨୮ ରନ୍ କରିଥିବାବେଳେ ଭାରତ ଏ’ ୩୧୨ ରନ୍ କରିଥିଲା। ୮୪ ରନ୍ରେ ପଛୁଆ ଥିବା ଘରୋଇ ଦଳ ଦ୍ୱିତୀୟ ଇନିଂସ ୧୮୦ ରନ୍ରେ ଅଲଆଉଟ୍ ହୋଇଯାଇଥିଲା। ଫଳରେ ୯୭ ରନ୍ର ବିଜୟଲକ୍ଷ୍ୟ ନେଇ ଓହ୍ଲାଇଥିବା ଭାରତ ଏ’ ଦିବସ ଶେଷ ପର୍ଯ୍ୟନ୍ତ ଏକ ଉଇକେଟ ହରାଇ ୨୯ ରନ୍ କରିଛି।
ଭାରତ ଏ’ ଶନିବାର ୨୯୯/୮ରୁ ବ୍ୟାଟିଂ ଆରମ୍ଭକରି ବଳକା ଦୁଇ ଉଇକେଟରେ ଦଳୀୟ ସ୍କୋରରେ ମାତ୍ର ୧୩ ରନ୍ ଯୋଡ଼ିଥିଲା। ରିଦ୍ଦିମାନ ଶାହ(୬୬) ଅନ୍ତିମ ବ୍ୟାଟ୍ସମ୍ୟାନ ଭାବେ ଆଉଟ୍ ହୋଇଥିଲା। ୮୪ ରନ୍ ପଛୁଆ ଥାଇ ଦ୍ୱିତୀୟ ଇନିଂସ ବ୍ୟାଟିଂ ଆରମ୍ଭ କରିଥିବା ଓ୍ବେଷ୍ଟଇଣ୍ଡିଜ ଏ’ ଏକଦା ୩ ଉଇକେଟ ହରାଇ ୧୩୦ ରନ୍ କରିଥିଲା। ଏହାପରେ ଭାରତୀୟ ବୋଲର ନଦିମ ଓ ମହମ୍ମଦ ସିରାଜଙ୍କୁ କୌଣସି ବ୍ୟାଟ୍ସମ୍ୟାନ ଖେଳିପାରି ନ ଥିଲେ। ଫଳରେ ଦଳ ମାତ୍ର ୧୮୦ ରନ୍ରେ ଅଲଆଉଟ୍ ହୋଇଯାଇଥିଲା। ଘରୋଇ ଦଳ ଲାଗି ଅଧିନାୟକ ସମରା ବ୍ରୁକ୍ସ ୫୩ ଓ ରୋଷ୍ଟନ ଚେଜ ୩୨ ରନ୍ କରିଥିଲେ। ନଦିମ ୫ ଓ ମହମ୍ମଦ ସିରାଜ ୩ ଉଇକେଟ ହାତେଇଥିଲେ। ଫଳରେ ଭାରତୀୟ ଦଳ ଆଗରେ ୯୭ ରନ୍ର ବିଜୟଲକ୍ଷ୍ୟ ଧାର୍ଯ୍ୟ ହୋଇଥିଲା। ଜବାବରେ ଭାରତ ଏ’ ଦିବସ ଶେଷ ପର୍ଯ୍ୟନ୍ତ ବ୍ୟାଟିଂକରି ଏକ ଉଇକେଟ ହରାଇ ୨୯ ରନ୍ କରିଛି। ଅଭିମନ୍ୟୁ ଈଶ୍ୱରନ ୨୩ ରନ୍ କରି ଅପରାଜିତ ଅଛନ୍ତି।