ମୁମ୍ବାଇ,୨୪।୧୦: ମହାରାଷ୍ଟ୍ର ବିଧାନସଭା ନିର୍ବାଚନର ଗଣତି ପରେ ଉତ୍ସାହିତ ହୋଇ ପଡିଛି ଭାରତୀୟ ଜନତା ପାର୍ଟି(ଭାଜପା)। ବିଜୟକୁ ଦୃଷ୍ଟିରେ ରଖି ଭାଜପା ପକ୍ଷରୁ ବିଜୟ ଉତ୍ସବ ପାଳନ ପାଇଁ ପ୍ରସ୍ତୁତି ଆରମ୍ଭ ହୋଇ ଗଲାଣି। ଭାଜପା ନେତା ତଥା କର୍ମୀମାନେ ମିଠା ସହ ଫୁଲମାଳ ଅର୍ଡର ଦେଇ ସାରିଥିବା ସୂଚନା ମିଳିଛି। ମହାରାଷ୍ଟ୍ରରେ ଏଥର ଭାଜପା ଓ ଶିବସେନା ମେଣ୍ଟ ମିଶି ଭାଜପା କାର୍ଯ୍ୟାଳୟରେ ଲଡୁ ପ୍ରସ୍ତୁତ କରିଥିବା ସୂଚନା ମିଳିଛି। ତେବେ ଫଳାଫଳ ଘୋଷଣା ହେବା ପୂର୍ବରୁ ଏକ୍ଜିଟ୍ ପୋଲ୍ ଭାଜପା-ଶିବସେନା ମେଣ୍ଟ ମହାରାଷ୍ଟ୍ରରେ ସରକାର ଗଠନ କରିବ ବୋଲି ପୂର୍ବାନୁମାନ କରିଥିବା ବେଳେ ଏବେ ଏମାନେ ଆଉ ଟିକେ ଉତ୍ସାହିତ ହୋଇପଡି ପ୍ରସ୍ତୁତି ଆରମ୍ଭ କରିଦେଇଥିବା ଦେଖାଯାଇଛି। ସୂଚନାଯୋଗ୍ୟ, ସକାଳ ୧୦ଟା ସୁଦ୍ଧା ମହାରାଷ୍ଟ୍ରରେ ଭାଜପା ୯୯ ଆସନରେ ଆଗୁଆ ଥିବା ବେଳେ ଶିବସେନା ୬୦, ଏନ୍ସିପି ୪୮ ଓ କଂଗ୍ରେସ ୪୦ ଆସନରେ ଆଗରେ ରହିଛି।