ଭୁବନେଶ୍ୱର,୨୭।୧୨(ବ୍ୟୁରୋ): ରାଜଧାନୀରେ ଥିବା ମଲ୍, ସିନେମା ହଲ୍, ଆପାର୍ଟମେଣ୍ଟ ଓ ବ୍ୟବସାୟିକ ପ୍ରତିଷ୍ଠାନ ପାର୍କିଂ ଫି ଆଦାୟ କରିପାରିବେ ନାହିଁ। ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ)ର ଏହି କଡ଼ା ନିର୍ଦ୍ଦେଶ ଓ କାର୍ଯ୍ୟାନୁଷ୍ଠାନ ପରେ କିଛିଦିନ ପର୍ଯ୍ୟନ୍ତ ପାର୍କିଂ ଫି ଆଦାୟ ବନ୍ଦ ହୋଇଥିଲା। ହେଲେ ଏବେ ବିଡିଏର ନିର୍ଦ୍ଦେଶନାମାକୁ ଚ୍ୟାଲେଞ୍ଜ କରିଛନ୍ତି ମଲ୍ ମାଲିକ। ହାଇକୋର୍ଟ ଅର୍ଡର ଦେଖାଇ ପୁଣି ପାର୍କିଂ ଫି ଆଦାୟ ଆରମ୍ଭ କରିଛନ୍ତି। ଗୁରୁବାର ସ୍ଥାନୀୟ ଏସ୍ପ୍ଲାନେଡ୍ ମଲ ଓ ଶହୀଦ ନଗର ବିଏମ୍ସି ଭବାନୀ ମଲ୍ରେ ପାର୍କିଂ ଫି ଆଦାୟ ହେଉଥିବା ଦେଖିବାକୁ ମିଳିଥିଲା। ତେବେ କେଉଁ ପରିସ୍ଥିତିରେ ହାଇକୋର୍ଟ ବିଡିଏର ନିର୍ଦ୍ଦେଶନାମା ଉପରେ ସ୍ଥଗିତାଦେଶ ଜାରି କଲେ ଓ ପାର୍କିଂ ଫି ଆଦାୟ କରିବା ପାଇଁ ଅନୁମତି ଦେଲେ ତାହାର ତର୍ଜମା କରାଯାଉଛି। ଆଇନ ଅନୁସାରେ ମାମଲା ଲଢ଼ିବୁ ବୋଲି କହିଛନ୍ତି ବିଡିଏ ଉପାଧ୍ୟକ୍ଷ ପ୍ରେମଚନ୍ଦ୍ର ଚୌଧାରୀ। ସେ କହିଛନ୍ତି, ମଲ୍ରେ ପୁଣି ପାର୍କିଂ ଫି ନିଆଯାଉଥିବା ନଜରକୁ ଆସିବା ପରେ ସମ୍ପୃକ୍ତ ମଲ୍ ମାଲିକଙ୍କ ସହ ଯୋଗାଯୋଗ କରାଯାଇଥିଲା। ହେଲେ ସେମାନେ ହାଇକୋର୍ଟଙ୍କ ଏକ ଅର୍ଡର ବିଡିଏକୁ ଦେଖାଇଥିଲେ। ହାଇକୋର୍ଟଙ୍କ ଅର୍ଡରକୁ ସମ୍ମାନ ଜଣାଉଛୁ। ଆଗାମୀ ଦିନରେ ଆମେ ହାଇକୋର୍ଟଙ୍କ ଦ୍ୱାରସ୍ଥ ହେବୁ ବୋଲି ସେ ପ୍ରକାଶ କରିଛନ୍ତି। ବିଡିଏ ପ୍ଲାନିଂ ମେମ୍ବର ଗୌରୀ ଶଙ୍କର ଭୂୟାଁ କହିଛନ୍ତି, କୌଣସି ମଲ୍ କିମ୍ବା ବ୍ୟବସାୟିକ ପ୍ରତିଷ୍ଠାନ ତଥା ମେଡ଼ିକାଲର ପାର୍କିଂ ଆଦାୟ କରିବାର କ୍ଷମତା ନାହିଁ। ମାଗଣା ପାର୍କିଂ ଯୋଗାଇ ଦେବାକୁ ସେମାନେ ବାଧ୍ୟ ବୋଲି ସେ କହିଛନ୍ତି।
ଉଲ୍ଲେଖଯୋଗ୍ୟ, ପାର୍କିଂ ଫି ଆଦାୟ ବନ୍ଦ ପାଇଁ ଅକ୍ଟୋବର ୧୪ରେ ବିଡିଏ ନୋଟିସ କରିଥିଲା। ବିଡିଏ ଦ୍ୱାରା ଅନୁମୋଦିତ ବିଲ୍ଡିଂ ପ୍ଲାନ୍ରେ ରହିଥିବା ପାର୍କିଂସ୍ଥଳକୁ ଅନ୍ୟ ଉଦ୍ଦେଶ୍ୟରେ ବ୍ୟବହାର କରାଯାଉଥିବାରୁ ଲୋକେ ବାହାରେ ରାସ୍ତା ଉପରେ ଗାଡ଼ି ରଖୁଥିବାରୁ ଟ୍ରାଫିକ ସମସ୍ୟା ସୃଷ୍ଟି ହେଉଛି। ଏହାକୁ ବିଡିଏ ଗୁରୁତ୍ୱର ସହ ଗ୍ରହଣ କରିବା ସହ କଡା ଆଭିମୁଖ୍ୟ ଗ୍ରହଣ କରିଥିଲା।