ନୂଆଦିଲ୍ଲୀ,୨୯।୫: ଆର୍ଥତ୍କ ବର୍ଷ ୨୦୧୯-୨୦ର ବିତ୍ତୀୟ ନିଅଣ୍ଟ( ସରକାରଙ୍କ ରାଜସ୍ବ ଏବଂ ଖର୍ଚ୍ଚ ମଧ୍ୟରେ ଥିବା ଦୂରତ୍ୱ) ଦେଶର ମୋଟ ଘରୋଇ ଉତ୍ପାଦ(ଜିଡିପି) ତୁଳନାରେ ୪.୬% ଛୁଇଁଛି। ରାଜକୋଷକୁ ଆକଳନ ଅନୁସାରେ ରାଜସ୍ବ ଆସୁ ନ ଥିବାରୁ ଏଭଳି ସ୍ଥିତି ଉପୁଜିଛି। ପରିବର୍ତ୍ତିତ ବିତ୍ତୀୟ ନିଅଣ୍ଟ ୩.୮% ରହିବ ବୋଲି ଆକଳନ କରାଯାଇଥିଲା। ହେଲେ ଏହା ଧାର୍ଯ୍ୟ ଲକ୍ଷ୍ୟ ଟପି ୪.୨% ଛୁଇଁଥିବା ଜଣାପଡିଛି। କଣ୍ଟ୍ରୋଲର ଜେନେରାଲ ଅଫ୍ ଆକାଉଣ୍ଟସ(ସିଜିଏ) ରିପୋର୍ଟ ମୁତାବକ ୨୦୧୯-୨୦ର ବିତ୍ତୀୟ ନିଅଣ୍ଟ ୪.୫୯% ରହିବ ବୋଲି କୁହାଯାଇଛି। ଏହି ସମୟରେ ରାଜସ୍ବ ନିଅଣ୍ଟ ୩.୨୭% ରହିଛି। ଏହି ସମୟରେ ଇଫେକ୍ଟିଭ ରେଭେନ୍ୟୁ ଡେଫିସିଟ୍ ୨.୩୬% ରହିବ।
ଫେବୃୟାରୀରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ଘୋଷଣା କରିଥିବା ବଜେଟରେ ବିତ୍ତୀୟ ନିଅଣ୍ଟ ୩.୮% ରହିବ ବୋଲି ଧାର୍ଯ୍ୟ କରାଯାଇଥିଲା। ପ୍ରକୃତ ପକ୍ଷେ ଏହା ବଜେଟ ଧାର୍ଯ୍ୟ ଲକ୍ଷ୍ୟର ୩.୩% ଠାରୁ ଉଚ୍ଚରେ ରହିଥିଲା। ଲଗାତର ଭାବେ ସରକାରଙ୍କ ରାଜସ୍ବ ଖସୁଥିବାରୁ ବିତ୍ତୀୟ ନିଅଣ୍ଟ ବଢୁଥିବା ଜଣାପଡିଛି। ୧୯.୩୧ ଲକ୍ଷ କୋଟି ଟଙ୍କାର ରାଜସ୍ବ ମିଳିବା ନେଇ ସରକାର ଲକ୍ଷ୍ୟ ରଖିଥିଲେ। ହେଲେ ସରକାରଙ୍କୁ ୧୭.୫ ଲକ୍ଷ କୋଟି ଟଙ୍କାର ରାଜସ୍ବ ମିଳିଥିଲା। ସରକାରଙ୍କ ମୋଟ ଖର୍ଚ୍ଚ ୨୬.୮୬ ଲକ୍ଷ କୋଟି ଟଙ୍କା ରହିଛି। ଏହା ୨୬.୯୮ ଲକ୍ଷ କୋଟି ଟଙ୍କା ଛୁଇଁବ ବୋଲି ଆକଳନ କରାଯାଇଥିଲା। ୨୦୧୯-୨୦ରେ ରାଜସ୍ବ ନିଅଣ୍ଟ ମୋଟ ଜିଡିପିର ୩.୨୭% ରହିଛି। ଏହା ୨.୪% ରହିବ ବୋଲି ପୂର୍ବ ଆକଳନରେ କୁହାଯାଇଥିଲା।