ଭୁବନେଶ୍ୱର,୧୮।୩(ବ୍ୟୁରୋ): କରୋନା ସତର୍କତାମୂଳକ ପଦକ୍ଷେପସ୍ବରୂପ ରାଜ୍ୟ ସରକାରଙ୍କ ପକ୍ଷରୁ ବିଦେଶ ଫେରନ୍ତାଙ୍କ ପାଇଁ ପଞ୍ଜୀକରଣକୁ ବାଧ୍ୟତାମୂଳକ କରାଯାଇଛି। ଏହି କ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭଉଣୀ ଗୀତା ମେହେଟ୍ଟାଙ୍କ ନାମ ସରକାରୀ ପୋର୍ଟାଲରେ ବୁଧବାର ପଞ୍ଜୀକୃତ କରିଛନ୍ତି। ଏହାଛଡ଼ା ବିଦେଶରୁ ଆସୁଥିବା ସମସ୍ତଙ୍କ ପରିବାର ସଦସ୍ୟ ଓ ବନ୍ଧୁମାନଙ୍କ ବିଷୟରେ ସବିଶେଷ ତଥ୍ୟ ଦେବାକୁ ମୁଖ୍ୟମନ୍ତ୍ରୀ ଟୁଇଟ୍ ଯୋଗେ ନିବେଦନ କରିଛନ୍ତି। ଏହାଦ୍ୱାରା ଓଡ଼ିଶାକୁ କରୋନା ଭୂତାଣୁରୁ ରକ୍ଷା କରିବାରେ ସାହାଯ୍ୟ କରିହେବ ବୋଲି ସେ କହିଛନ୍ତି।
ପ୍ରକାଶ ଯେ, ଯୁକ୍ତରାଷ୍ଟ୍ର ଆମେରିକାରେ ଜଗନ୍ନାଥ ମନ୍ଦିର ସମ୍ପର୍କିତ କେତେକ କାର୍ଯ୍ୟକ୍ରମରେ ଯୋଗଦେଇ ପୁରୀ ଗଜପତି ମହାରାଜା ଦିବ୍ୟସିଂହ ଦେବ ମଙ୍ଗଳବାର ସରକାରୀ ପୋର୍ଟାଲରେ ନିଜ ସହ ପରିବାର ସଦସ୍ୟଙ୍କ ପଞ୍ଜୀକରଣ କରାଇଥିଲେ। ଏହାପରେ ଗଜପତି ସପରିବାର ଭୁବନେଶ୍ୱରସ୍ଥିତ ବାସଭବନରେ ୧୪ ଦିନ ହୋମ୍ କ୍ୱାରେଣ୍ଟାଇନ୍ରେ ରହିଛନ୍ତି। ଏହି ସମୟରେ ସେ ସରକାରଙ୍କ ପକ୍ଷରୁ କରୋନା ସମ୍ପର୍କିତ ନିର୍ଦ୍ଦେଶାବଳୀର ପାଳନ କରିବେ ବୋଲି କହିଥିଲେ। ସେହିଭଳି ଆଇଏଏସ୍ ଭିନିଲ କ୍ରିଷ୍ଣା ମଧ୍ୟ ବିଦେଶରୁ ଫେରି ହୋମ କ୍ୱାରେଣ୍ଟାଇନ୍ରେ ଥିବା ଭିଡିଓ ଯୋଗେ କହିବା ସହ ସମସ୍ତଙ୍କୁ ସଚେତନ କରାଇଥିଲେ।