ନୂଆଦିଲ୍ଲୀ,୨୭ା୮: ଭାରତ ସରକାର ଜମ୍ମୁ-କଶ୍ମୀରକୁ ସ୍ବତନ୍ତ୍ର ମାନ୍ୟତା ପ୍ରଦାନ କରୁଥିବା ସମ୍ବିଧାନର ଅନୁଚ୍ଛେଦ ୩୭୦କୁ ଅଗଷ୍ଟ ୫ରେ ଉଚ୍ଛେଦ କରିଥିଲେ। ଏହା ପୂର୍ବରୁ ଶତାଧିକ ସ୍ଥାନୀୟ ନେତାଙ୍କୁ ସରକାର ଅଟକ ରଖିଥିଲେ। କଶ୍ମୀରରେ ଅବସ୍ଥା ସ୍ବାଭାବିକ ହେଉଛି ବୋଲି ସରକାର କହୁଥିବା ବେଳେ ଏବେ ମଧ୍ୟ ନେତାମାନେ ଗୃହବନ୍ଦୀ ରହିଛନ୍ତି। ୩୭୦ ଉଚ୍ଛେଦର ୨୧ ଦିନ ପରେ ବି ସୁରକ୍ଷା ଯବାନମାନେ ଉପତ୍ୟକାର ରାସ୍ତାଘାଟରେ ପଇଁତରା ମାରୁଛନ୍ତି। ବିକ୍ଷୋଭକାରୀଙ୍କୁ ଘଉଡାଇବା ପାଇଁ ପେଲେଟ ଗନ ଓ ଲୁହବୁହା ଗ୍ୟାସ୍ ଫାୟାରିଂ କରାଯାଉଛି ବୋଲି ନ୍ୟୁୟର୍କ ଟାଇମ୍ସରେ ପ୍ରକାଶ ପାଇଛି। ସର୍ବବୃହତ ଗଣତାନ୍ତ୍ରିକ ରାଷ୍ଟ୍ରରେ ଏତେ ସଂଖ୍ୟାରେ ନେତାଙ୍କୁ ଗୃହବନ୍ଦୀ କରି ରଖାଯିବା ପ୍ରଥମ ଘଟଣା। କଶ୍ମୀରରୁ ସ୍ବୟଂଶାସନ କ୍ଷମତା ପ୍ରତ୍ୟାହାର ପରେ କେବଳ ନେତା ନୁହନ୍ତି, ବଡ ବ୍ୟବସାୟୀ, ମାନବାଧିକାର କର୍ମୀ, ଶିକ୍ଷକଙ୍କ ସମେତ ପାଖାପାଖି ୨୦୦୦ ଲୋକଙ୍କୁ ଅଟକ ରଖାଯାଇଛି। ସେମାନେ ନିଜ ପରିବାର ସଦସ୍ୟ କିମ୍ବା ଓକିଲଙ୍କ ସହ ମଧ୍ୟ ଯୋଗାଯୋଗ କରିପାରୁନାହାନ୍ତି। ସେମାନେ କେଉଁଠି ଅଛନ୍ତି ତାହା ମଧ୍ୟ ଗୋପନ ରଖାଯାଇଛି। ଅଧିକାଂଶଙ୍କୁ ଅଗଷ୍ଟ ୪ ତାରିଖ ରାତିରେ ଗୃହବନ୍ଦୀ କରାଯାଇଥିଲା।