ନୂଆଦିଲ୍ଲୀ,୧୦।୫: ବିଦେଶୀ ଟି୨୦ ଲିଗ୍ରେ ଖେଳିବାକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସୁଯୋଗ ଦେଉ ବୋଲି ଦୁଇ କ୍ରିକେଟର ସୁରେଶ ରାଇନ ଓ ଇର୍ଫାନ ପଠାନ କହିଛନ୍ତି। ଯେଉଁ ଖେଳାଳିମାନେ ଜାତୀୟ ଦଳରୁ ବାଦ୍ ପଡିଛନ୍ତି ସେମାନଙ୍କୁ ବିଦେଶୀ ଟି୨୦ ଲିଗ୍ରେ ଖେଳିବାକୁ ସୁଯୋଗ ଦିଆଯିବା ଉଚିତ। ଏ ନେଇ ବିସିସିଆଇ ଓ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ମିଳିତ ଭାବେ କିଛି ଯୋଜନା ଆୟୋଜନ କରିବା ଉଚିତ୍। ଜାତୀୟ ଦଳରୁ ବାଦ୍ ପଡିଥିବାରୁ ଅତିକମ୍ରେ ଦୁଇଟି ଭିନ୍ନ ବିଦେଶୀ ଲିଗ୍ରେ ଖେଳିବା ପାଇଁ ଆମକୁ ସୁଯୋଗ ଦିଆଯିବା ଉଚିତ ବୋଲି ଏକ ଇନ୍ଷ୍ଟାଗ୍ରାମ ଲାଇଭ୍ ସେସନରେ ଯୋଗ ଦେଇ ରାଇନା କହିଛନ୍ତି। ଇର୍ଫାନ ମଧ୍ୟ ସମାନ ମନ୍ତବ୍ୟ ଦେଇଛନ୍ତି।
ବିଭିନ୍ନ ଦେଶରେ ଭିନ୍ନ ଭିନ୍ନ ମାନସିକତା ରହିଛି। ଅଷ୍ଟ୍ରେଲିଆରେ ଜଣେ ଖେଳାଳି ୨୯ ବର୍ଷରେ ପଦାର୍ପଣ କରିପାରିବ। କିନ୍ତୁ ଭାରତରେ ଜଣେ ଖେଳାଳି ୩୦ ବର୍ଷରେ କଦାପି ପଦାର୍ପଣ କରିପାରି ନାହିଁ। ତେଣୁ ଯେପର୍ଯ୍ୟନ୍ତ ଆମେ ଫିଟ୍ ଅଛୁ ଆମେ ଦେଶ ପାଇଁ ଖେଳିବାକୁ ପ୍ରସ୍ତୁତ ରହିଛୁ। ଇର୍ଫାନ ଚଳିତବର୍ଷ ଜାନୁୟାରୀରେ କ୍ରିକେଟର ସବୁ ଫର୍ମାଟରୁ ଅବସର ଘୋଷଣା କରିଛନ୍ତି। ତେଣୁ ଯେଉଁ ଖେଳାଳିମାନେ ୩୦ ବର୍ଷରେ ପଦାର୍ପଣ କରିଛନ୍ତି ଓ ଜାତୀୟ ଦଳ ପାଇଁ ଖେଳିବା ଦୌଡରେ ନାହାନ୍ତି ସେମାନଙ୍କୁ ଅତିକମ୍ରେ ବିଦେଶୀ ଟି୨୦ ଲିଗ୍ରେ ଖେଳିବାକୁ ସୁଯୋଗ ଦିଆଯାଉ ବୋଲି ଇର୍ଫାନ କହିଛନ୍ତି। ଉଲ୍ଲେଖଥାଉ କି, ବିସିସିଆଇ ଅବସର ଘୋଷଣା ନ କରିବା ପର୍ଯ୍ୟନ୍ତ ବିସିସିଆଇ ତା’ର ଖେଳାଳିଙ୍କୁ ବିଦେଶୀ ଟି୨୦ ଲିଗ୍ ଖେଳିବା ନେଇ ବାରଣ କରିଛି। ଗତବର୍ଷ ଯୁବରାଜ ସିଂ ଅବସର ଘୋଷଣା କରିଥିଲେ ଓ ତାଙ୍କୁ ଗ୍ଲୋବାଲ ଟି୨୦ ଲିଗ୍ କାନାଡାରେ ଖେଳିବାକୁ ବିସିସିଆଇ ନୋ ଅବଜେକ୍ଶନ ସାର୍ଟିଫିକେଟ ପ୍ରଦାନ କରିଥିଲା। ଏକମାତ୍ର ଭାରତୀୟ କ୍ରିକେଟର ଭାବେ ବିଦେଶୀ ଟି୨୦ ଲିଗ୍ରେ ସେ ଖେଳିବାକୁ ସୁଯୋଗ ପାଇଥିଲେ।