ଭୁବନେଶ୍ୱର,୧୭।୩(ବ୍ୟୁରୋ): କରୋନା ସଂକ୍ରମଣକୁ ରୋକିବା ଲାଗି ଅନ୍ୟ ସମସ୍ତ ବିଭାଗ ଭଳି ବ୍ୟାପକ ପ୍ରସ୍ତୁତି କରିଛି ରାଜ୍ୟ ପର୍ଯ୍ୟଟନ ବିଭାଗ। କରୋନା ଭୂତାଣୁ ସଂକ୍ରମଣରେ ଚାଇନା ପରେ ଏବେ ଇଟାଲୀ ସର୍ବାଧିକ ପ୍ରଭାବିତ ହୋଇଛି। ଏପରିସ୍ଥଳେ ଓଡ଼ିଶାରେ ଏବେ ଏକାଧିକ ଇଟାଲୀୟ ପର୍ଯ୍ୟଟକ ଚିନ୍ତା ବଢ଼ାଇଛି। ସେମାନେ ନିଜ ତଥ୍ୟ ଯେପରି ସହଜରେ ଓ ସୁବିଧାରେ ଦେଇପାରିବେ ସେଥିପାଇଁ ବିଭାଗ ପକ୍ଷରୁ ସମସ୍ତ ବ୍ୟବସ୍ଥା ଗ୍ରହଣ କରାଯାଉଛି। ପର୍ଯ୍ୟଟକଙ୍କ ଉପରେ ନଜର ରଖିବାକୁ ସମସ୍ତ ଜିଲାପାଳ, ପର୍ଯ୍ୟଟନ ଅଧିକାରୀ, ଦାୟିତ୍ୱରେ ଥିବା ବରିଷ୍ଠ ଅଧିକାରୀ ଓ ସ୍ଥାନୀୟ ପୋଲିସକୁ କଡ଼ା ଚେତାବନୀ ଦିଆଯାଇଛି। ଏନେଇ ଭିଡିଓ କନଫରେନ୍ସିଂ ମାଧ୍ୟମରେ ବିଭାଗର ବରିଷ୍ଠ ଅଧିକାରୀମାନେ ଆଲୋଚନା କରିଛନ୍ତି। ସେହିଭଳି ରାଜ୍ୟରେ ରହିଥିବା ସମସ୍ତ ବିଦେଶୀ ପର୍ଯ୍ୟଟକଙ୍କ ଏକ ଡାଟାବେସ୍ ପ୍ରସ୍ତୁତ କରିବାକୁ ବିଭାଗ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି।
ଅନ୍ୟପକ୍ଷରେ କରୋନା ଭୟାବହତା ଲାଗି ମାର୍ଚ୍ଚ ମାସରେ ପର୍ଯ୍ୟଟକଙ୍କ ଆଗମନରେ ବ୍ୟାପକ ହ୍ରାସ ଘଟିଛି। ତେଣୁ ଚଳିତ ବର୍ଷ ପର୍ଯ୍ୟଟନ ଶିଳ୍ପ ଗୁରୁତର କ୍ଷତିର ସମ୍ମୁଖୀନ ହେବ ବୋଲି ଆଶଙ୍କା ପ୍ରକାଶ ପାଇଛି। ପର୍ଯ୍ୟଟନ ବିଭାଗର ତଥ୍ୟ ଅନୁସାରେ, ଫେବୃୟାରୀ ୧ରୁ ମାର୍ଚ୍ଚ ୧୨ ମଧ୍ୟରେ ରାଜ୍ୟକୁ ପ୍ରାୟ ୫,୦୭୮ ଜଣ ପର୍ଯ୍ୟଟକ ଆସିଛନ୍ତି। ଫେବୃୟାରୀ ମାସରେ କେବଳ ପୁରୀକୁ ୧,୨୦୪ ଜଣ ପର୍ଯ୍ୟଟକ ଆସିଥିବାବେଳେ ମାର୍ଚ୍ଚରେ ମାତ୍ର ୨୩୧ ଜଣ ଆସିଛନ୍ତି। ସେହିଭଳି ଫେବୃୟାରୀରେ ଖୋର୍ଦ୍ଧା ଜିଲାକୁ ୨,୨୬୯ ଜଣ ବିଦେଶୀ ପର୍ଯ୍ୟଟକ ଆସିଥିବାବେଳେ ମାର୍ଚ୍ଚରେ ମାତ୍ର ୨୫୬ ଜଣ ଆସିଛନ୍ତି। କୋଣାର୍କକୁ ୬୩୦ ବିଦେଶୀ ପର୍ଯ୍ୟଟକ ଆସିଥିବା ବେଳେ କୋରାପୁଟ ଓ କନ୍ଧମାଳ ଜିଲାର ବିଭିନ୍ନ ଆଦିବାସୀ ଅଞ୍ଚଳରେ ୨୦୦ ବିଦେଶୀ ପର୍ଯ୍ୟଟକ ବୁଲିଛନ୍ତି। ତେବେ ଅଧିକାଂଶ ବିଦେଶୀ ପର୍ଯ୍ୟଟକ ଇଂଲଣ୍ଡ, ଆମେରିକା, ଜର୍ମାନୀ ସମେତ ବିଭିନ୍ନ ୟୁରୋପୀୟ ରାଷ୍ଟ୍ରରୁ ଆସିଥିବାବେଳେ ପ୍ରାୟ ୨୦୦ ପର୍ଯ୍ୟଟକ ଇଟାଲୀରୁ ଆସିଛନ୍ତି। କରୋନା ମୁକାବିଲା ପାଇଁ ବର୍ତ୍ତମାନ ସୁଦ୍ଧା ପୁରୀ, କୋଣାର୍କ, ଚିଲିକା ଓ ସାତପଡ଼ା ଭଳି ପର୍ଯ୍ୟଟନସ୍ଥଳୀରେ ପର୍ଯ୍ୟଟକଙ୍କ ଯିବା ଆସିବା ଉପରେ ଅଙ୍କୁଶ ଲଗାଯାଇଛି। ପର୍ଯ୍ୟଟଙ୍କ ସ୍ବାସ୍ଥ୍ୟ ପରୀକ୍ଷା ଏବଂ ଚିକତ୍ସା ସୁବିଧା ଯୋଗାଇ ଦେବାକୁ ବିଭାଗ ପକ୍ଷରୁ ଏକ ଡାକ୍ତରୀ ଦଳ ଗଠନ କରାଯାଇଛି।