ନୂଆଦିଲ୍ଲୀ,୨୪-୫: ସାଧାରଣ ନିର୍ବାଚନରେ ଏନ୍ଡିଏର ବିପୁଳ ବିଜୟ ପରେ ବିଦେଶୀ ମିଡିଆ ନିଜର ପ୍ରତିକ୍ରିୟା ଦେଇଛନ୍ତି। ଆମେରିକାର ‘ଦ ନ୍ୟୁୟର୍କ ଟାଇମ୍ସ’ ଲେଖିଛି ଯେ, ମୋଦି ହିନ୍ଦୁ ରାଷ୍ଟ୍ରବାଦ ରାଜନୀତିର ବ୍ରାଣ୍ଡ ଭାବେ ଉଭା ହୋଇଛନ୍ତି। ଗତକିଛି ମାସ ପୂର୍ବେ ଭାରତର ପ୍ରଧାନମନ୍ତ୍ରୀ ଆର୍ଥିକ କ୍ଷେତ୍ରରେ ଯେଭଳି ସଂଘର୍ଷ କରୁଥିଲେ,ସେତେବେଳେ ବିଶ୍ଳେଷକମାନେ ଯେଉଁ ଫଳାଫଳ ଭାବିଥିଲେ ଏହି ବିଜୟ ତାହାଠାରୁ ଅଧିକ ପ୍ରଭାବଶାଳୀ ହୋଇଛି। ହିନ୍ଦୁ ରାଷ୍ଟ୍ରବାଦର ବ୍ରାଣ୍ଡ ହୋଇସାରିଥିବା ମୋଦି ସାରା ଦୁନିଆରେ ଭାରତର ଯେଉଁ ଛବି ଉପସ୍ଥାପନ କରିବାକୁ ଚେଷ୍ଟା କରିଛନ୍ତି, ତାହା ଦେଶର ୯୧ କୋଟି ମତଦାତାଙ୍କୁ ପ୍ରଭାବିତ କରିଛି। ଆର୍ଥିକ ଦୃଷ୍ଟିରୁ ଦେଖିଲେ ପ୍ରଧାନମନ୍ତ୍ରୀଙ୍କ କାର୍ଯ୍ୟକାଳକୁ ପ୍ରଭାବଶାଳୀ ବୋଲି ମନେକରାଯାଉଛି। ସେ ଟିକସ ବ୍ୟବସ୍ଥାକୁ ସରଳ କରିବା ସହ ଦୁର୍ନୀତି ଉପରେ ଲଗାମ ଲଗାଇଛନ୍ତି। ଏସିଆରେ ଭାରତର ଷ୍ଟକ୍ ମାର୍କେଟ ଏକ ସମ୍ଭାବନା ସୃଷ୍ଟି କରିଛି। ଅନ୍ୟପକ୍ଷରେ ଆମେରିକା ସହ ବାଣିଜ୍ୟ ଯୁଦ୍ଧ କାରଣରୁ ଚାଇନାର ଷ୍ଟକ୍ ବଜାର କ୍ଷତି ସହିଚାଲିଛି।
ବ୍ରିଟିଶ ଖବରକାଗଜ ‘ ଦ ଗାର୍ଡିୟାନ’ ଲେଖିଛି ଯେ, ମୋଦିଙ୍କ ଭାଜପା ପୁଣିଥରେ କମାଲ କରିଛି। ଏକ୍ଜିଟ୍ ପୋଲ୍ରେ ପ୍ରକାଶିତ ଫଳାଫଳ ସତ ପରିଣତ ହୋଇଛି। ଭାଜପା ପୁଣିଥରେ କ୍ଷମତାକୁ ଫେରୁଛି। ସେମାନଙ୍କୁ ରୋକିବା ଲାଗି ସବୁପ୍ରକାର ଉଦ୍ୟମ ବିଫଳ ହୋଇଛି। କିନ୍ତୁ ଜନତା ଏହି ଶୀର୍ଷ ନେତା ଓ ତାଙ୍କ ପାର୍ଟି ପ୍ରତି ଭରସା ଦେଖାଇଛନ୍ତି।
ଅପରପକ୍ଷରେ ବିବିସି ଓ୍ବାଲର୍ଡ କହିଛି ଯେ, ଲୋକ ସଭା ନିର୍ବାଚନରେ ମୋଦିଙ୍କର ଐତିହାସିକ ବିଜୟ ହୋଇଛି। ଫଳାଫଳ ପ୍ରକାଶ ପାଇବା ଆରମ୍ଭ ହେବା ମାତ୍ରେ ଷ୍ଟକ୍ ମାର୍କେଟ ବୃଦ୍ଧିହୋଇଥିବା ଦେଖାଯାଇଛି। ଦେଶକୁ ବାଣ୍ଟିବା ଲାଗି ପ୍ରଧାନମନ୍ତ୍ରୀ ଉଦ୍ୟମ କରୁଛନ୍ତି ବୋଲି ଅଭିଯୋଗ ହେଉଥିବା ବେଳେ ଫଳାଫଳ ଦର୍ଶାଉଛି ଯେ, ତାଙ୍କ ବିରୋଧରେ ଧ୍ରୁବୀକରଣର ଛବି ତିଆରି ଉଦ୍ୟମକୁ ଲୋକେ ପସନ୍ଦ କରିନାହାନ୍ତି।
ସିଏନ୍ଏନ୍ ଲେଖିଛି ଯେ, ଗତ ନିର୍ବାଚନରେ ପ୍ରଧାନମନ୍ତ୍ରୀ ମୋଦି ‘ସବ୍କା ସାଥ୍-ସବ୍କା ବିକାଶ’ ସ୍ଲୋଗାନ ଦେଇଥିଲେ। ଏଥିରେ ସେ ନିଜକୁ ଚୌକିଦାର କହିଛନ୍ତି। ଅର୍ଥାତ୍ ସେ ନିଜକୁ ଦେଶର ରକ୍ଷାକର୍ତ୍ତା ଭାବେ ଦର୍ଶାଇଛନ୍ତି। ଏହା ବିଶେଷଭାବେ ଏକ ସ୍ବତନ୍ତ୍ର ବାର୍ତ୍ତା କୁହାଯାଇପାରେ। ଅର୍ଥନୀତି ପାଇଁ ତାଙ୍କର କାମ ଯୋଗୁ ସାରା ବିଶ୍ୱ ତାଙ୍କୁ ଗମ୍ଭୀରତାର ସହ ନେଉଛି।
ଅପରପକ୍ଷରେ ପାକିସ୍ତାନ ଟିଭି ଚ୍ୟାନେଲ ଜିଓ ଟିଭି ନିଜର ଓ୍ବେବ୍ସାଇଟ୍ରେ ଲେଖିଛି ଯେ, ୩ ରାଜ୍ୟରେ ପରାଜୟ, ମୁଦ୍ରାସ୍ଫୀତି, ବେକାରି ଆଦି ସମସ୍ୟା ଯୋଗୁ ମୋଦି ଚାପରେ ଥିଲେ। ତେବେ ପୁଲଓ୍ବାମା ଆକ୍ରମଣ ପରେ ସର୍ଜିକାଲ ଷ୍ଟ୍ରାଇକ୍ ପରେ ଭାଜପାକୁ ଫାଇଦା ମିଳିଥିଲା। ଦଳ ଷ୍ଟାର୍ କାମ୍ପେନର ମୋଦିଙ୍କ କ୍ଷମତା ଓ ଦକ୍ଷତାର ଫାଇଦା ଉଠାଇଥିଲା। ପାକିସ୍ତାନର ଖବର କାଗଜ ଡନ୍ ପକ୍ଷରୁ ଲେଖାଯାଇଛି ଯେ, ମୋଦି ୨.୦ ଯୋଗୁ ଭାରତର ପାକିସ୍ତାନ ନୀତିରେ କୌଣସି ପରିବର୍ତ୍ତନ ହେବ ନାହିଁ। ଦୁଇ ଦେଶ ମଧ୍ୟରେ ଥିବା ଉତ୍ତେଜନା କମିବ ନାହିଁ। ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଶାନ୍ତି ପ୍ରସ୍ତାବକୁ ମୋଦି ଗୁରୁତ୍ୱ ଦେବେ କି, ଏହା ହିଁ ଏବେର ପ୍ରଶ୍ନ ହୋଇଛି।