ରଘୁନାଥପୁର,୧୭।୩(ଡି.ଏନ୍.ଏ.): ବିଦେଶ ଫେରନ୍ତା ୩ ଜଣଙ୍କୁ ସୋମବାର ମେଡିକାଲ ଟିମ ଠାବ କରିଛି। ରଘୁନାଥପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଡା. ପ୍ରଭାସ ଚନ୍ଦ୍ର ସ୍ବାଇଁଙ୍କ ନେତୃତ୍ୱରେ ଏକ ଟିମ୍ ଉତ୍ତରକୂଳ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଅଧୀନସ୍ଥ ସମ୍ପୃକ୍ତ ବ୍ୟକ୍ତିଙ୍କ ଘରକୁ ଯାଇ ସେମାନଙ୍କ ସ୍ବାସ୍ଥ୍ୟାବସ୍ଥା ତଦାରଖ କରିଛନ୍ତି। ସୂଚନା ଅନୁଯାୟୀ, ସୁପରିଣ୍ଟେଣ୍ଡେଣ୍ଟ ସୁକାନ୍ତ ଦଳାଇଙ୍କ ନିର୍ଦ୍ଦେଶକ୍ରମେ ଡା. ସ୍ବାଇଁ ଉତ୍ତରକୂଳସ୍ଥିତ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚିଥିଲେ। ଏହା ପରେ ସେ ଡା. ଅୟୁଷକାନ୍ତ ମହାନ୍ତି ଓ ୨ଜଣ ମେଲ ଓ୍ବାର୍କରଙ୍କ ସହ ସ୍ଥାନୀୟ ଚମ୍ପା ଗ୍ରାମର ଜଣେ ବ୍ୟକ୍ତିଙ୍କ ଘରେ ପହଞ୍ଚିଥିଲେ। ଉକ୍ତ ବ୍ୟକ୍ତିଜଣଙ୍କ ମାର୍ଚ୍ଚ ୧୧ରେ ଦୁବାଇରୁ ଘରକୁ ଫେରିଥିଲେ। ସେହିପରି ଦୁଇପୁର ଗ୍ରାମର ଜଣେ ବ୍ୟକ୍ତି ମାର୍ଚ୍ଚ ୪ ରେ କେନିଆରୁ ଫେରିଥିଲେ। ମହମ୍ମଦପୁର ଗ୍ରାମର ଜଣେ ବ୍ୟକ୍ତି ଫେବୃୟାରୀ ୨୬ରେ ସାଉଦିଆରବରୁ ଫେରିଥିଲେ। ଏହି ୩ବ୍ୟକ୍ତିଙ୍କ ସ୍ବାସ୍ଥ୍ୟାବସ୍ଥା ତଦାରଖ କରି ସଚେତନା କରାଇବା ସହ ପ୍ରଥମ ପର୍ଯ୍ୟାୟ ୧୪ଦିନ ଓ ପରେ ୧୪ଦିନ ଆଇସୋଲେଶନରେ ରହିବା ପାଇଁ ଡାକ୍ତର ପରାମର୍ଶ ଦେଇଛନ୍ତି। ପ୍ରତ୍ୟେକ ଦିନ ଏମାନଙ୍କ ସ୍ବାସ୍ଥ୍ୟ ରିପୋର୍ଟ ନିଆଯିବ। ଯଦି ଏହି ସମୟ ମଧ୍ୟରେ କିଛି ଲକ୍ଷ୍ୟଣ ଦେଖାଯାଏ ଏମାନଙ୍କୁ ଅବଜରଭେଶନରେ ରଖାଯାଇ ଚିକତ୍ସା ଯୋଗାଇଦିଆଯିବ ବୋଲି ଡା. ସ୍ବାଇଁ କହିଛନ୍ତି। ଅନ୍ୟପକ୍ଷରେ ଥଣ୍ଡା, କାଶ କିମ୍ବା ଜ୍ୱର ହୋଇ ନ ଥିବା ଉକ୍ତ ସମ୍ପୃକ୍ତ ବ୍ୟକ୍ତିମାନେ ପ୍ରକାଶ କରିଥିଲେ।