ଅନୁଗୋଳ ଅଫିସ, ୩୦।୮-ଅନୁଗୋଳ ଜିଲା ବଅଁରପାଳ ବ୍ଲକ ଜାମୁନାଳୀ ପଞ୍ଚାୟତ ସରପଞ୍ଚ ପ୍ରମିଳା ନାଏକ ଗୁରୁବାର ଜାମୁନାଳୀ ବିଦ୍ୟାଳୟ ପରିସର ସଫେଇ କରାଇବା ସହ ସେଠାରେ ଥିବା ଅଙ୍ଗନଓ୍ବାଡ଼ି ପିଲାଙ୍କୁ ପାଠ ପଢ଼ାଇ ଚର୍ଚ୍ଚାକୁ ଆସିଛନ୍ତି। ତେବେ ଅଙ୍ଗନଓ୍ବାଡି ପିଲାଙ୍କ ପାଇଁ ପ୍ରସ୍ତୁତ ଖାଦ୍ୟ ଖାଇବା ପରେ ଏହା ଉନ୍ନତମାନର ହୋଇ ନ ଥିବାରୁ ସରପଞ୍ଚ ଅସନ୍ତୋଷ ବ୍ୟକ୍ତ କରିଛନ୍ତି। ସରପଞ୍ଚଙ୍କ ଏପରି କାର୍ଯ୍ୟକୁ ପଞ୍ଚାୟତବାସୀ ପ୍ରଶଂସା କରିଛନ୍ତି।
ଦୁଇ ଦିନ ତଳେ ସରପଞ୍ଚ ନାଏକ ଜାମୁନାଳୀ ପ୍ରାଥମିକ ବିଦ୍ୟାଳୟ ପରିଦର୍ଶନରେ ଯାଇଥିବା ବେଳେ ବିଦ୍ୟାଳୟ ପରିସର ଅସ୍ବାସ୍ଥ୍ୟକର ଥିବା ଦେଖିବାକୁ ପାଇଥିଲେ। ଗୁରୁବାର ସକାଳେ ଗାଁ ଲୋକଙ୍କୁ ଡାକି ସେ ସ୍କୁଲ ପରିସର ସଫା କରାଇଥିଲେ। ସେଠାରେ ଥିବା ଅଙ୍ଗନଓ୍ବାଡ଼ି କେନ୍ଦ୍ରର ଦିଦି ଟ୍ରେନିଂରେ ଯାଇଥିବାରୁ ସରପଞ୍ଚ ନାଏକ କୁନି କୁନି ପିଲାଙ୍କୁ ଏକ ଘଣ୍ଟା ଧରି ପାଠ ପଢ଼ାଇଥିଲେ। ପରେ ପିଲାଙ୍କ ପାଇଁ ରୋଷେଇ ହୋଇଥିବା ଖାଦ୍ୟର ମାନ ପରଖିବା ପାଇଁ ପିଲାଙ୍କ ସହ ବସି ଖାଇଥିଲେ। ତେବେ ପିଲାଙ୍କୁ ଦିଆଯାଇଥିବା ଭାତ ସହ ଆଳୁ ତରକାରି ଓ ଅଣ୍ଡା ଝୋଳ ନିମ୍ନମାନର ହୋଇଥିବା ଜାଣି ସେ ଅସନ୍ତୋଷ ବ୍ୟକ୍ତ କରିଥିଲେ। ଭାତ ଜାଉ ଭଳି ହୋଇଥିବା ବେଳେ ଆଳୁ ଝୋଳ ଖାଲି ପାଣି ପରି ଲାଗୁଥିଲା। ଏପରି କି ତରକାରିରେ ସ୍ବାଦ ନ ଥିବାବେଳେ ଅଲଣା ଥିଲା। ଏ ନେଇ ଦାୟିତ୍ୱରେ ଥିବା କର୍ମୀଙ୍କୁ ସେ ତାଗିଦ କରିଥିଲେ। ଆଗକୁ ଏପରି ହେଲେ ପ୍ରଶାସନକୁ ଚିଠି ଲେଖି ଅବଗତ କରିବେ ବୋଲି ମଧ୍ୟ ସରପଞ୍ଚ ନାଏକ ଚେତାବନୀ ଦେଇଥିଲେ।
