ନୟାଗଡ଼ ଅଫିସ, ୮।୧୧: ଗ୍ରାମରେ ଥିବା ବିଦ୍ୟାଳୟକୁ ବନ୍ଦ ନ କରିବା ପାଇଁ ନୟାଗଡ଼ ଜିଲା ଭାପୁର ବ୍ଲକ ଭଗବାନପୁର ପଞ୍ଚାୟତର ବେତଖୋଲି ଗ୍ରାମବାସୀ ଗୁରୁବାର ଜିଲାପାଳଙ୍କ ଦ୍ୱାରସ୍ଥ ହୋଇଛନ୍ତି। ପିଲାମାନଙ୍କ ଷାଣ୍ମାସିକ ପରୀକ୍ଷା ଚାଲିଥିବାରୁ ଏଥିରେ ବାଧା ସୃଷ୍ଟି ହେବାର ଆଶଙ୍କା ରହିଛି ବୋଲି ଗ୍ରାମବାସୀ ଅଭିଯୋଗ କରିଛନ୍ତି।
କହିବାନୁସାରେ, ବେତଖୋଲି ଗ୍ରାମରେ ଦୀର୍ଘ ବର୍ଷ ହେଲାଣି ଏକ ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟ ରହିଛି। ଯେଉଁଥିରେ ବର୍ତ୍ତମାନ ପ୍ରଥମରୁ ପଞ୍ଚମ ଶ୍ରେଣୀ ଯାଏ ୧୮ ଜଣ ଛାତ୍ରୀଛାତ୍ର ପଢ଼ୁଛନ୍ତି। ରାଜ୍ୟ ସରକାରଙ୍କ ନିୟମ ଅନୁସାରେ ୨୦ରୁ କମ୍ ପିଲା ଥିବା ବିଦ୍ୟାଳୟକୁ ବନ୍ଦ କରିବା ପାଇଁ ଘୋଷଣା କରାଯାଇଛି। କମ୍ ପିଲା ଥିବାରୁ ଗତବର୍ଷ ସେମାନଙ୍କ ଗ୍ରାମ ବିଦ୍ୟାଳୟକୁ ବନ୍ଦ କରି ନିକଟସ୍ଥ ଏକ ବିଦ୍ୟାଳୟରେ ମିଶ୍ରଣ କରିବା ପାଇଁ ନିର୍ଦ୍ଦେଶ ଦେଇଥିଲେ। ଏ ନେଇ ଗ୍ରାମବାସୀ ସେହି ସମୟରେ ଜିଲା ଶିକ୍ଷା ଅଧିକାରୀଙ୍କୁ ଭେଟିଥିଲେ। ନିର୍ବାଚନ ହେବାକୁ ଥିବାରୁ ଉକ୍ତ ବିଦ୍ୟାଳୟକୁ ବନ୍ଦ କରା ଯାଇ ନ ଥିଲା। ହେଲେ ବର୍ତ୍ତମାନ ଉକ୍ତ ବିଦ୍ୟାଳୟକୁ ବନ୍ଦ କରାଯିବା ପାଇଁ ଶିକ୍ଷା ବିଭାଗ ନିର୍ଦ୍ଦେଶ ଦେଇଛି। ଯାହାକୁ ନେଇ ଗ୍ରାମବାସୀ ଚିନ୍ତିତ ଅଛନ୍ତି। ପିଲାମାନଙ୍କ ଷାଣ୍ମାସିକ ପରୀକ୍ଷା ଚାଲିଥିବା ବେଳେ ପିଲା କିପରି ଭାବେ ଅନ୍ୟ ବିଦ୍ୟାଳୟକୁ ଯିବେ ସେମାନେ ପ୍ରଶ୍ନ କରିଛନ୍ତି। ସେହିଭଳି ଶିକ୍ଷା ଅଧା ବର୍ଷରେ ପିଲାମାନେ ଅନ୍ୟ ବିଦ୍ୟାଳୟକୁ ଗଲେ ତାଙ୍କ ପାଠପଢ଼ାରେ ବ୍ୟାଘାତ ଘଟିବ। ଯଦି ବିଦ୍ୟାଳୟ ବନ୍ଦ ହେବ ତାହା ହେଲେ ଆସନ୍ତା ଶିକ୍ଷାବର୍ଷ ଆରମ୍ଭରୁ ବନ୍ଦ ହେବା ନେଇ ଗ୍ରାମବାସୀ ଦାବି କରିଛନ୍ତି । ବିଦ୍ୟାଳୟ ବନ୍ଦ ହେଲେ ଗ୍ରାମଠାରୁ ୧ କିଲୋମିଟର ଦୂରରେ ମିଶ୍ରଣ ହେବାକୁ ଥିବା ବିଦ୍ୟାଳୟ ରହିଛି। ଉକ୍ତ ବିଦ୍ୟାଳୟ ଦେଇ ଗଲା ବେଳେ ଜଙ୍ଗଲ ପଡ଼ୁଥିବାରୁ କୋମଳମତି ଛାତ୍ରୀଛାତ୍ରଙ୍କ ଜୀବନ ପ୍ରତି ଭୟ ଥିବା ଗ୍ରାମବାସୀ ପ୍ରକାଶ କରିଛନ୍ତି। ବର୍ତ୍ତମାନ କୁସୁମୀ ନଦୀ ଉପରେ ବ୍ରିଜ ନିର୍ମାଣ ହେଉଥିବାରୁ ଉକ୍ତ ରାସ୍ତା ଦେଇ ପ୍ରତିଦିନ ଗାଡ଼ି ଚଳାଚଳ କରୁଛି। ଯାହାଫଳରେ ଦୁର୍ଘଟଣା ଘଟିବାର ମଧ୍ୟ ଆଶଙ୍କା ରହିଛି। ଅନ୍ୟପକ୍ଷେ ଗ୍ରାମର ୮୦ ପରିବାର ବସବାସ କରୁଥିବା ବେଳେ କିଛି ଲୋକ ବାହାରେ ରହୁଛନ୍ତି। ଫଳରେ ସେମାନଙ୍କ ପିଲାମାନେ ବାହାରେ ବିଦ୍ୟାଳୟରେ ପାଠ ପଢୁଛନ୍ତି। ଯଦି ଆସନ୍ତା ଶିକ୍ଷା ବର୍ଷ ବିଦ୍ୟାଳୟରେ ପିଲା ନ ହୁଅନ୍ତି ତା’ହେଲେ ବିଦ୍ୟାଳୟକୁ ବନ୍ଦ କରିବା ପାଇଁ ଗ୍ରାମବାସୀ ଅନୁରୋଧ କରିଛନ୍ତି। ଗ୍ରାମ ସଭାପତି ଦୟାନିଧି ଆଚାର୍ଯ୍ୟଙ୍କ ସହିତ ଗ୍ରାମର ବିଶ୍ୱନାଥ ସାହୁ, ସହଦେବ ନାୟକ, ଗୋବିନ୍ଦ ଚନ୍ଦ୍ର ପଣ୍ଡାଙ୍କ ସମେତ ଶତାଧିକ ଗ୍ରାମବାସୀ ଗୁରୁବାର ଜିଲାପାଳଙ୍କୁ ଭେଟିବାକୁ ଆସିଥିଲେ। ଜିଲାପାଳ ଏହାର ସମାଧାନ ବରିବା ପାଇଁ ପ୍ରତିଶ୍ରୁତି ଦେଇଥିବା ଗ୍ରାମବାସୀ ପ୍ରକାଶ କରିଛନ୍ତି।