ବାଲିକୁଦା,୬ା୮(ସ୍ବ.ପ୍ର.): ବାଲିକୁଦା ବ୍ଲକ ଶିକ୍ଷା କାର୍ଯ୍ୟାଳୟ ଅଧୀନ ବଘେଇପୁର ପ୍ରାଥମିକ ବିଦ୍ୟାଳୟ ଓ କପୁରାବେଲାରୀ ପ୍ରକଳ୍ପ ପ୍ରାଥମିକ ବିଦ୍ୟାଳୟ ମିଶ୍ରଣ ପ୍ରକ୍ରିୟାକୁ ନେଇ ଉପୁଜିଥିବା ସମସ୍ୟା ସମାଧାନ ହେବା ବଦଳରେ ବଢିବାରେ ଲାଗିଛି। ପ୍ରଥମେ ଗତ ଜୁନ ୧୩ରେ ବଘେଇପୁର ପ୍ରାଥମିକ ବିଦ୍ୟାଳୟକୁ କପୁରାବେଲାରୀ ପ୍ରକଳ୍ପ ପ୍ରାଥମିକ ବିଦ୍ୟାଳୟରେ ମିଶ୍ରଣ କରିବାକୁ ବ୍ଲକ ଶିକ୍ଷା କାର୍ଯ୍ୟାଳୟ ପକ୍ଷରୁ ଚିଠି ହୋଇଥିଲା। ଏପରି କି ସେଠାରେ କାର୍ଯ୍ୟରତ ୨ ଜଣ ଶିକ୍ଷୟିତ୍ରୀ ଶିକ୍ଷକଙ୍କୁ ବଘେଇପୁର ପ୍ରାଥମିକ ବିଦ୍ୟାଳୟରୁ ଅଣାଯାଇ କପୁରାବେଲାରୀ ପ୍ରକଳ୍ପ ବିଦ୍ୟାଳୟରେ ଅବସ୍ଥାପିତ କରାଯାଇଥିଲା। ମାତ୍ର ପରେ ଭିତ୍ତିଭୂମିର ଆଳ ଦେଖାଇ କପୁରାବେଲାରୀ ପ୍ରକଳ୍ପ ପ୍ରାଥମିକ ବିଦ୍ୟାଳୟକୁ ବଘେଇପୁର ପ୍ରାଥମିକ ବିଦ୍ୟାଲୟରେ ମିଶାଇବାକୁ ଚିଠି କରାଯାଇଛି। ବିଇଓଙ୍କ ନିର୍ଦ୍ଦେଶ ପାଳନ କରି କପୁରାବେଲାରୀ ପ୍ରକଳ୍ପ ପ୍ରାଥମିକ ବିଦ୍ୟାଳୟର ସମସ୍ତ ଶିକ୍ଷକଙ୍କ ସମେତ ପ୍ରଧାନ ଶିକ୍ଷକ ସୋମବାର ବଘେଇପୁର ପ୍ରାଥମିକ ବିଦ୍ୟାଳୟରେ ଯୋଗ ଦେଇଛନ୍ତି। ମାତ୍ର କପୁରାବେଲାରୀ ସ୍କୁଲର ଜଣେ ହେଲେ ଛାତ୍ରୀଛାତ୍ରଙ୍କୁ ଗଁା ଲୋକେ ସେଠାକୁ ଛାଡ଼ି ନାହାନ୍ତି। କପୁରାବେଲାରୀ ସ୍କୁଲକୁ ଶିକ୍ଷକମାନେ ନ ଆସିବାରୁ ସ୍କୁଲରୁ ତାଲା ଖୋଲାଯାଇ ନ ଥିଲା। ତେଣୁ ବିଦ୍ୟାଳୟର ୨୯ ଛାତ୍ରୀଛାତ୍ରଙ୍କ ମଧ୍ୟରୁ ୨୬ ଜଣ ବାରଣ୍ଡାରେ ବସି ପଢୁଥିବା ଦେଖିବାକୁ ମିଳିଥିଲା। ସେମାନଙ୍କୁ କୌଣସି ଶିକ୍ଷକ ନୁହନ୍ତି, ବରଂ ଗ୍ରାମର ଗଁାର ୩ ଜଣ ଶିକ୍ଷିତ ଝିଅ ବସି ପଢାଉଥିଲେ। ସରକାର ଯେ ପର୍ଯ୍ୟନ୍ତ କପୁରାବେଲାରୀ ପ୍ରକଳ୍ପ ପ୍ରାଥମିକ ବିଦ୍ୟାଳୟକୁ ଶିକ୍ଷକ ଯୋଗାଇ ଦେଇ ଆନୁଷ୍ଠାନିକ ଭାବେ ନ ଚଳାଇଛନ୍ତି ସେ ପର୍ଯ୍ୟନ୍ତ ଏଭଳି ସ୍ଥିତି ଲାଗି ରହିବ ବୋଲି ଗ୍ରାମବାସୀ କହିଛନ୍ତି। ସୂଚନାଯୋଗ୍ୟ, ବଘେଇପୁର ସ୍କୁଲ ଅନ୍ୟତ୍ର ମିଶ୍ରଣ ହେବା ଖବର ଶୁଣିବା ପରେ ଉକ୍ତ ଗଁାର ଅଭିଭାବକମାନେ ପିଲାଙ୍କୁ ସେଠାକୁ ପଠାଇ ନ ଥିଲେ। ନିଜ ସ୍କୁଲ ଚାଲିଥିବା ବାତ୍ୟା ଆଶ୍ରୟସ୍ଥଳୀରେ ସେମାନେ ପିଲାଙ୍କୁ ବସାଇ ଗଁାର ଜଣେ ଶିକ୍ଷିତ ଯୁବତୀଙ୍କ ମାଧ୍ୟମରେ ପଢାଇଥିଲେ। ସମାନ ସ୍ଥିତି ଏବେ କପୁରାବେଲାରୀ ପ୍ରକଳ୍ପ ପ୍ରାଥମିକ ବିଦ୍ୟାଳୟରେ ଦେଖାଦେଇଛି। ଅନ୍ୟପକ୍ଷରେ ବଘେଇପୁର ଗଁାର ଜଣେ ମୁରବୀ କପୁରାବେଲାରୀ ଗଁାର ଲୋକଙ୍କୁ ହରିଜନ ବୋଲି ଗଣମାଧ୍ୟମରେ କହିବାରୁ ତାହା ସେମାନଙ୍କୁ ବ୍ୟଥିତ କରିଛି। ଘଟଣା ସମ୍ପର୍କରେ ବିଇଓ ସଚ୍ଚିନ୍ଦ୍ର କୁମାର ମହାନ୍ତିଙ୍କୁ ପଚାରିବାରେ ସେ କହିଲେ ଯେ, ସେମାନେ ନିଶ୍ଚିତ ଆସିବେ ଓ ପାଠ ପଢିବେ। ଦିନେ ଦୁଇ ଦିନ ଗଲେ ଲୋକଙ୍କ ମନରେ ଉତ୍କଣ୍ଠା କମିଯିବ।