ଭଦ୍ରକ ଅଫିସ, ୧୭।୫: ଭଦ୍ରକ ଜିଲା ଧାମନଗର ବ୍ଲକ ଆନନ୍ଦପୁର ପଞ୍ଚାୟତ ହାଟଡିହ ଗାଁରେ ବୁଧବାର ସକାଳେ ଏକ ଅଭାବନୀୟ ଘଟଣା ଘଟିଛି। ବିଦ୍ୟୁତ୍ ତାର ସଂସ୍ପର୍ଶରେ ଆସି ଜଣେ ଶିଶୁକନ୍ୟାର ମୃତ୍ୟୁ ଘଟିଛି। ସେ ହେଲେ ଗାଁର ଚକ୍ରଧର ମଲିକଙ୍କ ୫ ବର୍ଷର ଝିଅ ଦୀପାଞ୍ଜଳି। ସୂଚନା ଥାଉକି, ମଙ୍ଗଳବାର ଚକ୍ରଧରଙ୍କ ଘର ବାରିପଟେ ଥିବା ବିଦ୍ୟୁତ୍ ଖୁଣ୍ଟରେ ବିଭାଗୀୟଙ୍କ ଦ୍ୱାରା ମରାମତି କାର୍ଯ୍ୟ ହୋଇଥିଲା। ଉକ୍ତ ସ୍ଥାନରେ ଏକ ତାର ତଳେ ଛିଣ୍ଡି ପଡିଥିଲା। ଦୀପାଞ୍ଜଳି ବୁଧବାର ସକାଳୁ ଖେଳିବାକୁ ଯାଇଥିବା ବେଳେ ଉକ୍ତ ତା’ର ସଂସ୍ପର୍ଶରେ ଆସିବାରୁ ତାଙ୍କର ମୃତ୍ୟୁ ଘଟିଛି। ଏ ନେଇ ପରିବାର ପକ୍ଷରୁ ବିଦ୍ୟୁତ୍ କର୍ମଚାରୀଙ୍କୁ ଦାୟୀ କରାଯାଇ ଧାମନଗର ଥାନାରେ ଏତଲା ପରେ ତଦନ୍ତ ଆରମ୍ଭ ହୋଇଛି।