ଶଙ୍କରାଖୋଲ,୧୬।୧୧(ଡି.ଏନ୍.ଏ.)-ଚକାପାଦ ବ୍ଲକ ଶଙ୍କରାଖୋଲ ଗ୍ରାମରେ ୩୩ କେଭି ତାର ସ୍ଥାନାନ୍ତର ପାଇଁ ଖୁଣ୍ଟରେ ଚଢି ବିଦ୍ୟୁତ ସଂସ୍ପର୍ଶରେ ଆସି ଗୁରୁତର ଆହତ ହୋଇଥିବା ଶ୍ରମିକଙ୍କ ଶୁକ୍ରବାର ମୃତ୍ୟୁ ଘଟିଛି। ସେ ହେଲେ ଟିକାବାଲି ପଞ୍ଚାୟତ ସାକିଡ଼ିକିଆ ଗ୍ରାମର ରୋହିତ କହଁର। ଏ ନେଇ ଟିକାବାଲି ଥାନାରେ ନଂ.୧୦୮/୧୯ରେ ମାମଲା ରୁଜୁ ହୋଇଛି। ମୃତ ରୋହିତଙ୍କ ସାନଭାଇ ବିବେକ ଟିକାବାଲି ସାଉଥକୋ କନିଷ୍ଠ ଯନ୍ତ୍ରୀ ପ୍ରଭାତ କୁମାର ଷଡ଼ଙ୍ଗୀ, ଠିକାଦାର ମାଧବ ଦିଗାଲ ଓ ଗ୍ରୀନ ପାଓ୍ବାର କମ୍ପାନୀ ନାମରେ ଟିକାବାଲି ଥାନାରେ ଅଭିଯୋଗ କରିଥିଲେ। ଫୁଲବାଣୀସ୍ଥିତ ଜିଲା ମୁଖ୍ୟ ଡାକ୍ତରଖାନାରେ ମୃତଦେହ ବ୍ୟବଚ୍ଛେଦ ହୋଇ ଅପରାହ୍ନରେ ଗାଁକୁ ଆସିଥିଲା। କ୍ଷତିପୂରଣ ଦାବିରେ ପରିବାର ଲୋକଙ୍କ ସମେତ ଗ୍ରାମବାସୀ ଫୁଲବାଣୀ- ବ୍ରହ୍ମପୁର ରାଜପଥର ଟିକାବାଲି କୋଚିଲାଗଡ଼ଠାରେ ମୃତଦେହ ରଖି ଅବରୋଧ କରିଥିଲେ। ଖବରପାଇ ଜି. ଉଦୟଗିରି ଏସଡିପିଓ ଜୟକୃଷ୍ଣ ବେହେରା, ଟିକାବାଲି ଆଇଆଇସି ରେବତୀ ଶବର ପହଞ୍ଚି ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଓ ମୃତକଙ୍କ ପରିବାରକୁ କ୍ଷତିପୂରଣ ଦିଆଯିବ ବୋଲି ପ୍ରତିଶ୍ରୁତି ଦେବା ପରେ ରାସ୍ତା ଅବରୋଧ ହଟିଥିଲା।
ପ୍ରକାଶ ଯେ, ଶଙ୍କରାଖୋଲ ଗ୍ରାମର ଜଣଙ୍କ ଘର ପଛପଟେ ୩୩ କେଭି ତାର ଓହଳି ରହିଥିଲା। ଏହା ସ୍ଥାନାନ୍ତର ପାଇଁ ରବିବାର ସାଉଥକୋ କନିଷ୍ଠ ଯନ୍ତ୍ରୀଙ୍କ ଉପସ୍ଥିତିରେ ଠିକାଦାର ମାଧବଙ୍କ ଅଧୀନରେ କାମ କରୁଥିବା ରୋହିତ ବିଦ୍ୟୁତ ଖୁଣ୍ଟରେ ଚଢିଥିଲେ। ବିଦ୍ୟୁତ ସଂସ୍ପର୍ଶରେ ଆସିଯିବାରୁ ସେ ଖସିପଡ଼ି ଗୁରୁତର ହୋଇଥିଲେ। କନିଷ୍ଠଯନ୍ତ୍ରୀଙ୍କ ଦାୟୀତ୍ୱହିନତା ଯୋଗୁ ୩୩ କେଭି ବିଦ୍ୟୁତ ତାର ଓ ଖୁଣ୍ଟ ସ୍ଥାନାନ୍ତର ପାଇଁ ବିଶିପଡ଼ାରୁ ବିଦ୍ୟୁତ ସରବରାହ ଚ୍ଛିନ୍ନ ପରିବର୍ତ୍ତେ ଟିକାବାଲିରୁ ବିଦ୍ୟୁତ୍ କଟାଯାଇଥିବାରୁ କାମ ଚାଲିଥିବାବେଳେ ଏହି ଦୁର୍ଘଟଣା ଘଟିଥିଲା। ରୋହିତ ତାଙ୍କ ପରିବାର ପ୍ରତିପୋଷଣ କରୁଥିଲେ। ତାଙ୍କ ମୃତ୍ୟୁ ପରେ ବର୍ତ୍ତମାନ ଚଳିବା କଷ୍ଟକର ହୋଇପଡ଼ିବ। ତୁରନ୍ତ ସରକାରୀ ସାହାଯ୍ୟ ଯୋଗାଇଦେବା ପାଇଁ ପରିବାର ଲୋକେ ଓ ଗ୍ରାମବାସୀ ଦାବି କରିଛନ୍ତି।