ବସ୍ତା, ୨୪।୮ (ସ୍ବ.ପ୍ର.): ବାଲେଶ୍ୱର ଜିଲା ବସ୍ତା, ବାଲିଆପାଳ ତଥା ବାଲେଶ୍ୱର ସଦର ଅଞ୍ଚଳରେ ଦୀର୍ଘ ଦିନ ଧରି ଚାଲି ଆସିଥିବା ବିଦ୍ୟୁତ୍ ତାର ଚୋରି ର଼୍ୟାକେଟର ଶନିବାର ପର୍ଦ୍ଦାଫାଶ ହୋଇଛି । ବାଲେଶ୍ୱର ଜିଲା ଲଙ୍ଗଳେଶ୍ୱରର କବାଡ଼ିଆ ଗୋଦାମରୁ ଲକ୍ଷାଧିକ ଟଙ୍କାର ବିଦ୍ୟୁତ୍ ତାର ଚୋରି ସାମଗ୍ରୀ ଘଟଣାରେ ବସ୍ତା ଓ ଶିଂଲା ପୋଲିସ ଶନିବାର ମିଳିତଭାବେ ଚଢ଼ାଉକରି ୪ ଜଣଙ୍କୁ ଗିରଫ କରିଛି। ସେମାନେ ହେଲେ ମୟୂରଭଞ୍ଜ ଜିଲା ରାସଗୋବିନ୍ଦପୁର ଥାନା ଅନ୍ତର୍ଗତ ମଣ୍ଡାବାଟି ଗ୍ରାମର ନିଗମାନନ୍ଦ ବେହେରା, ଖୁଣ୍ଟା ଗ୍ରାମର ବାପୁନ ବିନ୍ଧାଣି, ଗୋଡିଖଣିଆ ଗ୍ରାମର ସୁନୀଲ ହେମ୍ବ୍ରମ ଓ ଲଙ୍ଗଳେଶ୍ୱର ଗ୍ରାମର ସେକ୍ ଉସ୍ମାନ। ସେମାନଙ୍କ ନିକଟରୁ ଚୋରା ବିଦ୍ୟୁତ୍ ତାର ସମେତ ସ୍କର୍ପିଓ ଗାଡ଼ି ଜବତ ହୋଇଛି। ଏ ନେଇ ବସ୍ତା ଥାନା ପରିସରରେ ଆୟୋଜିତ ଏକ ଖବରଦାତା ସମ୍ମିଳନୀରେ ଏସ୍ଡିପିଓ ରଣଜିତ ପୃଷ୍ଟି ଏହି ସୂଚନା ଦେଇଛନ୍ତି।
ପ୍ରକାଶ ଯେ, ଗତ କିଛି ମାସ ହେବ ବିଭିନ୍ନ ସ୍ଥାନରୁ ୧୧ କେଭି ବିଦ୍ୟୁତ୍ ଖୁଣ୍ଟରୁ ତାର ଚୋରି ହୋଇଥିବା ନେଇ ବସ୍ତା, ଶିଂଲା ଏବଂ ବାଲେଶ୍ୱର ସଦର ଥାନାରେ ମାମଲା ରୁଜୁ ହୋଇଥିଲା।
