ଭବାନୀପାଟଣା,୪।୧୦(ଡି.ଏନ.ଏ.)-କଳାହାଣ୍ଡି ଜିଲା ଭବାନୀପାଟଣାଠାରେ ଥିବା ୧-ନମ୍ବର ବିଦ୍ୟୁତ୍ ସବ୍ଡିଭିଜନ୍ କନିଷ୍ଠ କିରାଣି ଅଜିତ୍ ମିଶ୍ର ବିଦ୍ୟୁତ୍ ବିଲ କମାଇ ଦେବା ପାଇଁ ଜଣେ ଉପଭୋକ୍ତାଙ୍କଠାରୁ ୫ ହଜାର ଟଙ୍କା ଲାଞ୍ଚ ନେଉଥିବା ବେଳେ ଗୁରୁବାର ଭିଜିଲାନ୍ସ ହାତରେ ଧରାପଡି ଗିରଫ ହୋଇଛନ୍ତି। ଗିରଫ କନିଷ୍ଠ କିରାଣୀ ମିଶ୍ରଙ୍କୁ କୋର୍ଟଚାଲାଣ କରାଯାଇଥିବା ଭିଜିଲାନ୍ସ ଡିଏସପି ସତ୍ୟବାନ୍ ମହାନନ୍ଦ ସୂଚନା ଦେଇଛନ୍ତି । ଏ ନେଇ ଭିଜିଲାନ୍ସ ବିଭାଗ ଏକ ମାମଲା (ନଂ. ୨୭/୧୯) ରୁଜୁ କରିଛି।
ଗୋପୀନାଥପୁର ଗ୍ରାମର ବିଦ୍ୟୁତ୍ ଉପଭୋକ୍ତା ସରୋଜ କୁମାର ପାଢୀଙ୍କ ବକେୟା ବିଦ୍ୟୁତ୍ ବିଲ ୩୦ ହଜାରରୁ ଊର୍ଦ୍ଧ୍ୱ ଟଙ୍କା ଆସିଥିଲା। ଏ ସମ୍ପର୍କରେ ସରୋଜ ବାରମ୍ବାର ପୂର୍ବ ବିଦ୍ୟୁତ୍ ଡିଭିଜନ୍ ଅଧୀନରେ ଥିବା ସବ୍ଡିଭିଜନ୍ ୧-ନମ୍ବରକୁ ଜଣାଇ ଆସୁଥିଲେ। ହେଲେ ସମାଧାନ ନ ହେବାରୁ ବାଧ୍ୟହୋଇ ପାଢୀ ବଲାଙ୍ଗୀରସ୍ଥିତ ୱେସ୍କୋ ଅଭିଯୋଗ ପ୍ରକୋଷ୍ଠରେ ନିଜର ଅଭିଯୋଗ ଜଣାଇଥିଲେ। ଉକ୍ତ ଅଭିଯୋଗ ପ୍ରକୋଷ୍ଠ ଦାୟିତ୍ୱରେ ଥିବା କର୍ମଚାରୀ ପାଢୀଙ୍କୁ ତାଙ୍କର ଅଭିଯୋଗ ସବ୍ଡିଭିଜନ୍ ୧-ନମ୍ବରରେ ହିଁ ସମାଧାନ ହୋଇପାରିବ ବୋଲି କହିଥିଲେ। ପାଢୀ ପୁନର୍ବାର ଉକ୍ତ ସବ୍ ଡିଭିଜନ୍ ୧-ନମ୍ବରକୁ ଆସି ସେଠାରେ କାର୍ଯ୍ୟରତ କନିଷ୍ଠ କିରାଣି ମିଶ୍ରଙ୍କୁ ଏହାର ସମାଧାନ କରିବା ପାଇଁ କହିଥିଲେ। ମିଶ୍ର ଉକ୍ତ ବକେୟା ବିଦ୍ୟୁତ୍ ବିଲର ୨୦ ପ୍ରତିଶତ ହିସାବରେ ୬ ହଜାର ୮୦ ଟଙ୍କା ହେଉଛି। କିନ୍ତୁ ୫ ହଜାର ଟଙ୍କା ଦେଲେ ମୁଁ ୩୦ ହଜାର ଊର୍ଦ୍ଧ୍ୱ ବକେୟା ବିଦ୍ୟୁତ୍ ବିଲ୍କୁ କମାଇ ୧୦ ହଜାର ଟଙ୍କା କରିଦେବେ କହିଥିଲେ। ଏ ନେଇ ପାଢୀ ଭବାନୀପାଟଣା ଭିଜିଲାନ୍ସ ବିଭାଗରେ ଜଣାଇଥିଲେ। ଭିଜିଲାନ୍ସ ବିଭାଗ ନିର୍ଦ୍ଦେଶକ୍ରମେ ଗୁରୁବାର ୧୨ଟା ସମୟରେ ପାଢୀଙ୍କ ପୁଅ ସରୋଜ ପାଢୀ କନିଷ୍ଠ କିରାଣି ଅଜିତ୍ ମିଶ୍ରଙ୍କୁ ତାଙ୍କ କାର୍ଯ୍ୟାଳୟରେ ୫ ହଜାର ଟଙ୍କା ଲାଞ୍ଚ ଦେଇଥିଲେ। ପୂର୍ବରୁ ଲୁଚି ରହିଥିବା ଭିଜିଲାନ୍ସ ବିଭାଗ ଅଧିକାରୀମାନେ ଚଢାଉ କରି ଲାଞ୍ଚ ନେଇଥିବା ୫ ହଜାର ଟଙ୍କା ଜବତ କରିବା ସହିତ ମିଶ୍ରଙ୍କୁ ଗିରଫ କରିଥିଲେ। ଏହି ଚଢାଉରେ ଡିଏସ୍ପି ସତ୍ୟବାନ୍ ମହାନନ୍ଦ ନେତୃତ୍ୱରେ ଭିଜିଲାନ୍ସ ବିଭାଗ ଅଧିକାରୀମାନେ ସାମିଲ ଥିଲେ।