ବ୍ରହ୍ମପୁର ଅଫିସ,୩ା୧: ବିଦ୍ୟୁତ୍ ଆଘାତରେ ଗୁରୁତର ଜଣେ ଶ୍ରମିକଙ୍କ ଗୁରୁବାର ବ୍ରହ୍ମପୁର ବଡ଼ ମେଡିକାଲରେ ମୃତ୍ୟୁ ଘଟିଛି। ସେ ହେଲେ ହିଞ୍ଜିଳିକାଟୁ ଥାନା ଅନ୍ତର୍ଗତ ସମରଝୋଳ ଗ୍ରାମର ନିରାକାର ସାହୁ। ନିରାକାର ବ୍ରହ୍ମପୁରରେ ଏକ ଗୃହ ନିର୍ମାଣ କାର୍ଯ୍ୟରେ ନିୟୋଜିତ ଥିଲେ। ଶୁକ୍ରବାର ବଡ଼ବଜାର ଥାନା ପୋଲିସ ତାଙ୍କ ମୃତଦେହ ଜବତ କରି ନଂ.୧/୨୦ରେ ଏକ ଅପମୃତ୍ୟୁ ମାମଲା ରୁଜୁ କରିଛି। ଅନ୍ୟପଟେ କ୍ଷତପୂରଣ ନ ମିଳିଲେ ମୃତଦେହ ନେବେନି ବୋଲି ମୃତକଙ୍କ ପରିବାର ଲୋକ ଅଡି ବସିଥିଲେ। ଘର ମାଲିକ ୨ ଲକ୍ଷ ଟଙ୍କା କ୍ଷତିପୂରଣ ଦେବାକୁ ପ୍ରତିଶ୍ରୁତି ଦେବା ପରେ ପରିବାର ଲୋକେ ମୃତଦେହ ନେଇଥିଲେ।
ବଡ଼ବଜାର ଥାନା ଅନ୍ତର୍ଗତ ଫାଷ୍ଟଗେଟ ଗାୟତ୍ରୀ ବିହାରରେ ରାଜୀବଲୋଚନ ସାହୁଙ୍କ ଘର ଉପର ମହଲା ନିର୍ମାଣ କାମ ଚାଲିଥିଲା। ଉକ୍ତ କାମ ଠିକା ନେଇଥିବା ମିସ୍ତ୍ରି ନିରାକାରଙ୍କ ସହ ଅନ୍ୟ ୨ ଜଣ ମହିଳା ଶ୍ରମିକଙ୍କୁ ଗୁରୁବାର କାମରେ ନିୟୋଜିତ କରିଥିଲେ। ସନ୍ଧ୍ୟାରେ କାମ ଚାଲିଥିବା ବେଳେ ଏକ ହେଲୋଜିନ ଲାଇଟ ହଠାତ ବନ୍ଦ ହୋଇଯାଇଥିଲା। ନିରାକାର ଏହାକୁ ସଜାଡ଼ିବା ପାଇଁ ଯାଇଥିବା ବେଳେ ବିଦ୍ୟୁତ ସଂସ୍ପର୍ଶରେ ଆସି ଯାଇଥିଲେ। ତାଙ୍କୁ ଗୁରୁତର ଅବସ୍ଥାରେ ବଡ଼ ମେଡିକାଲକୁ ନିଆଯାଇଥିଲେ ମଧ୍ୟ ଡାକ୍ତର ମୃତ ଘୋଷଣା କରିଥିଲେ।
