ଜୟପୁର,୬ା୨(ନି.ପ୍ର.) କୋରାପୁଟ ଜିଲା ଅଧୀନ ଜୟପୁର ଉପଖଣ୍ଡରେ ୯୬ କୋଟି ଓ କୋରାପୁଟ ଉପଖଣ୍ଡରେ ୭୦ କୋଟି ଟଙ୍କାର ବିଦ୍ୟୁତ ବକେୟା ପଡ଼ିଛି। ୧୫ ତାରିଖ ସୁଦ୍ଧା ବକେୟା ବିଲ୍ ଜମା କରିବା ପାଇଁ ସମୟ ଦେଇଛି ସାଉଥ୍କୋ। ପ୍ରଚାର ଗାଡ଼ି ବୁଲିବା ସହ ଡାକବାଜି ଯନ୍ତ୍ରରେ ଏହି ଘୋଷଣା କରାଯାଇଛି। ନିର୍ଦ୍ଧାରିତ ତାରିଖ ଭିତରେ ଜମା ନ କଲେ ୧୬ ତାରିଖରୁ ବିଦ୍ୟୁତ ସଂଯୋଗ କାଟିଦେବା ପାଇଁ ବକେୟା ରଖିଥିବା ଉପଭୋକ୍ତାଙ୍କୁ ଚେତାବନୀ ଦେଇଛି ସାଉଥ୍କୋ।
କୋରାପୁଟ ସାଉଥ୍କୋ ୟୁଟିଲିଟି ଡିଭିଜନ ଅଧୀନରେ କୋରାପୁଟ, ସେମିଳିଗୁଡ଼ା, ପଟ୍ଟାଙ୍ଗି, ଲକ୍ଷ୍ମୀପୁର, ନନ୍ଦପୁର, ନାରାୟଣପାଟଣା, ବନ୍ଧୁଗାଁ, ଦଶମନ୍ତପୁର ବ୍ଲକ ସହ ସୁନାବେଡ଼ା ଓ କୋରାପୁଟ ପୌରପରିଷଦ ରହିଛି ା ସେହିପରି ଜୟପୁର ସାଉଥ୍କୋ ୟୁଟିଲିଟି ଡିଭିଜନ ଅଧୀନରେ ଜୟପୁର, ବୈପାରିଗୁଡ଼ା, କୁନ୍ଦୁରା, ବୋରିଗୁମ୍ମା, କୋଟପାଡ଼, ଲମତାପୁଟ ବ୍ଲକ ରହିଛି। କୋରାପୁଟ ଅଧୀନରେ ପ୍ରାୟ ୧ ଲକ୍ଷ ୪୮ ଜଣ ବିଦ୍ୟୁତ ଉପଭୋକ୍ତା ରହିଛନ୍ତି। ଏଥିମଧ୍ୟରୁ ୨୨ ହଜାର ଉପଭୋକ୍ତା ହିଁ ବିଜୁଳି ବିଲ୍ ନିୟମିତ ପଇଠ କରନ୍ତି। ଜୟପୁର ଡିଭିଜନ ଅଧୀନରେ ୧ ଲକ୍ଷ ୫୨ ହଜାର ୨୨୭ ଜଣ ଉପଭୋକ୍ତା ରହିଥିବା ବେଳେ ୩୦ ହଜାର ଉପଭୋକ୍ତା ନିୟମିତ ବିଜୁଳି ବିଲ ପଇଠ କରନ୍ତି। ୯୬ କୋଟି ୭୫ ଲକ୍ଷ ଟଙ୍କା ବକେୟା ରହିଛି। ୧୨୭୦ ସରକାରୀ ଗ୍ରାହକ ରହିଛନ୍ତି। କୋରାପୁଟ ଡିଭିଜନ ଅଧୀନରେ ପଞ୍ଚାୟତିରାଜ ବିଭାଗରେ ୩ କୋଟି ୧୧ ଲକ୍ଷ, ଜନସ୍ବାସ୍ଥ୍ୟ ବିଭାଗରେ ୩ କୋଟି, ବିଦ୍ୟାଳୟ ଗଣଶିକ୍ଷା ବିଭାଗର ୧.୪ କୋଟି ଭଳି ଜିଲାର ୬୭ଟି ସରକାରୀ ବିଭାଗରେ ୧୩ କୋଟି ୧୯ ଲକ୍ଷ ୯୪ ହଜାର ୭୯୭ ଟଙ୍କା ବକେୟା ପଡ଼ିଛି। ସେହିପରି ଜୟପୁର ଡିଭିଜନ ଅଧୀନରେ ନଭେମ୍ବର ୨୦୧୯ ଯାଏ ୪୦ଟି ବିଭାଗରେ ୫ କୋଟି ୪୧ ଲକ୍ଷ ୮୧ ହଜାର ୮୭୨ ଟଙ୍କା ବକେୟା ପଡ଼ିଛି। ଜୟପୁର ଡିଭିଜନ ପଞ୍ଚାୟତରାଜ ବିଭାଗର ୨ କୋଟି ୧୩ ଲକ୍ଷ ୭୬ ହଜାର ୧୦୬ ଟଙ୍କା ବକେୟା ଥିବାବେଳେ ପୌରପରିଷଦ ୪୦ ଲକ୍ଷ ୬୭ ହଜାର ୭୦୯ ଟଙ୍କା ବକେୟା ରଖିଛି। ଏନେଇ ମଙ୍ଗଳବାର ବ୍ରହ୍ମପୁରରେ ଏକ ପ୍ରସ୍ତୁତି ବୈଠକ ମଧ୍ୟ ଅନୁଷ୍ଠିତ ହୋଇଥିଲା। ଜୟପୁର ଡିଭିଜନ ସାଉଥ୍କୋ ନିର୍ବାହୀ ଯନ୍ତ୍ରୀ ପ୍ରଫୁଲ୍ଲ କୁମାର ଗୌଡ଼ କହିଛନ୍ତି, ସରକାରୀ ବିଭାଗକୁ ବକେୟା ଟଙ୍କା ପଇଠ କରିବାକୁ କୁହାଯାଇଛି। ସେମାନେ ଶୀଘ୍ର ପଇଠ କରିବେ। ଉପଭୋକ୍ତାଙ୍କୁ ଡାକବାଜି ଯନ୍ତ୍ର ଦ୍ୱାରା ସୂଚନା ଦିଆଯାଉଛି। ଯେଉଁମାନେ ବକେୟା ଟଙ୍କା ପଇଠ ନ କରିବେ ସେମାନଙ୍କ ବିଦ୍ୟୁତ ସଂଯୋଗ ଛିନ୍ନ କରାଯିବ।