ଭୁବନେଶ୍ୱର,୧୫।୯(ବ୍ୟୁରୋ): ରାଜଧାନୀରେ ଜଣେ ବିଧବାଙ୍କୁ ବଳାତ୍କାର। ନୟାପଲ୍ଲୀ ଥାନାଞ୍ଚଳରେ ଘଟିଛି ଏହି ସ୍ପର୍ଶକାତର ଘଟଣା। ଏନେଇ ପୀଡିତା ଜଣକ ଲିଖିତ ଅଭିଯୋଗ କରିବା ପରେ ପୋଲିସ ଆଇପିସି ଦଫା ୩୭୬(୨) ଓ ୫୦୬ରେ ଏକ ମାମଲା (ନଂ.୧୦୩/୧୯) ରୁଜୁ କରି ତଦନ୍ତ ଆରମ୍ଭ କରିଛି। ଅଭିଯୋଗ ଅନୁଯାୟୀ, ମହିଳା ଜଣକ ସାଲିଆସାହିରେ ନିଜର ଛୋଟ ପିଲାଙ୍କୁ ନେଇ ରୁହନ୍ତି। ତାଙ୍କ ଘର ନିକଟକୁ ଜଣେ ଯୁବକ ପ୍ରାୟ ସମୟରେ ଆସି ନଜର ରଖନ୍ତି। ମହିଳା ଛୋଟ ପିଲାଙ୍କ ସହ ରହିଥିବା ଦେଖି ଉକ୍ତ ଯୁବକ ଜଣକ ଟାର୍ଗେଟ କରିଥିଲେ। କିଛିଦିନ ତଳେ ସେ ହଠାତ ମହିଳାଙ୍କ ଘର ଭିତରକୁ ପଶିଯାଇଥିଲେ। ମହିଳା ଜଣକ କିଛି ବୁଝିବା ପୂର୍ବରୁ ଅଭିଯୁକ୍ତ ଯୁବକ କବାଟ ବନ୍ଦ କରି ତାଙ୍କୁ ବଳାତ୍କାର କରିଥିଲେ। ଫଳରେ ମହିଳା ଜଣକ ଏବେ ଗର୍ଭବତୀ ଥିବା ପୋଲିସ କହିଛି। ପୋଲିସ ଘଟଣାର ସତ୍ୟାସତ ଜାଣିବା ପାଇଁ ମହିଳାଙ୍କୁ ଡାକ୍ତରୀ ପରୀକ୍ଷା କରିଥିବା ଜଣାପଡିଛି। ରିପୋର୍ଟ ଆସିବା ପରେ ପୂରା ଘଟଣା ସ୍ପଷ୍ଟ ହେବ ବୋଲି ପୋଲିସ କହିଛି।
