ଭୁବନେଶ୍ୱର,୨୦।୭(ବ୍ୟୁରୋ): ବିଜେଡି ସରକାରର ପଞ୍ଚମ ପାଳିରେ ପ୍ରଥମ ଥର ନିର୍ବାଚିତ ହୋଇଥିବା ବିଧାୟକଙ୍କୁ ମନ୍ତ୍ରୀ ପଦବୀ ମିଳିଛି। ତେବେ ନୂଆ କରି ବିଧାନସଭାକୁ ନିର୍ବାଚିତ ହୋଇଥିବା ଓ ମନ୍ତ୍ରୀ ପଦବୀ ପାଇଥିବା ସଦସ୍ୟଙ୍କୁ ହଟହଟା ହେବାକୁ ପଡ଼ିଛି। ଉକ୍ତ ମନ୍ତ୍ରୀମାନେ ବିଧାନସଭାରେ ସଭ୍ୟମାନଙ୍କ ପ୍ରଶ୍ନର ଉତ୍ତର ଦେବାକୁ ସକ୍ଷମ ହେଉନାହାନ୍ତି। ଶନିବାର ବିଧାନସଭାରେ ଏଭଳି ଏକ ଅଭାବନୀୟ ପରିସ୍ଥିତି ଦେଖିବାକୁ ମିଳିଛି। ହସ୍ତତନ୍ତ, ବୟନଶିଳ୍ପ, ହସ୍ତଶିଳ୍ପ ମନ୍ତ୍ରୀ ପଦ୍ମିନୀ ଦିଆନ ଏବଂ ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ପ୍ରେମାନନ୍ଦ ନାୟକ ବିଧାନସଭାରେ ଉତ୍ତର ଦେଇ ନ ପାରି ହନ୍ତସନ୍ତ ହୋଇଛନ୍ତି।
କଂଗ୍ରେସ ସଭ୍ୟ ସୁରେଶ କୁମାର ରାଉତରାୟ ହସ୍ତତନ୍ତ,ବୟନଶିଳ୍ପ ବିଭାଗ ସମ୍ପର୍କରେ ବିଭାଗୀୟ ମନ୍ତ୍ରୀ ପଦ୍ମିନୀ ଦିଆନଙ୍କଠାରୁ ଉତ୍ତର ଚାହିଁଥିଲେ। କେଉଁ କେଉଁ ସ୍ଥାନରେ କେଉଁ ପ୍ରକାର ହସ୍ତଶିଳ୍ପ ହେଉଛି, କେତେଜଣ କାରିଗର କାର୍ଯ୍ୟରତ ଅଛନ୍ତି, ସରକାର ଏହି ଶିଳ୍ପର ପ୍ରଚାର ଏବଂ ପ୍ରସାର ଲାଗି କ’ଣ ପଦକ୍ଷେପ ନେଉଛନ୍ତି, ୨୦୧୯ ଆର୍ଥିକ ବର୍ଷରେ କେଉଁ ଜିଲାର କେଉଁ ସଂସ୍ଥାକୁ କେତେ ଟଙ୍କା ଋଣ ଦିଆଯାଇଛି ବୋଲି ସେ ପଚାରିଥିଲେ। ମନ୍ତ୍ରୀ ଲେଖା ଉତ୍ତର ପଢ଼ି ଜଣାଇଥିଲେ ଯେ, ରାଜ୍ୟରେ ୫୦ ପ୍ରକାର ହସ୍ତଶିଳ୍ପ ରହିଛି। ୧ଲକ୍ଷ ୨୯ହଜାର ୯୫୮ଜଣ କାରିଗର କାର୍ଯ୍ୟ କରୁଛନ୍ତି। ହସ୍ତଶିଳ୍ପର ପ୍ରଚାର, ପ୍ରସାର ଏବଂ ବ୍ୟବସାୟ ଲାଗି ସ୍ବୟଂ ସହାୟକ ଗୋଷ୍ଠୀର ବ୍ୟକ୍ତିବିଶେଷଙ୍କୁ ବ୍ୟାଙ୍କ ସହାୟତାରେ ଋଣ ଯୋଗାଇ ଦିଆଯାଇଛି। ମୂଳ ପ୍ରଶ୍ନକର୍ତ୍ତା ସୁରେଶ କୁମାର ରାଉତରାୟ ରାଜ୍ୟର ବିଭିନ୍ନ ଜିଲାରେ ହସ୍ତଶିଳ୍ପୀଙ୍କୁ ଉତ୍ସାହିତ କରିବା ଲାଗି କି’ ବ୍ୟବସ୍ଥା କରାଯାଇଛି ବୋଲି ପ୍ରଶ୍ନ କରିଥିଲେ। ବିଜେଡି ସଭ୍ୟ ଭୁପିନ୍ଦର ସିଂ ସ୍ବୟଂସହାୟକ ଗୋଷ୍ଠୀଙ୍କ ଦ୍ୱାରା ନିର୍ମିତ କାରୁକାର୍ଯ୍ୟଗୁଡ଼ିକୁ ବିକ୍ରି ଲାଗି କି’ ବ୍ୟବସ୍ଥା କରାଯାଇଛି ବୋଲି ପଚାରିଥିଲେ। ତେବେ ମନ୍ତ୍ରୀ ଏହାର କୌଣସି ଉତ୍ତର ଦେଇପାରି ନ ଥିଲେ। ପରେ ତଥ୍ୟ ଦେଇଦେବେ ବୋଲି କହିଥିଲେ। ବାଚସ୍ପତି ଏହି ପ୍ରଶ୍ନକୁ ଆଗକୁ ନ ବଢ଼ାଇ ମୂଳ ପ୍ରଶ୍ନକର୍ତ୍ତାଙ୍କୁ ଆଉ କ’ଣ ପଚାରିବେ ବୋଲି କହିଥିଲେ। ସୁରେଶ କହିଥିଲେ, ଆଉ କ’ଣ ପଚାରିବି। ପଇସାପତ୍ର ଦେଇ ଶିଳ୍ପୀଙ୍କୁ ଉତ୍ସାହିତ କରନ୍ତୁ।
ଭାଜପା ସଭ୍ୟ ମୋହନ ଚରଣ ମାଝିଙ୍କ ପ୍ରଶ୍ନରେ ହସ୍ତଶିଳ୍ପ ମନ୍ତ୍ରୀଙ୍କୁ ପୁଣିଥରେ ଅନୁରୂପ ଅବସ୍ଥା ଭୋଗିବାକୁ ପଡ଼ିଥିଲା। ସେ ତାଙ୍କ ପ୍ରଶ୍ନର କୌଣସି ଉତ୍ତର ଦେଇପାରି ନ ଥିଲେ। ଫଳରେ ବାଚସ୍ପତି ସେହି ପ୍ରଶ୍ନକୁ ସେଠାରେ ସମାପ୍ତ କରି ଅନ୍ୟ ପ୍ରଶ୍ନ ଉପରକୁ ଯାଉଥିଲେ।