ବିଧାନସଭା ଷ୍ଟାଣ୍ଡିଂ କମିଟି ରିପୋର୍ଟ : ରାଜ୍ୟରେ ଦକ୍ଷ ଶଲ୍ୟ ବିଶେଷଜ୍ଞ, ଆଇସିୟୁ ଅଭାବ
21 ଭୁବନେଶ୍ୱର, ୧୭ା୭(ବ୍ୟୁରୋ): କମ୍ୟୁନିଟି ହେଲ୍ଥ ସେଣ୍ଟର(ସିଏଚ୍ସି) ଓ ସବ୍ ଡିଭିଜନାଲ ହସ୍ପିଟାଲର ଶଲ୍ୟ ଚିକିତ୍ସା (ସର୍ଜରି) ବିଭାଗରେ ବହୁ ପଦବୀ ଖାଲି ପଡ଼ିଛି। ଏହାକୁ ପୂରଣ କରିବା ପାଇଁ ରାଜ୍ୟରେ ବର୍ତ୍ତମାନ ପର୍ଯ୍ୟାପ୍ତ ଦକ୍ଷ ଶଲ୍ୟ ବିଶେଷଜ୍ଞ ନାହାନ୍ତି। ସ୍ତ୍ରୀ ଓ ପ୍ରସୂତି, ମେଡିସିନ ଏବଂ ଶିଶୁ ବିଭାଗରେ ପିଜି ଡିଗ୍ରୀ କରିଥିବା ଡାକ୍ତରମାନେ ରାଜ୍ୟର ବିଭିନ୍ନ ଡାକ୍ତରଖାନାରେ ଆସିଷ୍ଟାଣ୍ଟ ସର୍ଜନ ଭାବେ କାର୍ଯ୍ୟ କରୁଛନ୍ତି। ଏମାନଙ୍କୁ ସିଏଚ୍ସି ଓ ସବ୍ ଡିଭିଜନାଲ ହସ୍ପିଟାଲରେ ଶଲ୍ୟ ବିଶେଷଜ୍ଞଭାବେ ନିଯୁକ୍ତ କରାଯିବା ଉଚିତ ବୋଲି ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗର ବିଧାନସଭା ଷ୍ଟାଣ୍ଡିଂ କମିଟି ରିପୋର୍ଟରେ ପରାମର୍ଶ ଦିଆଯାଇଛି।
କମିଟି ଉପସ୍ଥାପନ କରିଥିବା ରିପୋର୍ଟରେ ଦର୍ଶାଯାଇଛି ଯେ, ଆନାଟୋମି, ଫିଜିଓଲୋଜି, ବାୟୋକେମିଷ୍ଟ୍ରି, ଫାର୍ମାକୋଲୋଜି, ଏଫ୍ଏମ୍ଟି, ଏସ୍ପିଏମ୍ ଓ ପାର୍ସିଆଲି ପାଥୋଲୋଜି ଭଳି ନନ୍-କ୍ଲିନିକାଲ ବିଭାଗର ପିଜି ଡାକ୍ତରମାନଙ୍କୁ କୋର୍ସ ଶେଷ କରିବା ପରେ ମେଡିକାଲ କଲେଜରେ ଆସିଷ୍ଟାଣ୍ଟ ସର୍ଜନ ଭାବେ ନିଯୁକ୍ତି ଦିଆଯାଉ। ଫଳରେ ସେମାନେ ପିଲାମାନଙ୍କୁ ଶିକ୍ଷାଦାନ କରିପାରିବେ। ଏପରିକି ସିନିୟର ରେସିଡେଣ୍ଟଶିପ୍ ଶେଷ କରିଥିବା ଡାକ୍ତରମାନଙ୍କୁ ନିଶ୍ଚିତ ରୂପେ ଉପରୋକ୍ତ ବିଭାଗରେ ଆସିଷ୍ଟାଣ୍ଟ ସର୍ଜନ ଭାବେ ନିଯୁକ୍ତି ଦିଆଯିବା ଉଚିତ। ତେବେ ମେଡିକାଲ କଲେଜରେ ସ୍ଥାୟୀ ସହକାରୀ ପ୍ରାଧ୍ୟାପକ ଭାବେ ନିଯୁକ୍ତି ନ ପାଇଲା ପର୍ଯ୍ୟନ୍ତ ସେମାନେ କାର୍ଯ୍ୟ କରିବେ। ଅନ୍ୟପକ୍ଷରେ ଡାକ୍ତରଖାନାରେ ଆଇସିୟୁ ଅଭାବ ସଂକ୍ରାନ୍ତରେ ରିପୋର୍ଟରେ ଗୁରୁତ୍ୱ ଦିଆଯାଇଛି। ରାସ୍ତାରେ ଦୁର୍ଘଟଣାଗ୍ରସ୍ତ ରୋଗୀ ଓ ଗୁରୁତର ରୋଗୀମାନେ ବିଭିନ୍ନ ହସ୍ପିଟାଲକୁ ଯାଉଛନ୍ତି। ପ୍ରଥମେ ଉପଜିଲା ଚିକିତ୍ସାଳୟ(ଏସ୍ଡିଏଚ୍), ପରେ ଜିଲା ଚିକିତ୍ସାଳୟ(ଡିଏଚ୍) ଓ ଶେଷରେ ମେଡିକାଲ କଲେଜକୁ ରେଫର ହେଉଛନ୍ତି। ସେମାନଙ୍କ ମଧ୍ୟରୁ ଅଧିକାଂଶ ରୋଗୀଙ୍କୁ ଆଇସିୟୁ ଅଭାବରୁ ଅନ୍ୟ ହସ୍ପିଟାଲକୁ ରେଫର କରାଯାଉଥିବା ଦେଖାଯାଉଛି। ତେଣୁ ସରକାର ଏସ୍ଡିଏଚ୍ ଓ ଡିଏଚ୍ଗୁଡ଼ିକରେ ଆଇସିୟୁ ୟୁନିଟ୍ ସ୍ଥାପନ କରିବା ସହିତ ସବୁ ପ୍ରକାର ସୁବିଧା ଯୋଗାଇଦେବା ଉଚିତ। ସେହିଭଳି କଟକ ଏସ୍ସିବି ସମେତ ରାଜ୍ୟର ସମସ୍ତ ମେଡିକାଲ କଲେଜରେ ଆଇସିୟୁ/ବେଡ୍ ସଂଖ୍ୟା ବୃଦ୍ଧି କରାଯାଉ। ମେଡିକାଲ କଲେଜ ଓ ଜିଲା ମୁଖ୍ୟ ଚିକିତ୍ସାଳୟର ଡାକ୍ତର ଏବଂ ବିଭିନ୍ନ ବର୍ଗର କର୍ମଚାରୀଙ୍କୁ ଚିହ୍ନିବା ପାଇଁ ଭିନ୍ନ ଭିନ୍ନ ଡ୍ରେସ୍ କୋଡ୍ କରାଯାଉ। ସାଧାରଣ ଲୋକଙ୍କ ଦାବି ଅନୁସାରେ ରାଜ୍ୟର ପ୍ରତି ବ୍ଲକ୍ରେ ମହାପ୍ରୟାଣ ଗାଡ଼ିର ବ୍ୟବସ୍ଥା କରିବାକୁ କମିଟି ପରାମର୍ଶ ଦେଇଛି।
ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗର ବିଧାନସଭା ଷ୍ଟାଣ୍ଡିଂ କମିଟି ବୈଠକ ଗତ ୩ ତାରିଖରେ ଅନୁଷ୍ଠିତ ହୋଇଥିଲା। ବିଧାୟକ ଅଶ୍ୱିନୀ କୁମାର ପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ କମିଟି ସଦସ୍ୟ ବିଧାୟକ ପ୍ରମୋଦ କୁମାର ମଲ୍ଲିକ, ରମେଶ ଚନ୍ଦ୍ର ଜେନା, ଲତିକା ପ୍ରଧାନ, ଲକ୍ଷ୍ମଣ ମୁଣ୍ଡା, ମୀନାକ୍ଷୀ ମହାନ୍ତ, ସୁଧାଂଶୁ ଶେଖର ପରିଡ଼ାଙ୍କ ସମେତ ୧୧ଜଣ ବିଧାୟକ ଏବଂ ସଚିବ ଦାଶରଥି ଶତପଥୀ, ଯୁଗ୍ମ ସଚିବ ସୁଶୀଳା ମଲ୍ଲିକଙ୍କ ସମେତ ୪ ଅଧିକାରୀ ଉପସ୍ଥିତ ଥିଲେ।