ବେଙ୍ଗାଲୁରୁ, ୧୭ା୭ : କର୍ନାଟକ ରାଜନୀତିରେ ଘଡ଼ିକେ ଘୋଡ଼ା ଛୁଟୁଥିବାବେଳେ ପ୍ରଦେଶ ଭାଜପା ମୁଖ୍ୟ ବି.ଏସ୍. ୟେଦୁରପ୍ପା ଦଳର ବିଧାୟକଙ୍କ ସହିତ ମିଶି ମଙ୍ଗଳବାର ବେଙ୍ଗାଲୁରୁରେ କ୍ରିକେଟ ଖେଳିଛନ୍ତି। ମୁଖ୍ୟମନ୍ତ୍ରୀ ଏଚ୍.ଡି. କୁମାରସ୍ବାମୀ ମେଣ୍ଟ ସରକାରକୁ ବଞ୍ଚାଇବା ଲାଗି ସଂଗ୍ରାମ କରୁଥିବାବେଳେ ପୂର୍ବତନ ମୁଖ୍ୟମନ୍ତ୍ରୀ ୟେଦୁରପ୍ପା କ୍ରିକେଟ ଖେଳି ପରିବର୍ତ୍ତନଶୀଳ ରାଜନୀତିର ଏକ ଭିନ୍ନ ସଂକେତ ଦେଇଛନ୍ତି। ପ୍ରକାଶ ଯେ, ୧୬ ବିଧାୟକ(କଂଗ୍ରେସର ୧୩ ଓ ଜେଡିଏସ୍ର ୩) ଇସ୍ତଫା ଦେଇଥିବାବେଳେ ଦୁଇ ସ୍ବାଧୀନ ବିଧାୟକ ଏସ୍. ଶଙ୍କର ଓ ଏଚ୍. ନାଗେଶ ମେଣ୍ଟ ସରକାରରୁ ସମର୍ଥନ ପ୍ରତ୍ୟାହାର କରିଛନ୍ତି । ସେପଟେ ଗୁରୁବାର ହେବାକୁ ଥିବା ଆସ୍ଥାଭୋଟ ଲାଗି କଂଗ୍ରେସ-ଜେଡିିଏସ୍ ମେଣ୍ଟ ସଜବାଜ ହେଉଥିବାବେଳେ ଭାଜପା ମଧ୍ୟ ରଣନୀତି ପ୍ରସ୍ତୁତିରେ ଅଛି। ସବୁ ଦଳ ନିଜ ନିଜର ବିଧାୟକଙ୍କୁ ନିର୍ଦ୍ଦିଷ୍ଟ ରେସ୍ତୋରାଁ ଭିତରେ ରଖିଛନ୍ତି। ସୁପ୍ରିମକୋର୍ଟଙ୍କ ରାୟ ଯାହା ଆସୁନା କାହିଁକି ଭାଜପା ନେତାମାନେ ଉତ୍ସାହିତ ଥିବା ୟେଦୁରପ୍ପାଙ୍କ କ୍ରିକେଟ ଖେଳରୁ ଜଣାପଡ଼ୁଛି।
