ରେଢାଖୋଲ,୧୫।୪(ଡି.ଏନ.ଏ.): ୨୦୧୯ ସାଧାରଣ ନିର୍ବାଚନରେ ରେଢାଖୋଲ ବିଧାନସଭା ଆସନରୁ ସ୍ବାଧୀନ ପ୍ରାର୍ଥୀ ଭାବେ ପ୍ରତିଦ୍ୱନ୍ଦ୍ୱିତା କରିଥିବା ଭାଜପା ଯୁବନେତା ତଥା ଆଇନଜୀବୀ ସମର କୁମାର ପ୍ରଧାନ(୪୪) ଆଉ ନାହାନ୍ତି। ମଙ୍ଗଳବାର ରାତି ୨ଟାରେ ଭୁବନେଶ୍ୱର ଏମ୍ସରେ ଚିକିତ୍ସାଧୀନ ଅବସ୍ଥାରେ ତାଙ୍କର ଅକାଳ ବିୟୋଗ ଘଟିଛି। ତାଙ୍କ ଅକାଳ ବିୟୋଗରେ ରେଢାଖୋଲରେ ଶୋକର ଛାୟା ଖେଳି ଯାଇଛି। ସେ ଗତ ସାଧାରଣ ନିର୍ବାଚନ ସମୟରୁ କର୍କଟ ରୋଗରେ ଆକ୍ରାନ୍ତ ହୋଇ ଚିକିତ୍ସାଧୀନ ଥିଲେ। ତାଙ୍କ ମରଶରୀରକୁ ଭୁବନେଶ୍ୱରରୁ ରେଢାଖୋଲକୁ ଅଣାଯାଇଥିଲା। ରଥସାହିସ୍ଥିତ ବାସଭବନରେ ସହରବାସୀ ଅନ୍ତିମ ଦର୍ଶନ କରିବା ପରେ ପୈତୃକ ଗ୍ରାମ ବାରବାଙ୍କ ଗ୍ରାମରେ ଶୋକାକୁଳ ପରିବେଶରେ ଅନ୍ତିମ ସଂସ୍କାର କରାଯାଇଛି। ଏକମାତ୍ର ପୁଅ ଆୟନ ପ୍ରଧାନ (୯) ମୁଖାଗ୍ନି ଦେଇଥିଲେ। ସମରଙ୍କ ଅକାଳ ବିୟୋଗରେ ବିଧାୟକ ରୋହିତ ପୂଜାରୀ ଶୋକବ୍ୟକ୍ତ କରିଛନ୍ତି। ରେଢାଖୋଲ ଓକିଲ ସଂଘ ସଭାପତି ଅଭୟ କୁମାର ବୀର, ସଂପାଦକ ଗଣେଶ୍ୱର ପ୍ରଧାନ, ଜିଲା ପରିଷଦ ସଭ୍ୟ ପ୍ରଦୀପ ପ୍ରଧାନ ପ୍ରମୁଖ ମଧ୍ୟ ଶୋକ ପ୍ରକାଶ କରିଛନ୍ତି। ସେହିଭଳି ରେଢାଖୋଲ ଓକିଲ ସଂଘ ପକ୍ଷରୁ ସମରଙ୍କ ବିୟୋଗରେ ଶୋକସଭା କରାଯାଇଥିଲା। ସଂଘ କାର୍ଯ୍ୟାଳୟରେ ଅନୁଷ୍ଠିତ ଏହି ଶୋକସଭାରେ ସଦସ୍ୟାମନେ ଯୋଗଦେଇ ତାଙ୍କ ଆତ୍ମାର ଶାନ୍ତି ଲାଭ ପାଇଁ ନୀରବ ପ୍ରାର୍ଥନା କରିଥିଲେ। ସେହିଭଳି ଅନ୍ତିମ ସଂସ୍କାର ବେଳେ ରେଙ୍ଗାଲି ବିଧାୟକ ନାଉରୀ ନାୟକ, ଭାଜପା ବିଧାୟକ ପ୍ରାର୍ଥୀ ଦେବେନ୍ଦ୍ର ମହାପାତ୍ର, ଭାଜପା ଜିଲା ସଭାପତି ଗିରିଶ ପଟେଲ, ବ୍ଲକ ବିଜେଡି ସଭାପତି ଉଦିତ ତ୍ରିପାଠୀ, ନାକ୍ଟିଦେଉଳ ବ୍ଲକର ପୂର୍ବତନ ଅଧ୍ୟକ୍ଷ ସୁଦର୍ଶନ ସାହୁ, ଶ୍ରମିକ ନେତା ଅନାଦି ସାହୁ, ପୂର୍ବତନ କାଉନସିଲର ରାଜିବଲୋଚନ ପ୍ରଧାନ, ଆଇନଜୀବୀ ଦୟାସାଗର ପ୍ରଧାନ, ସରକାରୀ ଓକିଲ ନାରାୟଣ ତ୍ରିପାଠୀଙ୍କ ସମେତ ରେଢାଖୋଲର ବହୁ ବିଶିଷ୍ଠ ବ୍ୟକ୍ତି ଯୋଗ ଦେଇଥିଲେ। ରେଢାଖୋଲର ବରିଷ୍ଠ ଆଇନଜୀବୀ ଶମ୍ଭୁପ୍ରସାଦ ପ୍ରଧାନଙ୍କ ସେ ଦ୍ୱିତୀୟ ପୁଅ। ଛାତ୍ର ଜୀବନରୁ ସମର ରାଜନୀତିରେ ସକ୍ରିୟ ଥିଲେ। ଭାଜପାର ବିଭିନ୍ନ ପଦପଦବିରେ ରହି ଦାୟିତ୍ୱ ନିର୍ବାହ କରିଥିଲେ।