ନୂଆଦିଲ୍ଲୀ,୬।୬: ବର୍ତ୍ତମାନ କରୋନା ମହାମାରୀ ବ୍ୟାପି ଚାଲିଛି। ଲୋକମାନେ ବର୍ତ୍ତମାନ ସାମାଜିକ ଦୂରତ୍ୱ ପାଳନ କରୁଥିବା ବେଳେ ସର୍ବସାଧାରଣ ସ୍ଥାନଗୁଡିକରେ ଥିବା କୌଣସି ଜିନିଷକୁ ଛୁଇଁବା ବେଳେ ଅନେକ କଥା ବିଚାର କରୁଛନ୍ତି। ଏଟିଏମ୍ ମଧ୍ୟ ଅନେକଙ୍କ ଦ୍ୱାରା ବ୍ୟବହାର ହେଉଛି। ଏଥିରେ ସଂକ୍ରମଣର ଆଶଙ୍କା ମଧ୍ୟ ରହିଛି। ଏହାକୁ ଧ୍ୟାନରେ ରଖି ବ୍ୟାଙ୍କଗୁଡିକ ଏମିତି ଏକ ବ୍ୟବସ୍ଥା ଆଣିବାକୁ ପ୍ରସ୍ତୁତ ହେଉଛନ୍ତି ଯେଉଁଥିରେ ବିନା କୌଣସି ଟଚ୍ରେ ଏଟିଏମ୍କୁ ଟଙ୍କା ବାହାରିବ। ପେମେଣ୍ଟସ କମ୍ପାନୀ ଏଜିଏସ୍ ଟ୍ରାଞ୍ଜେକ୍ଟ ଟେକ୍ନୋଲୋଜି ପକ୍ଷରୁ ଏଥିଲାଗି ଏକ ପ୍ରୋଟୋଟାଇପ୍ ପ୍ରସ୍ତୁତ କରାଯାଇଛି। ଏଥିରେ ସ୍କ୍ରିନ୍ ଉପରେ ରହିଥିବା କ୍ୟୁଆର୍ କୋଡ୍ ସ୍କାନ୍ କରିବା ପରେ ମେଶିନର ଇଣ୍ଟରଫେସ ପାଇଁ ବ୍ୟାଙ୍କର ମୋବାଇଲ ଆପ୍ଲିକେଶନ ବ୍ୟବହାର କରିବାକୁ ପଡିବ। ବର୍ତ୍ତମାନର ମ୍ୟାଗ୍ନେଟିକ କାର୍ଡ ଏବଂ ପିନ୍ ଦେବା ପ୍ରକ୍ରିୟାଠାରୁ ଏହା ଭିନ୍ନ। ନୂଆ କଣ୍ଟାକ୍ଟଲେସ ଏଟିଏମ୍ ବ୍ୟବହାର କରିବା ଲାଗି କଷ୍ଟମର ସ୍କ୍ରିନ୍ ଉପରେ ରହିଥିବା କ୍ୟୁଆର୍ କୋଡ ସ୍କାନ୍ କରି ବ୍ୟାଙ୍କର ମୋବାଇଲ ଆପ୍ଲିକେଶନର ସହାୟତା ନେବେ। ଏହା ପରେ ନିଜ ମୋବାଇଲରେ ଉଠାଣ କରିବାକୁ ଚାହୁଁଥିବା ଅର୍ଥ ରାଶି ଏବଂ ଏଟିଏମ୍ ପିନ୍ ଦେବାକୁ ପଡିବ। ଏଭଳି ଭାବେ ମେଶିନକୁ ଟଚ୍ ନ କରି ମଧ୍ୟ କ୍ୟାଶ ସଂଗ୍ରହ କରାଯାଇପାରିବ।