ବାରିପଦା ଅଫିସ, ୩୦ା୩- ବର୍ତ୍ତମାନ ସାରା ବିଶ୍ୱ କରୋନା ଭାଇରସ୍କୁ ନେଇ ଚିନ୍ତିତ। ଏହି ଭାଇରସ୍ ସଂକ୍ରମଣର ଚେନ୍କୁ ଭାଙ୍ଗିବା ପାଇଁ ଭାରତରେ ଆସନ୍ତା ୧୪ ତାରିଖ ପର୍ଯ୍ୟନ୍ତ ଲକଡାଉନ କରାଯାଇଛି। ବର୍ତ୍ତମାନ ସମୟରେ ସମସ୍ତେ ନିଜେ ନିଜ ଘରେ ରହୁଛନ୍ତି। ଏହି ପରିପ୍ରେକ୍ଷୀରେ ମୟୂରଭଞ୍ଜ ଜିଲା ବାରିପଦା ସହରସ୍ଥିତ ତକତପୁର ଅଞ୍ଚଳରେ ରହୁଥିବା ଏକ ପରିବାର ବିନା ପାରିଶ୍ରମକିରେ ମାସ୍କ ତିଆରି କରି ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି। ତକତପୁର ବଜାରରେ ରାଜେନ୍ଦ୍ର କବାଟ ଏକ ଲେଡ଼ିସ୍ ଟେଲର କରି ପରିବାର ପ୍ରତିପୋଷଣ କରନ୍ତି। ବର୍ତ୍ତମାନ ଲକଡ଼ାଉନ ହୋଇଥିବାରୁ ତାଙ୍କ ଦୋକାନ ବନ୍ଦ ରହିଛି। ଘରେ ବସି ବସି ମହାମାରୀ କରୋନା ସମୟରେ ସେବା ଯୋଗାଇ ଦେଉଥିବା ପୋଲିସ କର୍ମଚାରୀ ଓ ଡାକ୍ତରଖାନାରେ କାର୍ଯ୍ୟରତ କର୍ମଚାରୀମାନଙ୍କ ସୁରକ୍ଷା ପାଇଁ ଏବେ ମାସ୍କର ଘୋର ଅଭାବ ଦେଖା ଦେଉଥିବା ନେଇ ସେ ଚିନ୍ତିତ ହୋଇ ପଡ଼ିଥିଲେ। ତେଣୁ ରାଜେନ୍ଦ୍ର ନିଜେ ମାସ୍କ ତିଆରି କରି ମାଗଣାରେ ବାଣ୍ଟିବା ପାଇଁ ମନସ୍ଥ କରିଥିଲେ। ହେଲେ ଉନ୍ନତମାନର ମାସ୍କ ତିଆରି କରିବା ପାଇଁ କପଡ଼ା ଏବଂ ଅନ୍ୟାନ୍ୟ ସାମଗ୍ରୀ କିଣିବା ନିମିତ୍ତ ସମ୍ବଳ ଅଭାବ ଦେଖା ଦେଇଥିଲା। ଏହି ସମୟରେ ଭୁବନେଶ୍ୱରର ଏସଜିକେ ଫାଉଣ୍ଡେସନ ସହାୟତାର ହାତ ବଢ଼ାଇଥିଲା। ଏହା ପରେ ସେ ଓ ତାଙ୍କ ପରିବାର ମାର୍ଚ୍ଚ ୨୫ ତାରିଖରୁ ମାସ୍କ ତିଆରି ଆରମ୍ଭ କରିଥିଲେ। ବର୍ତ୍ତମାନ ଏହି ଉତ୍ସର୍ଗୀକୃତ ପରିବାର ୨ ହଜାର ମାସ୍କ ତିଆରି କରିସାରିଥିବା ବେଳେ ଆଗାମୀ ଦିନରେ ଆହୁରି ୧୦ ହଜାର ମାସ୍କ ତିଆରି କରିବା ପାଇଁ ଯୋଜନା ରଖିଛନ୍ତି। ମାସ୍କ ତିଆରି କରିବାରେ ତାଙ୍କ ପରିବାରର ସଦସ୍ୟମାନେ ସହାୟତା କରୁଛନ୍ତି। ଗୋଟିଏ ଦିନରେ ପ୍ରାୟ ୮ ଘଣ୍ଟା ସେ ମାସ୍କ ତିଆରି କରିବାରେ ସମୟ ଦେଉଛନ୍ତି। ବଜାରରୁ କପଡ଼ା ଆଣି ତାଙ୍କୁ ସାଇଜ ଅନୁସାରରେ ରାଜେନ୍ଦ୍ର କାଟୁଥିବା ବେଳେ ସ୍ତ୍ରୀ ସଞ୍ଜନା କବାଟ ଓ ଅନ୍ୟ ଜଣେ ସହଯୋଗୀ ତନୁସ୍ମିତା ପତି ଏହାକୁ ସିଲାଇ କରନ୍ତି। ସିଲାଇ ସରିବା ପରେ ଏହାକୁ ରାଜେନ୍ଦ୍ର ଓ ତାଙ୍କ ବାପା ନରୋତ୍ତମ ମାସ୍କକୁ ଜରିରେ ପ୍ୟାକିଂ କରନ୍ତି। ମାସ୍କ ତିଆରି କରିବା ବେଳେ ସମସ୍ତେ ନିଜ ହାତକୁ ସାନିଟାଇଜ କରିବା ସହ ମୁହଁରେ ମାସ୍କ ପିନ୍ଧି ଉତ୍ସାହର ସହିତ କାମ ଆରମ୍ଭ କରିଥାନ୍ତି। ପ୍ରସ୍ତୁତ ହୋଇଥିବା ମାସ୍କଗୁଡ଼ିକୁ ବାରିପଦା ସମେତ ଭୁବନେଶ୍ୱର, କଟକ, ଏବଂ ଖୋର୍ଦ୍ଧା ଅଞ୍ଚଳର ପୋଲିସ ଓ ସ୍ବାସ୍ଥ୍ୟ କର୍ମଚାରୀମାନଙ୍କୁ ଏସଜିକେ ଅନୁଷ୍ଠାନ ବଣ୍ଟନ କରିବ ବୋଲି ରାଜେନ୍ଦ୍ର କହିଛନ୍ତି। ବିନା ପାରିଶ୍ରମିକରେ ଏହିଭଳି କାମ କରୁଥିବାରୁ ଉକ୍ତ ପରିବାର ଲୋକଙ୍କୁ ବିଭିନ୍ନ ମହଲରୁ ସାଧୁବାଦ ଜଣାଯାଇଛି।