ବାଲିଗୁଡା,୧୬ା୬(ଡି.ଏନ୍.ଏ.)- ବାଲିଗୁଡାରେ ରଥଯାତ୍ରା ପାଳନ ପାଇଁ ସ୍ଥାନୀୟ ଉପଜିଲାପାଳ ଦେବେନ୍ଦ୍ର କୁମାର ନନ୍ଦଙ୍କ ଅଧ୍ୟକ୍ଷତାରେ ଏକ ପ୍ରସ୍ତୁତି ବୈଠକ ମଙ୍ଗଳବାର ଅନୁଷ୍ଠିତ ହୋଇଛି। ଏଥିରେ ବାଲିଗୁଡ଼ା ଏସ୍ଡିପିଓ ମାନସ ରଞ୍ଜନ ବାରିକ, ତହସିଲଦାର କ୍ଷିରବ୍ଧ ତନୟା ସାହୁ, ମନ୍ଦିର ଟ୍ରଷ୍ଟ ସଦସ୍ୟ ମୁଖ୍ୟ ମଧୁସୂଦନ ଦାଶ, ମଦନ ମୋହନ ଦୋରା, ରଞ୍ଜିତ କୁମାର ମହାନ୍ତି ଓ ନିମନ୍ତ୍ରିତ ସଦସ୍ୟ ଭାବେ ଶ୍ରୀନିବାସ ରାଓ ଓ ଲଳିତ କୁମାର ପାତ୍ର, ସହକାରୀ ଜିଲାପାଳ ହଳଧର ନାୟକ, ହରିଶ୍ଚନ୍ଦ୍ର ପ୍ରଧାନ ଓ ସୂଚନା ଲୋକସମ୍ପର୍କ ଅଧିକାରିଣୀ ଯଶୋଦା ଗାଦବା ପ୍ରମୁଖ ଉପସ୍ଥିତ ଥିଲେ। ରଥଯାତ୍ରା ପାଳନ ନେଇ ଆଶା ଓ ଆଶଙ୍କା ଲାଗି ରହିଥିବା ବେଳେ ରଥ ର୍ନିମାଣ ଚାଲିଛି। କୋଭିଡ୍ ନିୟମ ଓ ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶକୁ ଦୃଷ୍ଟିରେ ରଖି ବିନା ଭକ୍ତରେ ଏବଂ କମ୍ ସେବାୟତଙ୍କୁ ନେଇ ସାମାଜିକ ଦୂରତା ରକ୍ଷାକରି ରଥଯାତ୍ରା ପାଳନ ପାଇଁ ପ୍ରସ୍ତୁତ ରହିବାକୁ ପ୍ରଥମ ବୈଠକରେ ନିଷ୍ପତ୍ତି ହୋଇଛି। ରଥଯାତ୍ରା ଦିନ ସହରର ସମସ୍ତ ପ୍ରବେଶ ପଥ ସିଲ୍ କରି ବାଇପାସରେ ଗାଡି ଚଳାଚଳ ପାଇଁ ବ୍ୟବସ୍ଥା କରାଯିବ ବୋଲି ଉପଜିଲାପାଳ ନନ୍ଦ କହିଛନ୍ତି। ବୈଠକ ପରେ ମନ୍ଦିର, ରଥ ଖଳା ଓ ମାଉସୀ ମା’ ମନ୍ଦିର ପରିଦର୍ଶନ କରିଥିଲେ ସମସ୍ତ ଅଧିକାରୀ।