କୋକସରା, ୧୧।୬ (ଡି.ଏନ.ଏ)-ଲକ୍ ଡାଉନ ଯୋଗୁ ଦେଶାନ୍ତର ଶ୍ରମିକମାନେ ଅନେକ ଯାତନା ସହି କୌଣସି ପ୍ରକାରେ ନିଜ ଭିଟାମାଟିକୁ ଫେରିଥିବା ବେଳେ ସେମାନଙ୍କୁ ଜିଲାର ବିଭିନ୍ନ ସଙ୍ଗରୋଧ କେନ୍ଦ୍ରରେ ୧୪ ଦିନ ରହିବା ପାଇଁ ସ୍ଥାନୀୟ ପ୍ରଶାସନ ବ୍ୟବସ୍ଥା କରିଛନ୍ତି। ତେବେ ସଙ୍ଗରୋଧ ଅବଧି ମଧ୍ୟରେ ସ୍ବାବ ଟେଷ୍ଟ କରାଯାଉ ନ ଥିବା ଅଭିଯୋଗ ହୋଇଛି । କୋକସରା ବ୍ଲକ ମହିମା ପଞ୍ଚାୟତ ଡେଙ୍ଗାଗୁଡା ଅସ୍ଥାୟୀ ସଙ୍ଗରୋଧ କେନ୍ଦ୍ରରୁ କେସିଙ୍ଗା ଓ ନର୍ଲା ବ୍ଲକର କିଛି ମହିଳା ପୁରୁଷ ଶ୍ରମିକଙ୍କ ସହ ଛୋଟ ଶିଶୁ ବୁଧବାର ଚାଲି ଚାଲି ଫେରୁଥିବା ଦେଖିବାକୁ ମିଳିଥିଲା । ସେମାନେ ୧୪ ଦିନ ସଙ୍ଗରୋଧ କେନ୍ଦ୍ରରେ ରହିବା ପରେ ମଧ୍ୟ ସେମାନଙ୍କ ସ୍ବାବ ଟେଷ୍ଟ ହୋଇ ନ ଥିବା ଶ୍ରମିକମାନେ କହିଛନ୍ତି । କ୍ବାରେଣ୍ଟାଇନ ଛାଡିବା ସମୟରେ ସେମାନେ ସୁସ୍ଥ ଥିବାରୁ ସ୍ଥାନୀୟ ଡାକ୍ତରଙ୍କ ପ୍ରମାଣପତ୍ର ସହ ଘରକୁ ଛାଡି ଦିଆଯାଇଛି । ତେବେ ଶ୍ରମିକମାନେ ମହାରାଷ୍ଟ୍ର ଓ ଗୁଜୁରାଟ ଫେରନ୍ତା ହୋଇଥିବାରୁ ମନରେ ଭୟ ରହିଛି। ଯଦି ପରେ କରୋନା ଲକ୍ଷଣ ପ୍ରକାଶ ପାଏ ତେବେ ପ୍ରଶାସନ ଦାୟୀ ରହିବ ବୋଲି ସେମାନେ ଅଭିଯୋଗ କରିଛନ୍ତି । ଶ୍ରମିକମାନେ ମଙ୍ଗଳବାର ସଙ୍ଗରୋଧରୁ ବାହାରିଥିଲେ ମଧ୍ୟ ସ୍ଥାନୀୟ ସରପଞ୍ଚ କି ବ୍ଲକ ପ୍ରଶାସନ ସେମାନଙ୍କ ଯିବା ବ୍ୟବସ୍ଥା କରି ନ ଥିଲେ। ଡେଙ୍ଗାଗୁଡାରୁ କୋକସରା ପ୍ରାୟ ୧୦ କିଲୋମିଟର ଚାଲି ଚାଲି ଆସିବା ପରେ ସେମାନଙ୍କ ଉପରେ ଗଣମାଧ୍ୟମ ପ୍ରତିନିଧିଙ୍କ ଦୃଷ୍ଟି ପଡିଥିଲା। ଏ ସମ୍ପର୍କରେ ବ୍ଲକ ପ୍ରଶାସନ ସହ ଯୋଗାଯୋଗ କରିବା ପରେ ଶ୍ରମିକମାନଙ୍କୁ ଏକ ବସରେ ସେମାନଙ୍କ ଘରକୁ ପଠାଯାଇଥିଲା। ତେବେ ବିନା ସ୍ବାବ୍ ଟେଷ୍ଟରେ ଫେରୁଥିବା ପ୍ରବାସୀ ଶ୍ରମିକଙ୍କ ମନରେ ଘରକୁ ଯିବା ପୂର୍ବରୁ ଆଶଙ୍କା ଓ ଅଜଣା ଭୟ ଦେଖାଦେଇଛି ।