ନୂଆଦିଲ୍ଲୀ,୧।୨: ନିର୍ଭୟା ଗଣବଳାତ୍କାର ମାମଲାରେ ଦୋଷୀ ସାବ୍ୟସ୍ତ ହୋଇଥିବା ଅକ୍ଷୟ ଠାକୁର ଏବେ ରାଷ୍ଟ୍ରପତିଙ୍କ ନିକଟରେ କ୍ଷମା ଆବେଦନ କରିଛନ୍ତି। ଶନିବାର ରାଷ୍ଟ୍ରପତି ରାମନାଥ କୋବିନ୍ଦ ବିନୟ ଶର୍ମାଙ୍କ କ୍ଷମା ଆବେଦନ ଖାରଜ କରିବା ପରେ ଏବେ ଅକ୍ଷୟ ରାଷ୍ଟ୍ରପତିଙ୍କ ନିକଟରେ ଗୁହାରି କରିଛନ୍ତି। ନିର୍ଭୟା ମାମଲାର ଦୋଷୀ ଜଣକ ପରେ ଜଣେ ଏମିତି ଆବେଦନ କରିବା ଫଳରେ ନିର୍ଭୟାଙ୍କୁ ନ୍ୟାୟ ମିଳିବାରେ ବିଳମ୍ବ ହେଉଛି ବୋଲି କୁହାଯାଉଛି। ଗୋଟିଏ ପଟେ ଏହି ମାମଲାର ୪ ଦୋଷୀଙ୍କ ଫାଶୀ ଦଣ୍ଡାଦେଶକୁ ଶୁକ୍ରବାର କୋର୍ଟ ସ୍ଥଗିତ ରଖିଥିବା ବେଳେ ଅନ୍ୟପଟେ ନ୍ୟାୟାରେ ବିଳମ୍ବ ପାଇଁ ନିର୍ଭୟାଙ୍କ ମାତାପିତା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲଙ୍କୁ ଦାୟୀ କରିଛନ୍ତି। ଅନ୍ୟପଟେ ନିର୍ଭୟାଙ୍କ ମା’ ଆଶା ଦେବୀ ଶୁକ୍ରବାର କହିଥିଲେ କି ଦୋଷୀଙ୍କ ପକ୍ଷରୁ ଲଢୁଥିବା ଓକିଲ ଏପି ସିଂ କେବେକି ନିର୍ଭୟା ମାମଲାର ଦୋଷୀଙ୍କୁ ଫାଶୀ ହେବନାହିଁ ବୋଲି କହିଥିଲେ। କିନ୍ତୁ ନ୍ୟାୟ ବ୍ୟବସ୍ଥା ଉପରେ ଆଶା ଦେବୀଙ୍କ ସମ୍ପୂର୍ଣ୍ଣ ବିଶ୍ୱାସ ରହିଛି ବୋଲି ସେ କହିଥିଲେ।