ଭୁବନେଶ୍ୱର,୨୧।୪(ବ୍ୟୁରୋ): ଗୋଟିଏ ପଟେ କରୋନା ମହାମାରୀ ସହ ମୁକାବିଲା ଲାଗି ରାଜ୍ୟ ସରକାରଙ୍କ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଉଛି। ବିଶେଷକରି ଆକ୍ରାନ୍ତଙ୍କୁ ଶୀଘ୍ର ଚିହ୍ନଟ କରାଯିବା ଫଳରେ ରୋଗକୁ ସଠିକ୍ ଭାବେ ମୁକାବିଲା କରାଯିବା ହୃଦୟଙ୍ଗମ କରି ୧୦୪ ହେଲ୍ପଲାଇନ୍ ନଂକୁ କାର୍ଯ୍ୟକ୍ଷମ କରାଯାଇଛି। ହେଲେ ଅନେକ ଅସାମାଜିକ ବ୍ୟକ୍ତି ଏହି ନଂରେ ଫୋନ୍ କରି ବଦମାସୀ କରୁଛନ୍ତି। ବିଶେଷକରି ଏହି ସରକାରୀ କଲ୍ସେଣ୍ଟରରେ କାମ କରୁଥିବା ମହିଳା କର୍ମଚାରୀଙ୍କୁ ଅଶାଳୀନ କଥା କହୁଛନ୍ତି। ଏଣୁ ସେମାନଙ୍କୁ ଠାବ କରି କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେଠାରେ କାମ କରୁଥିବା କର୍ମଚାରୀ ଦାବି କରିଛନ୍ତି।
ବର୍ତ୍ତମାନ ସରକାରଙ୍କ ପକ୍ଷରୁ ୧୦୪ ନଂ ସ୍ବତନ୍ତ୍ର ଭାବେ କୋଭିଡ-୧୯ ପାଇଁ ବ୍ୟବହୃତ କରାଯାଉଛି। ପ୍ରତ୍ୟେହ ଏଠାକୁ ୧୫ହଜାରରୁ ଅଧିକ କଲ୍ ଆସୁଥିବା ବେଳେ କିଛି ଫେକ୍ କଲ୍ର କର୍ମଚାରୀମାନଙ୍କୁ ଅଶାଳୀନ ଭାଷା ପ୍ରୟୋଗ କରୁଛନ୍ତି। ଏବେର ଜୀବନ ମରଣ ଭଳି ସଂଘର୍ଷମୟ ପରିସ୍ଥିତିରେ ଏଭଳି ଫୋନ୍ କରି ଲାଇନ୍ ବ୍ୟସ୍ତ ରଖିବା ଯୋଗୁ ଅନ୍ୟ କେହି ଆବଶ୍ୟକ ବ୍ୟକ୍ତିଙ୍କୁ ନିରାଶ ହେବାକୁ ପଡ଼ିପାରେ ବୋଲି କର୍ମକର୍ତ୍ତାମାନେ କହିଛନ୍ତି। ଏହାକୁ ନେଇ ସେମାନେ ଅସନ୍ତୋଷ ପ୍ରକାଶ କରିଛନ୍ତି। ଉକ୍ତ ବ୍ୟକ୍ତିଙ୍କୁ ଚିହ୍ନଟ କରି ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ସେମାନେ ଦାବି କରିଛନ୍ତି।