ନୟାଗଡ଼ ଅଫିସ,୧୬ା୩: ଅତ୍ୟଧିକ ରାସାୟନିକ ସାର ଓ କୀଟନାଶକ ପ୍ରୟୋଗ ଦ୍ୱାରା ଜୈବ ବିବିଧତା ବିପଦରେ ରହିଛି। ଏହି କାରଣରୁ ନୟାଗଡ଼ ଜିଲାର ୮୫ ପ୍ରତିଶତ ଜମିର ମାଟି ଅମ୍ଳଯୁକ୍ତ ହୋଇସାରିଲାଣି। ଏହି ଅମ୍ଳଯୁକ୍ତ ମାଟି ଫସଲ ଉତ୍ପାଦନରେ ବାଧକ ସାଜିଛି। ଏପରିସ୍ଥଳେ ସରକାର ୨୦୧୭-୧୮ ଆର୍ଥିକବର୍ଷରୁ ପରମ୍ପରାଗତ କୃଷି ବିକାଶ ଯୋଜନା କାର୍ଯ୍ୟକାରୀ କରୁଛନ୍ତି। ହେଲେ ଏହି ଯୋଜନା ଜିଲାର କେବଳ ଓଡ଼ଗାଁ ଓ ରଣପୁର ବ୍ଲକରେ ସୀମିତ ହୋଇ ରହିଯାଇଛି।
ମାଟି ଜୀବନ୍ତ ଓ ଏଥିରେ ରାସାୟନିକ ପରିବର୍ତ୍ତନ ଲାଗିରହିଥାଏ। ହେଲେ ଆମର ଦୂରଦୃଷ୍ଟି ଅଭାବ ଯୋଗୁ ମାଟି ଅମ୍ଳଯୁକ୍ତ ହେବାରେ ଲାଗିଛି। ଏଣୁ ଜୀବଜଗତର ବିଭିନ୍ନ ଆବଶ୍ୟକତାକୁ ମେଣ୍ଟାଉଥିବା ମାଟିର ଜୈବ ବିବିଧତା ବିପଦକୁ ଠେଲି ହୋଇଯାଉଛି। ଏହାକୁ ଅଣଦେଖା କରାଯାଉଥିବାରୁ ମାଟିରେ ଫସଲ ଉପତ୍ାଦନ କମି ଚାଲିଛି। ଏହା ପରିବେଶ ଉପରେ ମଧ୍ୟ କୁପ୍ରଭାବ ପକାଉଛି। ଡେରିରେ ହେଲେ ବି ଭାରତ ସରକାର ପରମ୍ପରାଗତ କୃଷି ବିକାଶ ଯୋଜନା ଆରମ୍ଭ କରିଛନ୍ତି। ଏହି ଯୋଜନାରେ ଜୈବିକ ପ୍ରଣାଳୀରେ ଖାଦ୍ୟଶସ୍ୟ ଉତ୍ପାଦନ ପାଇଁ ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଇଛି। କୃଷି ବିଭାଗର ସୂଚନା ଅନୁସାରେ ୨୦୧୭-୧୮ ଆର୍ଥିକ ବର୍ଷରେ ଜିଲାର ରଣପୁର ବ୍ଲକରେ ୧୫୦୦ ଏକର ଜମିରେ ୯୦୭ ଚାଷୀ ଜୈବିକ ପ୍ରଣାଳୀରେ ଖାଦ୍ୟଶସ୍ୟ ଉପତ୍ାଦନ କରିଛନ୍ତି। ଓଡଗଁା ବ୍ଲକରେ ୫୦୦ ଏକରରେ ୩୦୦ ଚାଷୀ ଜୈବିକ ପଦ୍ଧତିରେ ଚାଷ କରିଥିବା ଜଣାପଡିଛି। ସେହିପରି ୨୦୧୮-୧୯ରେ ରଣପୁରରେ ୭୭୦ ଏକରରେ ୪୪୦ ଚାଷୀ, ଓଡ଼ଗାଁରେ ୩୦୦ ଏକରରେ ୧୭୩ ଚାଷୀ ଏବଂ ୨୦୧୯-୨୦ରେ ରଣପୁରରେ ଏକ ହଜାର ଏକରରେ ୬୨୩ ଚାଷୀ ଜୈବିକ ପଦ୍ଧତିରେ ଚାଷ କରିଛନ୍ତି। ହେଲେ ସଚେତନତା ଅଭାବରୁ ଏହା ଚାଷୀଙ୍କ ପାଖରେ ଅପହଞ୍ଚ ହୋଇରହିଥିବା କୁହାଯାଉଛି। ଗଣିଆର ଚାଷୀ ରାମଚନ୍ଦ୍ର ପ୍ରଧାନ କୁହନ୍ତି, ରାସାୟନିକ ସାର ଓ କୀଟନାଶକ ନ ଦେଲେ ଫସଲ ଫଳୁନି। ଫସଲ ନ ହେଲେ ଆମ ରୋଜଗାର କମିଯିବ। କ୍ଷତିରେ ପଡିବୁ। ଜୈବିକ ପଦ୍ଧତିରେ ଚାଷ କଲେ ଲାଭ ଓ କ୍ଷତି ସମ୍ପର୍କରେ ଆମକୁ କେହି ବୁଝାଉ ନାହାନ୍ତି। ଏ ଦିଗରେ ସଚେତନତା କରାଯିବା ଆବଶ୍ୟକତା ରହିଛି। ଓଡ଼ଗାଁର ଚାଷୀ ଦାମ ସାହୁ କୁହନ୍ତି, ଓଡ଼ଗାଁ ବ୍ଲକର କେଉଁ ଅଞ୍ଚଳରେ ଜୈବିକ ପଦ୍ଧତିରେ ଚାଷ ହେଉଛି ତାହା କୃଷି ବିଭାଗ ଜାଣିଥିବ। ଆମେ ଜୈବିକ ପଦ୍ଧତିରେ ଚାଷ କରିବାକୁ ଆଗ୍ରହୀ ଥିଲେ ମଧ୍ୟ ଅମଳ ଅଧିକ ନ ହେବାରୁ ରାସାୟନିକ ଓ କୀଟନାଶକ ବ୍ୟବହାର କରିବାକୁ ବାଧ୍ୟ ହେଉଛୁ। ବୈଜ୍ଞାନିକ ପ୍ରମୋଦ ପୃଷ୍ଟିଙ୍କ ସୂଚନା ଅନୁସାରେ ଏସିଡିଟି ବଢ଼ିଲେ ମାଟି ଅମ୍ଳ ହୋଇଯାଏ। ଅମ୍ଳ ମାଟିରେ ଯବକ୍ଷାରଜାନ, ଫସ୍ଫରସ, ପଟାସ, କ୍ୟାଲସିୟମ ଥିଲେ ଗଛ ଖାଦ୍ୟ ରୂପେ ଗ୍ରହଣ କରିପାରେ ନାହିଁ। ପୁଣି ଅମ୍ଳମାଟିରେ ଜୈବିକ ଅଙ୍ଗାର ଓ ଅଣୁଜୀବଙ୍କ ସଂଖ୍ୟା କମ ରହିଥାଏ। ଆଲମୁନିୟମ ଓ ଲୌହ ଅଧିକ ଥିବାରୁ ଫସଲ ପାଇଁ କ୍ଷତିକାରକ ହୋଇଥାଏ। ଅମ୍ଳ ମାଟିରେ ଚୂନ ସହ ଗୋବର ମିଶା ଖତ ପକାଇବା ଦରକାର। ସେହିପରି କାଗଜ ମଣ୍ଡ ମଧ୍ୟ ଦେବା ଦରକାର। ହେଲେ ଏହା ପର୍ଯ୍ୟାପ୍ତ ପରିମାଣର ମିଳୁ ନାହିଁ। ଗାଈ ସଂଖ୍ୟା କମିବା କାରଣରୁ ଗୋବର ଖତ ମିଳୁ ନାହିଁ। ଏଣୁ ଜୈବିକ କୃଷି ଲୋକପ୍ରିୟତା ହୋଇପାରୁ ନାହିଁ। ନୟାଗଡ଼ର ଅବସରପ୍ରାପ୍ତ ଜିଲା ମୁଖ୍ୟ କୃଷି ଅଧିକାରୀ ଶିଶିର କୁମାର ପଣ୍ଡା କୁହନ୍ତି, ରାସାୟନିକ ସାର ପ୍ରୟୋଗ ଦ୍ୱାରା ମାଟି ଅମ୍ଳ ହେବା ସ୍ବାଭାବିକ। ତେବେ ଜୈବିକ ସାର ପ୍ରସ୍ତୁତ କରି ମାଟିରେ ପ୍ରୟୋଗ କଲେ ଅମ୍ଳ କମିବା ସହ ଉର୍ବରତା ବଢ଼ିବ। ଏହା ଦ୍ୱାରା ଖର୍ଚ୍ଚ କମିବ। ଅମଳ ଅଧିକ ନ ହେଲେ ବି ପରିବେଶ ସନ୍ତୁଳନ ରହିବା ସହ ରୋଗରୁ ମୁକ୍ତି ମିଳିବ। ସରକାର ଜୈବିକ କୃଷିକୁ ଏବେ ପ୍ରାଧାନ୍ୟ ଦେଉଛନ୍ତି। ଚାଷୀ ଏହାକୁ ଗ୍ରହଣ କରିବା ଉଚିତ।